Azərbaycanda keçirilən mötəbər tədbirlər ölkəmizin qlobal nüfuzunun, aparıcı mövqeyinin və birləşdirici rolunun əyani təzahürüdür
Beynəlxalq təhlükəsizlik sisteminin zəiflədiyi, dünyanın qeyri-müəyyən mərhələyə qədəm qoyduğu bir dövrdə dialoq və əməkdaşlıq imkanlarının açıq saxlanılması zərurətə çevrilib. Siyasi qarşıdurmaların, regional münaqişələrin və iqtisadi təlatümlərin kəskinləşdiyi mürəkkəb şəraitdə Prezident İlham Əliyevin həyata keçirdiyi müstəqil, prinsipial və çoxşaxəli xarici siyasət kursu sayəsində Azərbaycan beynəlxalq miqyasda etimadın, sülhün və çoxtərəfli əməkdaşlığın formalaşmasına önəmli töhfələr verməkdədir.
Dünyanın bir çox ölkəsi, aparıcı beynəlxalq təşkilatlar, beyin mərkəzləri və transmilli şirkətlər Bakını açıq dialoq, strateji tərəfdaşlıq və ən etibarlı platforma kimi qəbul edirlər. Çünki Azərbaycan Şərqlə Qərbi, Şimalla Cənubu ideoloji və mədəni müstəvidə bir araya gətirmək bacarığına sahibdir.
Bu önəmli missiyanın məntiqi tərkib hissəsi kimi sentyabrın 25-26-da Bakıda keçirilən 2-ci Azərbaycan Beynəlxalq İnvestisiya Forumu ölkəmizin qlobal iqtisadi proseslərdə fəal iştirakını və sürətlə artan investisiya imkanlarını növbəti dəfə bütün dünyaya bariz şəkildə nümayiş etdirdi. "Parçalanmış dünyada etimadın bərpası: Cənubi Qafqaz qlobal bağlantı və investisiya sabitliyinin dayağı kimi" mövzusunda təşkil olunan mötəbər forum müasir dövrdə iqtisadi sabitliyin, qarşılıqlı etimadın və regional əməkdaşlığın bərpasının nə dərəcədə böyük əhəmiyyət kəsb etdiyini bir daha önə çıxardı. Tədbirdə iştirak edən və moderatorun suallarını ətraflı cavablandıran dövlətimizin başçısı vurğuladı ki, iqtisadiyyatın müxtəlif nəhəng və aparıcı sektorlarını təmsil edən bir çox beynəlxalq şirkətlərin Azərbaycanı etibarlı və proqnozlaşdırıla bilən tərəfdaş kimi qəbul etməsi faktı mövcud reallıqların təməlidir.
Prezident İlham Əliyevin proqram xarakterli çıxışı Azərbaycanın iqtisadi inkişaf modelinin əsas istiqamətlərini, ölkənin artan investisiya imkanlarını, Orta dəhliz çərçivəsində nəqliyyat potensialını, energetika siyasətini və Cənubi Qafqazda formalaşan yeni geoiqtisadi reallıqları tam əhatə edərək xarici tərəfdaşlara gələcək əməkdaşlığın aydın yol xəritəsini təqdim etdi. Ümumiyyətlə, bu forum Azərbaycanın yeni iqtisadi reallıqlar fonunda investisiya, "yaşıl enerji", nəqliyyat-logistika və digər perspektivli sahələr üzrə malik olduğu böyük potensialın beynəlxalq investorlar qarşısında təqdim edilməsi baxımından xüsusi əhəmiyyətli oldu.
Əlbəttə, ölkəmizin beynəlxalq münasibətlər sistemində qazandığı böyük etimad və nüfuz məqsədyönlü və uzaqgörənliklə həyata keçirilən təşəbbüslərin nəticəsidir. 12 mart 2026-cı il tarixində Bakıda təşkil olunan və "Keçid dövründə olan dünyada fikir ayrılıqlarının aradan qaldırılması" mövzusuna həsr edilən XIII Qlobal Bakı Forumu mürəkkəb siyasi proseslərin, dərinləşən qütbləşmələrin və risklərin müzakirə edildiyi ən nüfuzlu qlobal platformalardan biri kimi diqqət mərkəzində oldu. Dünyanın müxtəlif ölkələrindən tanınmış siyasətçiləri, sabiq dövlət və hökumət başçılarını, beynəlxalq təşkilat nümayəndələrini və aparıcı ekspertləri bir araya gətirən forumun açılış mərasimində çıxış edən Azərbaycan Prezidenti İlham Əliyev müasir dünyanın qarşılaşdığı geosiyasi çağırışlar, beynəlxalq əməkdaşlığın perspektivləri və yeni dünya nizamının formalaşması barədə mühüm mülahizələrini səsləndirdi. Dövlətimizin başçısının vurğuladığı kimi, beynəlxalq hüququn selektiv tətbiqi, əməkdaşlıq mexanizmlərinin zəifləməsi və dövlətlər arasında artan rəqabət etimad böhranını dərinləşdirir. Prezident İlham Əliyev xüsusi olaraq diqqətə çatdırdı ki, qlobal problemlər və fikir ayrılıqları yalnız açıq dialoq, qarşılıqlı hörmət və əməkdaşlıq yolu ilə həll edilə bilər. Məhz Azərbaycanın bu mövqeyi ölkəmizi qlobal miqyasda aparıcı təşəbbüskar mərkəzə çevirib.
Siyasi və iqtisadi dialoqla yanaşı, Azərbaycan qlobal təhlükəsizlik arxitekturasının yeniden formalaşdırılması, təhdidlərə qarşı mübarizə işinə də töhfələr verməkdədir. Beynəlxalq təhlükəsizlik sisteminin ciddi sınaqlarla üz-üzə qaldığı bir zamanda Dövlət Təhlükəsizliyi Xidmətinin təşkilatçılığı ilə Bakıda keçirilən IV Bakı Təhlükəsizlik Forumu öz miqyası və əhatə dairəsi ilə qlobal əhəmiyyətli hadisə kimi diqqəti cəlb etdi. Dünya ölkələrinin xüsusi xidmət və təhlükəsizlik orqanları üçün dialoq platformasına çevrilən bu foruma 600-ə yaxın nümayəndənin qatılması Bakı platformasına olan beynəlxalq etimadın ən yüksək səviyyədə olduğunu növbəti dəfə təsdiqlədi. Bu forum bir daha göstərdi ki, Azərbaycan qlobal təhlükəsizlik risklərinin qiymətləndirilməsində və birgə mübarizə mexanizmlərinin işlənməsində birləşdirici və əlaqələndirici rol oynayır.
Azərbaycanın evsahibliyi etdiyi beynəlxalq tədbirlər iqlim dəyişikliyi ilə mübarizədən tutmuş şəhərsalma, mədəniyyət, humanitar diplomatiya və mənəvi irsin qorunmasına qədər ən müxtəlif strateji sahələri əhatə edir. Qlobal iqlim diplomatiyasının zirvəsi sayılan COP29-dan sonra BMT-nin Ümumdünya Şəhərsalma Forumunun (WUF13) ölkəmizdə uğurlu təşkili, müntəzəm olaraq keçirilən Ümumdünya Mədəniyyətlərarası Dialoq forumları, Qoşulmama Hərəkatına sədrliyi dövründə təşkil edilən Zirvə görüşləri beynəlxalq ictimaiyyətin Azərbaycanın təşkilatçılıq qabiliyyətinə və vasitəçilik missiyasına verdiyi böyük qiymətin sübutudur. Bununla yanaşı, Bakıda keçirilən Türk Dövlətləri Təşkilatının Müsəlman Dini Rəhbərləri Şurasının 7-ci toplantısı və böyük Azərbaycan mütəfəkkiri Seyid Yəhya Bakuviyə həsr olunmuş beynəlxalq konfrans ölkəmizin öz tarixi-mənəvi irsinə sadiqliyi ilə yanaşı, türk dünyası və islam aləmində mənəvi həmrəyliyi yüksək səviyyədə təmin etdiyini də ortaya qoydu.
Bütün bu mühüm forumlar, beynəlxalq konfranslar, iqtisadi və təhlükəsizlik platformaları Azərbaycanın sadəcə qlobal tədbirlərə evsahibliyi edən coğrafi məkan olmadığını, eyni zamanda qlobal ideyaların müəllifi, sülhün, təhlükəsizliyin, iqtisadi bağlantıların və sivilizasiyalararası dialoqun fəal təşəbbüskarı olduğunu təsdiqləyir. Ziddiyyətlərin kəskinləşdiyi dövrdə tərəfdaşlıq üçün Bakının seçilməsi, fərqli siyasi qütblərin və nəhəng investorların ölkəmizdə bir araya gələrək əməkdaşlıq yollarını müzakirə etməsi Azərbaycan dövlətinin artan nüfuzunun, Prezident İlham Əliyevin beynəlxalq miqyasda qəbul olunan liderliyinin əyani göstəricisidir.
İsmayıl QOCAYEV,
"Azərbaycan"
jpg_1791989096.jpg)
