Abbas Aqil oğlu Mustafayev 1998-ci il sentyabr ayının 25-də Salyan rayonunda anadan olub. O, orta təhsilini bu sətirlərin müəllifinin bir zamanlar müəllim işlədiyi Salyan şəhər 1 saylı məktəb-liseydə alıb.
2015-ci ildə orta məktəbi bitirib, Azərbaycan Dövlət İqtisad Universitetinin Biznes və menecment fakültəsinə qəbul olunub. Abbas fəal tələbələrdən biri kimi debat klublarında yarışıb, elmi-intellektual layihələrdə iştirak edib. Fəal bir gənc olaraq müxtəlif sosial layihələrin də müəllifidir. Ali məktəbi başa vurduqdan bir neçə il sonra - 2023-cü ildə ikinci ali təhsil almaq üçün Gəncə Dövlət Universitetinin Tarix fakültəsinə daxil olub, qiyabi təhsil alır.
Abbas 2019-cu ilin oktyabr ayından etibarən əmək fəaliyyətinə Azərbaycan Respublikası Qida Təhlükəsizliyi Agentliyinin Salyan Regional Bölməsində (indiki Şirvan-Salyan Regional Bölmə) müfəttiş kimi başlayıb. Fəaliyyəti çərçivəsində regionda yerləşən və qida sahəsində fəaliyyət göstərən sahibkarlıq subyektlərində - ictimati iaşə müəssisələrində yoxlamalar və maarifləndirmə işləri apararaq xidməti vəzifəsini uğurla icra edib. Xüsusilə 2020-ci ildə - çətin "COVID-19" pandemiyası dövründə gücləndirilmiş iş rejimində çalışan dövlət məmurlarından biri olub və müvafiq sahədə geniş əhatəli maarifləndirmə və nəzarət tədbirləri həyata keçirib.
Abbas 2022-ci ilin iyun ayından etibarən Azərbaycan Respublikası Elm və Təhsil Nazirliyinin Əsaslı Tikinti və Təchizat İdarəsinin Şirvan-Salyan Regional Sektorunun aparıcı mütəxəssisi olaraq çalışır. İdarənin əsas hədəfi tabeliyində olan müəssisələrdə tədris prosesinin həyata keçirilməsi üçün normal infrastrukturun yaxşılaşdırılması və yenilərinin yaradılması məsələləri ilə bağlı problemlərin aradan qaldırılmasıdır. Gənc Abbas da təhsil müəssisələrindəki cari təmir işlərinə nəzarət edir və həmin müəssisələr də həm idarənin, həm də onun işindən razılıq edirlər.
Abbas deyir ki, ilk növbədə təmirə çox ehtiyacı olan, vəziyyəti daha ağır olan məktəb və bağçalarımız diqqət mərkəzindədir: "Təhsil müəssisələrinin istilik problemləri, qışda pedaqoji heyətin və uşaqların normal temperatur rejimində tədris prosesinə cəlb edilməsinə əlverişli şərait yaradılması da bizim öhdəmizə düşür".
A.Mustafayev daim sabaha baxan, həyatda nə iləsə kifayətlənməyən, öz üzərində yorulmadan çalışan gənclərimizdəndir. Belə gənclər müəllimlərinin də, cəmiyyətin də sevimlisidir.
Gülzar HÜSEYNOVA,
təqaüdçü müəllim
