Vətəni ürəkdən sevənlər, məqamında canını ona fəda edənlər əbədi bir ömür qazanırlar. Astaranın Əzərüd kəndində boya-başa çatan Pəncəli Teymurovun həyatı buna nümunədir.
Astara elinin şəhidliyi Vətən sevgisindən başlanan igid oğlu 2016-cı ilin Aprel döyüşlərində erməni işğalçılarına qarşı son nəfəsinə qədər qəhrəmanlıqla döyüşüb. Onun kimi igidlərin torpağa axıtdıqları qanın hesabına Lələtəpədə ilk qələbə bayrağımız dalğalanıb. Odur ki, aramızda olmasalar da, adları çəkiləndə Azərbaycan xalqı qürur hissi keçirir.
Bu günlər Azərbaycan Yazıçılar İttifaqının cənub bölgəsi və Astara Pedaqoji Kollecinin təşkilatçılığı, şəhidlərin ailə üzvlərinin iştirakı ilə qəhrəmana həsr olunmuş tədbir keçirilib. Pəncəli Teymurovun xatirəsi ehtiramla yad edilib, Vətən uğrunda xidmətləri, hərbçi kimi yüksək peşəkarlıq, şücaət və mərdlik göstərməsi barədə danışılıb. Astara Pedaqoji Kollecinin direktoru, professor, şəhid atası Kamran Kazımov, kollecin Maliyyə-informatika və qida təhlükəsizliyi şöbəsinin müdiri, şəhid xanımı Nuranə Fərəcova bildiriblər ki, Pəncəli Vətən, torpaq uğrunda şəhidliyi ilə özünə əbədi abidə ucaldıb. İndi kiçik də, böyük də onunla fəxr edir. Ən böyük qürur yerimiz olmaqla o, qəlbimizdə əbədi yaşayacaq, hər an ehtiramla xatırlanacaq.
Tədbir iştirakçıları şəhidin məzarını ziyarət edib, önünə tər güllər düzüb, ev-muzeyində olublar.
Qeyd edək ki, "Qoca" ləqəbli əfsanəvi kəşfiyyatçı Pəncəli Nurməhəmməd oğlu Teymurov əsgəri borcunu şərəflə yerinə yetirdikdən sonra - 1999-cu ildən Xüsusi Təyinatlı Qüvvələrin tərkibində Vətənin keşiyində dayanıb. Nümunəvi xidməti ilə bir çox medala və mükafata layiq görülüb. O, 2016-cı il Aprel döyüşləri zamanı ölüm-dirim savaşı meydanında 35 yaşında şəhidlik məqamına ucalıb. Ölümündən sonra 2016-cı ildə "Vətən uğrunda" medalı, 2025-ci ildə isə "Azərbaycanın Milli Qəhrəmanı" adına layiq görülüb.
Zəfər ORUCOÜLU
