Oktyabrın sonlarında Azərbaycanla Gürcüstan arasında baş tutan iqtisadi əməkdaşlıq üzrə Hökumətlərarası Komissiyanın 11-ci iclası iki ölkənin praqmatik tərəfdaşlığa sadiqliyini nümayiş etdirdi. Bu zirvə təkcə ikitərəfli iqtisadi platforma kimi deyil, həmçinin regional nəqliyyat və enerji sahəsində gələcək prioritetləri müəyyənləşdirən mühüm tədbir kimi rol oynadı.
Beynəlxalq Münasibətlərin Təhlili və Multikulturalizm Mərkəzinin aparıcı məsləhətçisi Nəsibə MİRZƏYEVA qəzetimizə açıqlamasında qeyd etdi ki, Azərbaycan Gürcüstanın ən böyük ticarət və investisiya tərəfdaşlarından biri kimi ölkənin makroiqtisadi sabitliyində mühüm paya sahibdir. Statistik göstəricilərə əsasən, bu ilin ilk 9 ayında iki ölkə arasında ticarət dövriyyəsi 14,1 faiz artaraq, ümumilikdə, 1 milyard 109 milyon ABŞ dollarına çatıb. Bu gün Gürcüstanın ümumi ticarətində Azərbaycanın payı 5,4 faiz təşkil etməklə, tərəfdaş ölkələrin reytinqində 5-ci yerdə qərarlaşıb. İxrac sahəsində həcm 6,9 faiz artaraq 566 milyon 665 min dollara çatıb. Bununla da Azərbaycan Gürcüstan üçün ixracatçı ölkələr arasında Qırğızıstan və Çindən sonra üçüncü yeri tutub. "Azərbaycanın Gürcüstana yatırdığı investisiyaların ümumi həcmi isə 4 milyard ABŞ dollarına yaxındır. 2025-ci ildəki 214 milyon dollarlıq sərmayə ilə Azərbaycan Böyük Britaniyadan sonra Gürcüstanın ikinci ən böyük sərmayədar ölkəsi olub. Turizm və pul köçürmələrində də müsbət dinamika müşahidə edilir. May ayından Bakı-Tbilisi qatarının bərpası və hava əlaqələri sayəsində 9 ayda 13,1 faiz artımla Azərbaycan Gürcüstana ən çox turist göndərən 5-ci ölkədir", - deyə o əlavə etdi.
N.Mirzəyeva dedi ki, iclasın əsas müzakirə mövzularından biri də nəqliyyat-tranzit sahəsində əməkdaşlıq məsələləri idi. Bu gün "Şərq-Qərb" nəqliyyat qovşağının operativliyinin artırılması istiqamətində Bakı-Tbilisi-Qars dəmir yolunun keçid qabiliyyəti 5 milyon tona çatdırılıb. Həmçinin Gürcüstanın icra etdiyi "Şərq-Qərb" magistralı dəmir yollarının müasirləşdirilməsi, Anakliya dərinözüllü dəniz limanı və Tbilisinin yeni hava limanı layihələri bu infrasturukturu tamamlayır.
Ekspert vurğuladı ki, iclasın ən mühüm nəticələrindən bir də İpək yolu birgə beynəlxalq avtomobil buraxılış məntəqəsinin fəaliyyətə başlaması haqqında sazişin imzalanması olub: "İclas çərçivəsində tərəflər, həmçinin dövlət sərhədinin delimitasiyası və demarkasiyası prosesini də müzakirə ediblər. İrakli Kobaxidzenin bəyan etdiyi kimi, razılaşdırılmamış məsələlərin dostluq müstəvisində və sürətləndirilmiş tempdə davam etdirilməsi qərarı alınıb. Sərhəd delimitasiyası üzrə 15 razılaşdırılmamış hissənin müzakirəsi ilə bağlı məsələ iclasın diqqətçəkən diplomatik nəticəsi hesab oluna bilər. Sərhəd məsələlərində konstruktiv dialoqun bərpası, qarşılıqlı olaraq ərazi bütövlüyünün dəstəklənməsi və mədəni-humanitar sahədə atılan addımlar iki ölkə arasındakı strateji tərəfdaşlığın sarsılmazlığını təsdiq edir".
N.Mirzəyeva bildirdi ki, Azərbaycanın Gürcüstanın əsas təbii qaz tədarükçüsü olması onun daxili enerji bazarının sabitliyini təmin edir. Şərq-Qərb dəhlizi üzərindən artan yükdaşımaları da öz növbəsində Gürcüstana mühüm tranzit və logistika gəlirləri gətirəcək. İkitərəfli ticarətdə müsbət saldo xarici ticarət balansına da yaxşı təsir göstərir. Avtomobil reixracı ilə yanaşı, qida, tikinti materialları, dərman məhsullarının ixracındakı artım da bu sahənin şaxələnməsinə kömək edir.
Ümumilikdə 11-ci hökumətlərarası komissiyanın yekununda əldə olunmuş razılaşmalar Bakı və Tbilisi arasında iqtisadi əlaqələrin təkcə ticarətlə məhdudlaşmadığını, həm də qlobal logistika və enerji zəncirində əvəzedilməz regional oxa çevrildiyini nümayiş etdirir.
Əsmər QARDAŞXANOVA,
"Azərbaycan"
314444444 - Copyjpg_1793831795.jpg)
