Olqa Sergeyevna Ukraynanın ən qaynar nöqtələrindən olan Xarkov şəhərindəndir. Xarici Dillər Universitetini bitirib. Gözəl mütəxəssisdir. Ukraynadakı vəziyyətlə bağlı onlayn işləyir. İngilis dilini tədris edir, müxtəlif tərcümələrlə məşğul olur.

Olqanın oğlu Eldar ikinci ildir ki, Azərbaycanda yaşayır. Slavyan Universitetinin Beynəlxalq əlaqələr fakültəsinin tələbəsidir. Rus dilində təhsil alır. Birinci kursu müvəffəqiyyətlə başa vurub.

Olqa deyir:

- Eldar 11-ci sinifdə oxuyarkən onu Azərbaycana, Tərtərdə yaşayan qohumlarımızın yanına gətirdim. Uzun yolu çox çətinliklə, bir neçə Avropa ölkəsindən, sonra isə Türkiyədən keçərək gəldik. Mən qayıtmalıydım, çünki Vətənimdə müharibə gedir və ailəmizin qalan üzvləri orada idilər. İlk dəfəydi ki, oğlum Eldardan ayrılırdım, ancaq narahat deyildim. Əmin idim ki, ona burada kömək edəcəklər.

Eldar 11-ci sinfi onlayn olaraq Azərbaycanda bitirib və Slavyan Universitetinə qəbul olunub. Bir il ərzində o, xeyli dəyişib. Ona Slavyan Universitetinin yataqxanasında yer veriblər.

Tətil olan kimi Tərtərə gəlməyə can atır. Həm Bakını, həm də Tərtəri çox sevir. Təbii ki, Vətənində gedən prosesləri də diqqətlə izləyir və doğma şəhərinə qayıdacağı günü səbirsizliklə gözləyir.

Olqa söhbətinə davam edir:

- Mən milliyyətcə ukraynalıyam. Xarkov vilayətində yaşayanların əksəriyyəti kimi, bizim də ailəmiz rusdillidir. Biz rus dilində təhsil almışıq. Azərbaycandakı tolerantlıq mühiti bizi valeh edir. Burada hətta rus dilində məktəblər fəaliyyət göstərir. Bu, inanılmazdır, gözəldir!

Ukraynalı qadından öyrəndik ki, onun qayınatası Mamed Bağırov 1947-ci ildə Tərtərdə doğulub. Lakin atasını erkən itirdiyi üçün sonradan Xarkov şəhərində yaşayan baba-nənəsinin himayəsində böyüyüb və bu şəhərdə də yaşayıb. Mamed Bağırovun anasının ailəsi isə Böyük Vətən müharibəsi illərində alman faşistlərinin vəhşiliklərindən qaçaraq Tərtərdə yaşayıblar.

Olqa ölkəmizdə gördüyü, şahidi olduğu, eyni zamanda məmnun qaldığı reallıqları da yüksək qiymətləndirir:

- Ailəmizdə həmişə Azərbaycan və azərbaycanlılar haqqında yaxşı söhbətlər eşitmişəm. İndi isə bunu öz gözlərimlə görürəm. İnsanlarınız çox xeyirxahdırlar. Bu həm dövlətinizin siyasətindən irəli gəlir, həm də görünür, xalqın milli-mənəvi dəyərlərindən qaynaqlanan gözəl xüsusiyyətdir.

Olqa xanım bildirdi ki, Ukraynada Azərbaycanın onların ölkəsinə göstərdiyi humanitar yardımları da yüksək dəyərləndirirlər. Ukrayna xalqı indi çətin günlərini yaşayır. Bir tərəfdən müharibə, digər tərəfdən qiymətlərin artması, məktəblərin, universitetlərin onlayn fəaliyyət göstərməsi insanlara problem yaradır.

- Azərbaycanda isə vəziyyət çox yaxşıdır, - deyir Olqa. - İnsanlar xoşbəxtdirlər. Müharibə başa çatıb. Keçmiş məcburi köçkünlər artıq doğma yerlərinə dönür, dövlətin dəstəyi ilə Qarabağı yenidən qurur, sönmüş ocaqlarını yandırırlar. Bazarlarınız da gözəldir. Biz cənub meyvələrini sevirik. Xüsusilə həmişə əncirin yetişməsini gözləmişik.

Bir azdan ana kiçik oğlu ilə yenidən Xarkova qayıdacaq. Eldar isə Bakıda qalıb təhsilini davam etdirəcək. O, gələcək peşəsini çox sevir. Arzusu isə Heydər Əliyev aeroportu kimi möhtəşəm bir hava limanında işləməkdir. Deyir ki, gün gələcək, sülh olacaq, onun ölkəsindən də hərbi yox, mülki təyyarələr havaya qalxacaq.

 

Lazım QULİYEV,

"Azərbaycan"