"Azərbaycan-ABŞ münasibətləri qarşılıqlı maraqlara əsaslanan strateji tərəfdaşlıq xarakteri daşıyır"

ABŞ və Azərbaycan arasında əməkdaşlıq siyasi, iqtisadi, enerji, təhlükəsizlik, nəqliyyat və humanitar sahələri əhatə edir. İqtisadi sahədə ABŞ Azərbaycanın əsas investisiya tərəfdaşlarından biridir. Amerika şirkətləri xüsusilə enerji sektorunda Azərbaycanda iri layihələrin həyata keçirilməsində iştirak edirlər.

Milli Məclisin deputatı Pərvanə VƏLİYEVA qəzetimizə açıqlamasında deyib ki, iki ölkə arasında enerji təhlükəsizliyi, regional sabitlik, nəqliyyat-kommunikasiya əlaqələri və iqtisadi əməkdaşlıq istiqamətləri son dövrlər münasibətlərin əsas gündəmini təşkil edir: "ABŞ və Azərbaycan arasında münasibətlər qarşılıqlı maraqlara əsaslanan strateji tərəfdaşlıq xarakteri daşıyır və hər iki ölkə əməkdaşlığın müxtəlif sahələrdə genişləndirilməsində maraqlıdır. İlin əvvəlində ABŞ-nin Vitse-prezidenti Cey. Di. Vensin Azərbaycana səfəri Vaşinqtonun Bakı ilə əməkdaşlığı dərinləşdirmək niyyətini nümayiş etdirdi. ABŞ və Azərbaycan arasında imzalanmış xartiya üç əsas istiqamət üzrə uzunmüddətli əməkdaşlıq çərçivəsi yaradır: enerji və regional bağlantı, iqtisadi investisiyalar və təhlükəsizlik əməkdaşlığı. Xartiyanın həyata keçirilməsinin infrastrukturun inkişafını sürətləndirəcəyi, enerji yatırımlarını genişləndirəcəyi və qarşılıqlı faydalı iqtisadi əməkdaşlığı təşviq edəcəyi gözlənilir ki, bu da hər iki ölkənin vətəndaşları üçün yeni iş yerlərinin yaradılması və biznes imkanları vasitəsilə rifahın artmasına xidmət edəcək". 

Deputat xatırladıb ki, Prezident İlham Əliyev həmçinin bu il enerji, nəqliyyat, texnologiya və qida sektorlarını təmsil edən ABŞ Ticarət Palatasının nümayəndə heyətini qəbul edib: "ABŞ və Azərbaycan arasında keçirilən görüşlərdə regional bağlantı məsələsi xüsusi yer tutub. Müzakirələr Beynəlxalq Sülh və Rifah naminə Tramp Marşrutunun fəaliyyətə hazırlanması istiqamətində növbəti addımları əhatə edib. Bu marşrut Azərbaycanın əsas hissəsi ilə Naxçıvan Muxtar Respublikası arasında maneəsiz, çoxmodallı bağlantı təmin edəcək. Layihənin məqsədi Avrasiya boyunca dəmir yollarını, avtomobil yollarını, boru kəmərlərini, elektrik ötürmə xətlərini və rəqəmsal infrastrukturu birləşdirərək Cənubi Qafqazı Trans-Xəzər Nəqliyyat Marşrutu (Orta dəhliz) boyunca ticarət və investisiya habına çevirməkdir".

P.Vəliyeva qeyd edib ki, gücləndirilmiş strateji tərəfdaşlıq Azərbaycanı ABŞ üçün əsas regional tərəfdaş səviyyəsinə yüksəldib. O əlavə edib ki, Prezident İlham Əliyevin Donald Trampa 80 illiyi münasibətilə ünvanladığı məktub da Bakı və Vaşinqton əlaqələrinin həm də iki ölkə liderinin şəxsi münasibətləri sayəsində inkişafından xəbər verir. Dövlətimizin başçısı Azərbaycan və ABŞ arasında strateji tərəfdaşlığın təşəkkülündə və dərinləşməsində D.Trampın əvəzsiz xidmətləri olduğunu qeyd edib. Eyni zamanda ötən ilin avqustunda Ağ Evdəki tarixi görüşü xatırladaraq bildirib ki, görüş zamanı əsası qoyulmuş Strateji Tərəfdaşlıq Xartiyasının 6 ay sonra ABŞ-nin Vitse-prezidenti Cey. Di. Vensin ölkəmizə səfəri çərçivəsində imzalanması Azərbaycan-ABŞ əlaqələrini keyfiyyətcə yeni pilləyə qaldırıb. "İki ölkə arasında həm prezidentlər səviyyəsində təmaslar, həm də rəsmi şəxslərin səfərləri Azərbaycan və Amerika münasibətlərinin yeni mərhələdə yüksələn xətlə inkişaf etdiyini bir daha göstərir", - deyə P.Vəliyeva bildirib. 

Əsmər QARDAŞXANOVA,

"Azərbaycan"