Azərbaycan son illərdə həyata keçirdiyi ardıcıl enerji siyasəti nəticəsində qlobal enerji bazarında mövqeyini əhəmiyyətli dərəcədə gücləndirib və Avropanın enerji təhlükəsizliyinin əsas təminatçılarından birinə çevrilib. Artıq ölkəmiz yalnız enerji ixracatçısı deyil, həm də Avropa üçün etibarlı, proqnozlaşdırıla bilən və strateji tərəfdaş kimi çıxış edir.
Bu sözləri AZƏRTAC-a açıqlamasında iqtisadçı ekspert Samir Heydərov deyib.
Ekspert qeyd edib ki, Azərbaycanın təbii qaz ixracının coğrafiyası son illərdə əhəmiyyətli dərəcədə genişlənib. Hazırda Azərbaycan 16 ölkəyə təbii qaz ixrac edir ki, onlardan 10-u Avropa İttifaqının üzvüdür. Bu göstərici ölkəmizin boru kəmərləri ilə təbii qaz ixracının əhatə dairəsinə görə dünyanın aparıcı enerji təchizatçılarından biri olduğunu nümayiş etdirir.
Onun sözlərinə görə, 2025-ci ildə Azərbaycan ümumilikdə 25,2 milyard kubmetr təbii qaz ixrac edib. Bunun 12,8 milyard kubmetri Avropa bazarına, 9,6 milyard kubmetri Türkiyəyə, 2,3 milyard kubmetri Gürcüstana, 500 milyon kubmetri isə Suriyaya tədarük olunub. Eyni zamanda, Azərbaycan Avropa İttifaqının boru kəmərləri vasitəsilə həyata keçirilən təbii qaz idxalının 8,1 faizini təmin edib ki, bu da ölkəmizin qitənin enerji balansındakı rolunun getdikcə artdığını göstərir.
Samir Heydərov vurğulayıb ki, Rusiya–Ukrayna müharibəsindən sonra Avropanın enerji siyasətində köklü dəyişikliklər baş verib. Enerji mənbələrinin şaxələndirilməsi əsas prioritetə çevrilib və bu şəraitdə Azərbaycan etibarlı, öhdəliklərinə sadiq və uzunmüddətli əməkdaşlığa açıq tərəfdaş kimi xüsusi önəm qazanıb. 2021-ci illə müqayisədə Avropaya Azərbaycan qazının tədarükü təxminən 60 faiz artıb və Cənub Qaz Dəhlizi qitənin enerji təhlükəsizliyinin əsas dayaqlarından birinə çevrilib.
Ekspert qeyd edib ki, bu günə qədər Cənub Qaz Dəhlizi vasitəsilə 91 milyard kubmetrdən çox təbii qaz nəql olunub. Bunun 55 milyard kubmetrdən çoxu Avropa ölkələrinə çatdırılıb. Bu göstəricilər Azərbaycanın uzunmüddətli perspektivdə etibarlı enerji tərəfdaşı olduğunu bir daha təsdiqləyir.
"Azərbaycanın həyata keçirdiyi balanslaşdırılmış enerji siyasəti təkcə milli iqtisadiyyatın dayanıqlı inkişafına xidmət etmir, eyni zamanda, Avropanın enerji təhlükəsizliyinə mühüm töhfə verir. Müasir enerji infrastrukturu, ixrac marşrutlarının şaxələndirilməsi və yaşıl enerji sahəsində reallaşdırılan irimiqyaslı layihələr ölkəmizin regional və qlobal enerji bazarında strateji mövqeyini daha da möhkəmləndirir", – deyə iqtisadçı ekspert bildirib.
