Ölkədə kənd təsərrüfatı məhsulları istehsalının artırılmasında, əhalinin ərzaqla etibarlı təminatında böyük rolu olan mövcud meliorasiya və su təsərrüfatı fondlarının qorunub saxlanılması və onların istismarının yaxşılaşdırılması, bu sahənin müasir tələblər səviyyəsində daha da inkişaf etdirilməsi daim diqqət mərkəzində saxlanılır.
Bu baxımdan son illərin ən böyük layihələrdən olan, strateji əhəmiyyəti və kapital qoyuluşu ilə seçilən Şəmkirçay su anbarının, eləcə də Şəmkir-Samux-Goranboy magistral suvarma kanalının tikintisi ilə minlərlə hektar torpaq sahəsinin suvarılmasına, kənd təsərrüfatının inkişafına və yeni iş yerlərinin yaradılmasına imkan yaranmışdır. Şəmkir-Samux-Goranboy magistral suvarma kanalı kompleks layihə olaraq mühüm əhəmiyyətə malikdir.
Xatırladaq ki, Prezident İlham Əliyevin iştirakı ilə 2009-cu ildə təməli qoyulan Şəmkir su anbarı 2014-cü ildə istifadəyə verilmişdir. Şəmkir-Samux-Goranboy magistral suvarma kanalının birinci növbəsinin davamı olan 27,95 kilometrlik ikinci növbənin tikintisinə isə 2015-ci ildə başlanılmışdır. Bu kanalın birinci növbəsinin tikintisi ilə su mənbəyi işğal zonasında qalmış Goranboy rayonunun 8293 hektar əkin sahəsi suvarma suyu ilə təmin edilmişdir. Kanalın ikinci növbəsinin İpək yoluna qədər 8,55 kilometrlik birinci mərhələsinin 2017-ci ildə başa çatmış tikintisi isə Goranboy və Samux rayonlarının 941 hektarı yeni suvarılacaq torpaqlar olmaqla, 8938 hektar torpaq sahəsini suvarmağa imkan vermişdir. Bütövlükdə magistral kanalın istifadəyə verilməsi ilə Şəmkir, Samux, Göygöl və Goranboy rayonlarında 54 min hektar əkin sahəsinin su təminatının yaxşılaşdırılmasına və 17 min hektar yeni suvarılacaq torpaqlardan istifadə olunmasına imkan yaranmışdır.
Hazırda rayonun Goranlı, Qazançı, Qarapirimli, Gülməmmədli və Qırıxlı kəndlərinin əkin sahələrinin suvarılma suyu ilə təminatında mühüm əhəmiyyətə malik Şəmkir-Samux-Goranboy magistral suvarma kanalından şaxələndirici kanallar çəkilir. Suvarma suyunun davamlı təminatı, su itkisinin qarşısının alınması, sudan səmərəli istifadə və bu istiqamətdə müvafiq tədbirlərin həyata keçirilməsi üçün aidiyyəti məsul şəxslər daim ərazilərdə olur, görülən işlərə ciddi nəzarət edirlər.
Sabir ƏLİYEV,
"Azərbaycan"
