Yanvarın 29-da keçiriləcək bələdiyyə seçkiləri ilə əlaqədar dairə və məntəqə seçki komissiyalarının bütün üzvlərinin iştirakı ilə hazırlığın artırılması, seçki sahəsində bilik, bacarıq və işgüzar vərdişlərin təkmilləşdirilməsi, xüsusilə protokolların düzgün doldurulması istiqamətində 27 saylı Sabunçu dairə ikinci seçki komissiyasında treninq təşkil olunub.
AZƏRTAC xəbər verir ki, treninqdə çıxış edən 27 saylı Sabunçu dairə ikinci seçki komissiyasının sədri Nadir Əjdərov ümumilikdə 38 seçki məntəqəsinin fəaliyyət göstərdiyini bildirib. Qeyd edib ki, bu məntəqələrdə qeydiyyatda olan seçicilərin ümumi sayı 53 min 105 nəfərdir.
N.Əjdərov diqqətə çatdırıb ki, seçkilərə hazırlıq prosesi çərçivəsində seçki məntəqələrinin təşkili, seçki siyahılarının dəqiqləşdirilməsi və seçicilərə bildirişlərin paylanması işləri artıq sona çatmaq üzrədir: “Seçki məntəqəsi və komissiya üzvlərinin maarifləndirilməsi məqsədilə seminarlar keçirilir. Hazırda üçüncü dəfədir ki, bununla bağlı seminar keçirilir. Bu seminarların əsas məqsədi komissiya üzvlərinin biliklərini təkmilləşdirmək və seçki günü ilə bağlı vacib prosedurları təkrar nəzərdən keçirməkdir”.
Sədr seçki statistikası və ilk dəfə səs verənlərlə bağlı məsələlərə də toxunub: “Sabunçu rayonu üzrə 27 saylı seçki dairəsində üzrə ilk dəfə səs verəcək seçicilərin sayı 239 nəfərdir. Ümumilikdə seçici yaş qrupları arasında 80 yaş və yuxarı şəxslərin sayı 145 nəfər təşkil edir. Dairə üzrə 12 seçki məntəqəsi seçki prosesinə tam hazırdır. Yaxın günlərdə seçki ilə bağlı son sənədlərin hazırlanması və paylanması prosesi başa çatdırılacaq. Sabunçu rayonu üzrə seçkilərə hazırlıq işləri planlı şəkildə həyata keçirilir və hərtərəfli maarifləndirmə tədbirləri davam etdirilir. Seçkiyə hazırlığın başa çatması ilə əlaqədar yüksək iştirak gözlənilir”.
Qeyd edək ki, MSK tərəfindən təsdiq olunan “Təqvim Planı”na uyğun olaraq dairə və məntəqə seçki komissiyalarının bütün üzvlərinin iştirakı ilə onların hazırlığının artırılması, seçki sahəsində bilik, bacarıq və işgüzar vərdişlərinin təkmilləşdirilməsi, xüsusilə protokolların düzgün doldurulması istiqamətində DSK-nın inzibati binasında treninqlərin keçirilməsi davam etdirilir.
jpg_1737560682.jpg)
jpg_1737548467.jpg)
