Azərbaycan Respublikası həssas və mürəkkəb geosiyasi məkanda yerləşməsinə baxmayaraq, uğurlu təhlükəsizlik siyasəti sayəsində dünyada çox yüksək sabitlik reytinqinə malikdir. Prezident İlham Əliyevin dediyi kimi, təhlükəsizlik, sabitlik məsələləri hər hansı bir ölkənin gündəliyində heç vaxt olmadığı qədər birnömrəli məsələ kimi qalmalıdır. Çünki bu olmadan bütün başqa səylər mənasızdır.
"Global Terrorism Index 2026" (GTI) hesabatı ilə dövlətlərin terror təhlükəsinə görə növbəti reytinq sıralanması təqdim edilib. Hesabatda Azərbaycan daha da irəliləyərək dünyanın ən təhlükəsiz ölkələri sırasında yer alıb. Belə ki, ötən il terror təhlükəsi üzrə "0.233" indekslə 90-cı pillədə qərarlaşan ölkəmiz 2026-cı ildə üç pillə yüksələrək "0.123" indekslə 93-cü yerə yüksəlib. Bu göstərici Azərbaycanın terror təhlükəsi baxımından qlobal miqyasda ən təhlükəsiz ölkələrdən biri olduğunu bir daha təsdiqləyir.
Bu reytinq sıralanması indeksləri terror hadisələri, ölümlər, ağır nəticələr, girovlar, terrorçuluqla mübarizə, terrorçuluğun araşdırılması effektivliyi və digər çoxsaylı göstəricilər üzrə hesablamalara əsaslanır.
Bu reytinq dövlətimizin həyata keçirdiyi təhlükəsizlik və sabitlik siyasətinin, hüquq-mühafizə orqanlarının peşəkar fəaliyyətinin real göstəricisidir. Xüsusilə nəzərə almaq lazımdır ki, Azərbaycan kifayət qədər mürəkkəb geosiyasi bölgədə yerləşir. Regionda illərlə davam edən münaqişələr, sərhəd təhlükələri, radikal qruplaşmaların müxtəlif coğrafiyalarda fəallaşması fonunda ölkəmizdə sabitliyin qorunması heç də sadə məsələ deyil.
Qeyd edək ki, inkişaf etmiş dövlətlər belə, terror təhlükəsi baxımından Azərbaycandan geridədirlər. Bu, sözsüz ki, Azərbaycanın təhlükəsizlik siyasətinin effektivliyini daha aydın şəkildə ortaya qoyur. Eyni zamanda görünən odur ki, ölkəmiz Cənubi Qafqaz regionunda təhlükəsizlik baxımından da liderdir. Bu həm də mövcud ictimai-siyasi sabitlikdən xəbər verir.
Digər mühüm məqam isə Vətən müharibəsində Zəfər və sonrakı antiterror tədbirləri ilə bağlıdır. Azərbaycanın öz suverenliyini tam təmin etməsi, bölgədə qanunsuz silahlı birləşmələrin zərərsizləşdirilməsi, dövlət nəzarətinin bütün ərazilərdə bərpa olunması ölkəmizdə təhlükəsizlik mühitinin daha da möhkəmlənməsinə ciddi töhfə verib. Bütün bu faktorlar da reytinqdə yüksəlişin əsas səbəblərindən biri kimi qiymətləndirilir.
Bu gün dünyanın müxtəlif regionlarında müharibələr, silahlı toqquşmalar, terror təhdidləri və qeyri-sabitlik ocaqları genişlənməkdədir. Belə bir vəziyyətdə Azərbaycanın sabitlik adası kimi seçilməsi dövlətimizin böyük uğurudur. "Global Terrorism Index 2026" hesabatı isə bu uğurun beynəlxalq səviyyədə təsdiqidir.
Təhminə VERDİYEVA,
"Azərbaycan"
jpg-1707830314 - Copyjpg_1775164685.jpg)
