Azərbaycanın xarici işlər nazirinin müavini Yalçın Rəfiyev Bakı Dövlət Universitetinin (BDU) tələbələri ilə görüşüb.
Universitetdən AZƏRTAC-a bildirilib ki, tədbirdə rektor Elçin Babayev BDU-nun ölkənin yüksəkixtisaslı kadrlarla təmin edilməsində vacib rolunu diqqətə çatdırıb. O bildirib ki, BDU-nun yaxın əməkdaşlıq etdiyi dövlət qurumlarından biri də Xarici İşlər Nazirliyidir. Nazirliyin strukturlarında fəaliyyət göstərənlərin böyük qismi BDU məzunlarıdır: “Xarici işlər nazirinin 6 müavinindən 5-i, xarici ölkələrdə fəaliyyət göstərən diplomatik nümayəndəliklərimizin rəhbərlərinin də çoxu bizim məzunumuzdur. Təkcə bu faktlar bugünkü görüşün və diplomatik karyera quruculuğunun nə qədər vacib olduğunun göstəricisidir”.
Xarici işlər nazirinin müavini Yalçın Rəfiyev məzunu olduğu universitetin tələbələri ilə görüşdən məmnunluq hissi keçirdiyini bildirib. O, BDU məzunlarının diplomatik xidmətin uğurlarında böyük paya sahib olduqlarını vurğulayaraq deyib: “Tələbəlik dövrünün imkanlarından maksimum çox istifadə etməyinizi, fəal olmağınızı, daha çox dil öyrənməyi, nitq və yazı qabiliyyətinizi artırmağı tövsiyə edərdim. Bu gün Azərbaycanın xarici siyasəti çoxvektorlu və balanslıdır. Bu balansı milli maraqları qorumaqla düzgün formada, praqmatik şəkildə təmin etmək böyük səriştə tələb edir. Prezident İlham Əliyev ölkənin birinci diplomatı olaraq şəxsi təcrübəsi, peşəkarlığı və qətiyyəti ilə bütün diplomatlar üçün nümunədir”.
Bu yaxınlarda diplomatik xidmətə qəbul üzrə növbəti qəbul imtahanı keçiriləcəyini bildirən nazir müavini qeyd edib ki, hazırda nazirlik tərəfindən gənclərin təcrübə imkanlarının artırılması istiqamətində işlər aparılır: “XİN nəzdində “Diplomatiya könüllüləri” qrupu fəaliyyət göstərir, IV kurs tələbələrinin nazirlik strukturlarında təcrübəyə cəlb olunması son illər genişləndirilir. Buna səbəb diplomatik xidmətin qarşısında duran vəzifələrin artmasıdır. Beynəlxalq münasibətlər sistemi canlı orqanizmdir və daim dəyişir, ona uyğunlaşmaq və düzgün siyasət aparmaq lazımdır. Əgər diqqət etsəniz, həm təhlükəsizlik, həm də iqtisadi baxımdan regionda ən az zərər görən ölkə elə Azərbaycandır. Bunun da əsas səbəbi indiyə qədər aparılan düzgün siyasət, ölkənin maraqlarını hər şeydən üstün tutaraq təşkil edilən diplomatik fəaliyyətdir. Diplomat çox şərəfli peşədir. Çünki siz bu fəaliyyətdə milli maraqlara birbaşa xidmət edirsiniz. Məzunları və magistraturada təhsil alan tələbələri prosesdə fəal iştirak etməyə dəvət edirik”.
Daha sonra nazir müavini tələbələri XİN sisteminə işə qəbul qaydaları, diplomatik xidmətin üstünlükləri, bu sahədə yaradılan imkanlarla tanış edib və onların suallarını cavablandırıb.
jpg_1776421433.jpg)
