Aprel döyüşləri ilə başlayan Zəfər yürüşü

Azərbaycan Ordusunun möhtəşəm zəfəri ilə nəticələnən Aprel döyüşlərindən 10 il ötür. 2016-cı ilin aprelin 1-dən 2-nə keçən gecə başlayan və 4 gün davam edən döyüşlər Azərbaycan ordusunun gücünün təntənəsi oldu. Bu döyüşlər göstərdi ki, respublikamız hər an torpaqlarını güc yolu ilə işğaldan azad etməyə qadirdir. 

Qeyd edək ki, həmin vaxt Ermənistanın cəbhə xəttində başlatdığı hərbi təxribat atəşkəs dövründə miqyasına və qoşun növlərinin iştirakına görə ən böyük hücum idi. Düşmən ön mövqelərimizi və yaşayış məntəqələrimizi intensiv artilleriya atəşinə tutmuşdu. Azərbaycan Müdafiə Nazirliyinin 2016-cı il aprelin 2-də yaydığı məlumatda deyilir: «Hərbi cəhətdən iflasa uğrayan Ermənistan kriminal rejimi son vaxtlar cəbhədəki uğursuzluqlarının, canlı qüvvə və döyüş texnikası sarıdan xeyli itkisinin əvəzini çıxmaq məqsədilə növbəti dəfə təxribat törətməyə çalışıb. 

Aprelin 2-nə keçən gecə bütün cəbhəboyu mövqelərimiz iriçaplı silahlar, minaatanlar, qumbaraatan və artilleriya qurğularından intensiv atəşə tutulub. Eyni vaxtda qoşunların təmas xəttinə yaxın mülki əhalinin kompakt yaşadığı bir sıra yaşayış məntəqələri də düşmən atəşinə məruz qalıb. Qarşı tərəfin hərbi aktivliyini genişləndirməyə imkan verməmək, onun fəaliyyətinin qarşısını almaq məqsədilə Silahlı Qüvvələrimizin komandanlığı tərəfindən əməliyyat şəraiti qiymətləndirilərək dərhal cavab tədbirlərinin görülməsi üçün qərar verilib».

Həmin vaxt cəbhənin ən gərgin Ağdərə-Tərtər-Ağdam və Xocavənd-Füzuli istiqamətində yerləşən birliklər, artilleriya bölmələri və digər qoşun növlərinin birgə, əlaqəli fəaliyyəti nəticəsində qısa müddətdə Ermənistan silahlı bölmələrinə qarşı cavab tədbirləri həyata keçirilir.

Qısa müddətdə Tərtər rayonunun Talış kəndi ətrafındakı yüksəkliklər, Cəbrayıl rayonunun Lələtəpə yüksəkliyi, Cocuq Mərcanlı, Goranboy rayonunun Gülüstan kəndi və Tərtər rayonunun Madagiz kəndi istiqamətində bəzi mövqelər düşməndən azad olundu. 

Döyüşlərin ilk günü düşmən ciddi itkilər vermişdi. Bu məğlubiyyət düşməni hərbi əməliyyata başlamasına – yenidən hücuma keçməsinə sövq etmişdi. Aprelin 4- Ağdərə-Tərtər və Xocavənd-Füzuli istiqamətlərində mövqelərimizə yenidən hücum edən düşmən bu dəfə də ağır məğlubiyyətə uğradıldı. Düşmənin strateji baxımdan əhəmiyyətli Madagiz məntəqəsindəki hərbi bazasının qərargahı darmadağın edildi, döyüşə gələn erməni könüllülərinin olduğu avtobus məhv olundu.

Ermənistan silahlı qüvvələrinin Ağdərə və digər yaşayış məntəqələrindən hərəkə-tə gətirmək istədiyi ehtiyat qüvvələri də sıradan çıxarıldı. Goranboy rayonuna və Naftalan şəhərinə təhlükə yarada biləcək Talış məntəqəsi ətrafındakı, Horadiz şəhəri və Araz çayı boyu Cəbrayıl rayonunun bəzi kəndlərinin düşmən təhlükəsindən qorunmasına imkan verən Lələtəpə yüksəkliyi ətrafındakı strateji ərazilər düşməndən azad edildi. Cəbrayılın Cocuq Mərcanlı, Goranboy rayonunun Gülüstan kəndi, Tərtər rayonunun Madagiz kəndi istiqamətində yollar düşməndən təmizləndi, ümumilikdə 2000 hektarlıq ərazi azad edildi, daha çox ərazi isə nəzarətə götürüldü.

Ermənistan silahlı qüvvələri Aprel döyüşlərində böyük itkilər verdi. Düşmənin 320-dən artıq canlı qüvvəsi məhv edildi, 500-dən artıq erməni hərbi qulluqçusu yaralandı. Habelə düşmənin 30-dək tankı, zirehli texnikası, 25-dən artıq artilleriya qurğusu sıradan çıxarıldı.

2016-cı ilin Aprel döyüşləri Azərbaycan Ordusunun Horadiz əməliyyatından sonra növbəti uğurlu döyüş əməliyyatı oldu. Xalq-dövlət-ordu həmrəyliyinin təntənəsinə çevrilən Aprel qələbəsi, eyni zamanda Azərbaycan əsgərinin peşəkarlığının, ordumuzun qüdrətinin və Vətən övladlarının misilsiz şücaətinin ifadəsi kimi tarixləşdi.

Aprel döyüşləri torpaqlarımızın işğaldan azad edilməsi uğrunda Zəfərə gedən yolun əsasını qoydu və təcrübə baxımında ordumuz üçün ciddi sınaq oldu. Aprel döyüşləri ilə başlayan Zəfər yürüşü 2020-ci ilin 44 günlük Vətən müharibəsində torpaqlarımızın işğaldan azad edilməsi və 2023-cü ilin antiterror əməliyyatlarında erməni separatizminə son qoyulması ilə nəticələndi.

Səbinə XASAYEVA,

Milli Məclisin deputatı