- Yol Patrul Xidməti əməkdaşı tərəfindən saxlanılan minik avtomobilində oxlar üzrə ağırlıq kütləsinin düzgün paylanmadığı hansı texniki üsul və ölçmə vasitələri ilə müəyyən edilməlidir? Bu hal aşkarlandıqda polis əməkdaşı nəqliyyat vasitəsinin hərəkətdən kənarlaşdırılması və duracağa yerləşdirilməsi barədə qərarı hansı maddələrə əsasən qəbul edir?
Turan QƏNBƏRLİ,
Bakı şəhəri
- Minik avtomobilində oxlar üzrə ağırlıq kütləsinin düzgün paylanıb-paylanmaması nəqliyyat vasitəsinin xüsusi texniki vasitələrlə, yəni nəzarət məntəqəsində quraşdırılmış ölçmə avadanlıqları ilə, nəqliyyat vasitəsini idarə edən şəxsin iştirakı ilə ölçülür və nəticələr real vaxt rejimində mərkəzi informasiya sisteminə ötürülür. Bu texniki üsul və ölçmə vasitələri qanunvericilikdə xüsusi olaraq nəzərdə tutulmuşdur və yalnız müvafiq icra hakimiyyəti orqanının əməkdaşları tərəfindən tətbiq edilir. Əgər oxlar üzrə kütlənin normadan artıq olduğu aşkar edilərsə, Yol Patrul Xidməti əməkdaşı nəqliyyat vasitəsinin hərəkətdən kənarlaşdırılması və duracağa yerləşdirilməsi barədə qərarı İnzibati Xətalar Məcəlləsinin 96.1.7, 97.1 və 353.2-ci maddələrinə əsasən qəbul edir. Bu halda nəqliyyat vasitəsi müvəqqəti olaraq ən yaxın mühafizə olunan duracağa yerləşdirilir və inzibati protokol tərtib olunur. Praktikada bu, normadan artıq yük aşkarlandıqda, yükün boşaldılması və ya digər nəqliyyat vasitəsinə daşınması təmin edilənədək avtomobilin hərəkətinin məhdudlaşdırılması deməkdir. Müvafiq texniki üsul və ölçmə vasitələrinə dair tələblər dövlət standartları ilə müəyyən olunur.
- Bizim ailəyə məxsus olan yaşayış evi və torpaq sahəsi keçmişdə hər hansı rəsmi sənəd olmadan babama verilib. Necə deyərlər, kişi sözü möhür olub. Sonradan həmin ərazidə ev tikilib, mülkiyyət faktiki olaraq o zamandan bəri ailəmizin istifadəsində olub və kommunal xidmətlər atamın adına rəsmiləşdirilib. Qeyd edim ki, həmin ünvanda qeydiyyatımız mövcuddur. Lakin evin və torpaq sahəsinin mülkiyyət sənədi (çıxarış) yoxdur. Atamın vəfat etməsi ilə əlaqədar mən bu əmlakın mülkiyyət hüququnu rəsmiləşdirib çıxarış almaq istəyirəm. Bunun üçün hansı prosedurları həyata keçirməliyəm: hara müraciət etməliyəm, hansı sənədləri toplamalıyam?
Şamil KƏRİMOV,
Bakı şəhəri
- Bildiririk ki, daşınmaz əmlakın (yaşayış evi və torpaq sahəsi) mülkiyyət hüququ yalnız daşınmaz əmlakın dövlət reyestrində qeydiyyatla təsbit edilir və bu hüququn rəsmiləşdirilməsi üçün hüquqmüəyyənedici sənədlər tələb olunur. Əgər rəsmi mülkiyyət sənədi yoxdursa, vərəsə ilk növbədə, miras hüququnu təsdiq edən şəhadətnamə almalıdır. Bunun üçün vəfat etmiş şəxsin son qeydiyyatda olduğu yer üzrə notariusa müraciət edilməli, ölüm haqqında şəhadətnamə, ailə tərkibi və nikahı təsdiq edən sənədlər, həmçinin əmlakın faktiki istifadəsini və ailənin qeydiyyatını təsdiq edən arayışlar təqdim olunmalıdır. Əgər daşınmaz əmlakın hüquqmüəyyənedici sənədləri, ümumiyyətlə, yoxdursa və ya bərpası mümkün deyilsə, vərəsə məhkəməyə müraciət edərək əmlak üzərində faktiki sahiblik və istifadə faktının müəyyən edilməsini tələb edə bilər. Məhkəmə qərarı hüquqmüəyyənedici sənəd kimi çıxış edə bilər və bu qərar əsasında daşınmaz əmlakın dövlət reyestrində qeydiyyat aparılır və çıxarış verilir. Torpaq sahəsi və fərdi yaşayış evi üçün isə yerquruluşu işlərinin aparılması, torpaqayırma sənədlərinin hazırlanması və daşınmaz əmlakın dövlət reyestrindən çıxarış alınması üçün Əmlak Məsələləri Dövlət Xidmətinə ("ASAN xidmət" mərkəzi və ya müvafiq dövlət orqanı) müraciət edilməlidir. Burada vərəsəlik şəhadətnaməsi, məhkəmə qərarı (əgər hüquqmüəyyənedici sənəd yoxdursa), əmlakın planı və ölçüsü, şəxsiyyət vəsiqəsi və digər tələb olunan sənədlər təqdim olunmalıdır. Qısaca olaraq, ilkin mərhələdə notariusa vərəsəlik üçün, hüquqmüəyyənedici sənəd yoxdursa, məhkəməyə, daha sonra isə daşınmaz əmlakın dövlət reyestrində qeydiyyat üçün Əmlak Məsələləri Dövlət Xidmətinə müraciət edilməlidir.
Sualları cavablandırdı:
Fərhad NƏCƏFOV,
Azərbaycan Respublikası Vəkillər Kollegiyasının üzvü
