Gün eynəklərini seçərkən keyfiyyətinə diqqət yetirilməlidir
Yay mövsümü ilə əlaqədar ticarət obyektlərində gün eynəklərinin satışı artır. Günəş şüalarının gözlərimizə təsirini aradan qaldırmaq üçün əksəriyyətimiz həmin eynəklərdən istifadə edirik.
Baxmayaraq ki, mütəxəssislər açıq satışda olan bu cür ucuz eynəklərin zərərləri barədə həmişə həyəcan təbili çalırlar. Paytaxtımızda hər addımbaşı eynək satılan məkanlara rast gəlirik. İnsan orqanizminin ən zərif orqanı olan gözün mühafizəsi üçün istifadə edilən eynəklərin necə gəldi satılması isə ciddi təhlükə yaradır. Eynəkləri seçərkən adamlar əsasən onun formasına və rənginə diqqət yetirirlər. Rahatlıq və sağlamlıq isə ikinci plana keçir. Bu isə gözə ciddi zərər verir.
Saxta eynəklər gözləri zəiflədir
Mövsümə uyğun gün eynəkləri dəbdə olan aksesuara çevrilib. Eynəkdən istifadə edənlərin sayının artmasını nəzərə alıb mövzu ilə bağlı mütəxəssislərin rəyini aldıq. Eyni zamanda eynək alıcılarının fikirlərini öyrəndik. Bəziləri eynəkləri optik mağazalardan, bəziləri isə səyyar satış yerlərindən aldığını dedi. Onların sözlərinə görə, insanlar gün eynəyi seçərkən əsasən ona yaraşıb-yaraşmadığına görə diqqət edirlər. Yəni güzgüyə baxıb, bəyəndiklərini alırlar.
Şəhər sakini Namiq Əliyev eynək alarkən daha çox görünüşə önəm verdiyini deyir: "Bu yaxınlarda eynək almışam. Əlbəttə ki, keyfiyyətli eynəyi seçmək məni yetərincə narahat edirdi. Ümumiyyətlə, eynək alanda həm keyfiyyəti, həm də görünüşü nəzərə alınmalıdır. Çünki bəzən eynək taxanlara münasibət birmənalı olmur, buna görə də formasına daha çox üstünlük verilir".
Digər bir şəhər sakini Aytən Fətullayeva isə eynək alarkən həkim məsləhətinin vacib olduğunu vurğulayır: "Eynək aldığım zaman təbii ki, birinci şüşənin keyfiyyətini soruşuram. Bunu öyrənməyin ən yaxşı yolu da həkimin məsləhət görməsidir. Şüşəsinin keyfiyyətli olması və markası mənim üçün böyük əhəmiyyət kəsb edir".
"Azad İstehlakçılar Birliyi"nin sədri Eyyub Hüseynov hazırda Azərbaycanda satışda olan gün eynəklərinin əksəriyyətinin keyfiyyətsiz olduğunu bildirdi. Onun sözlərinə görə, gün eynəkləri görmənin zəifləməsinə səbəb ola bilir: "Əslində, gün eynəkləri həkim göstərişi ilə yazılmalıdır. Keyfiyyətsiz eynəklər gözün zəifləməsinə səbəb olur. Ən keyfiyyətsiz eynək ən bahalı mağazalarda da satıla bilər. İnkişaf etmiş ölkələrdə gözlük satışa çıxarılmazdan öncə bir neçə qurum tərəfindən yoxlanılır. İstifadəyə yararlıdırsa, ona sertifikat verilir. Eynəklər əmtəə bazarına daxil olmadan sertifikatlaşmalı və yoxlanılmalıdır. Əsl firma eynəklərinin yanında xüsusi kağız testlər olmalıdır. Eynəyin üzərində polaroid yazılıbsa, həmin testə baxdıqda adi gözlə görünməyənləri görə bilirsən. Satışda çox ucuz, keyfiyyətsiz eynəklər var. Bu da kütləvi korlaşma yaradır. Kim necə və haradan istəyir, mənşəyi məlum olmayan eynəkləri gətirib satır".
E.Hüseynov xatırlatdı ki, məhsulun brend olması hələ onun keyfiyyətli olması demək deyil: "Bahalı mağazalarda müəyyən standartlara əsasən hazırlanan eynəklər satılır. Lakin kim zəmanət verə bilər ki, hansı eynək hansı problemdən əziyyət çəkən göz üçün məsləhətlidir. Sadəcə, istehlakçı brend olduğu üçün bu məhsulu alır. Ümumiyyətlə, tövsiyə edilir ki, gün eynəklərindən uzaq olun, onlar gözləri kor edirlər".
Eynəklər ixtisaslaşmış mağazalardan alınmalıdır
Keyfiyyətsiz eynəklər gözün bülluruna pis təsir edir, gələcəkdə kataraktanın yaranmasına gətirib çıxarır, insanda yorğunluğa yol açır. Görmə qabiliyyətində problemlər varsa, göz həkiminə müraciət etmək lazımdır və ondan düzgün diopteriyalı gün eynəyi seçməkdə kömək istəyin. Eynək gözə düşməyəndə ilkin olaraq gözün qızarması, sulanması, quruması kimi mənfi əlamətlərlə özünü biruzə verir. Nəticədə gözə ağırlıq düşür. Eynəyin rəngi tünd olanda isə göz bəbəyi genəlir və gözün dibinə düşən işıq sahəsi artır. Bu da qıcıqlanmaya, iltihaba səbəb olur. Sonrakı prosesdə göz bülluru bulanır və görmə zəifləyir. Yaşa dolduqca keyfiyyətsiz gün eynəklərinin fəsadları daha qabarıq üzə çıxır və görmə üçün problemlər yaradır. Ona görə də eynəklərin ixtisaslaşmış mağazalardan alınması daha məsləhətlidir. Əgər qeyd olunan problemlərlə rastlaşmaq istəmirsinizsə, küçədə, antisanitar şəraitdə satılan, mənşəyi məlum olmayan eynəkləri almayın. Ucuz qiymətə satılan eynəklərin şüşələrində şəffaflıq zəif olduğundan göz obyekti yaxşı fokuslaya bilmir.
Azərbaycan Tibb Universitetinin Oftalmologiya kafedrasının dosenti Rəhman Allahverdiyev deyir ki, eynək geyinmək həkimlərin göstərişi və diaqnozu ilə olmalıdır: "Günəşin ultrabənövşəyi şüaları gözün strukturlarına zədələyici təsir göstərir. Ona görə də günəş şüalarından qorunmaq üçün xüsusi ultrabənövşəyi şüaları udan eynəklər təyin olunur. Bu şüalar udulmasa gözün strukturlarına, xüsusilə torlu qişaya zədələyici təsir edir. Bu da gələcəkdə tor qişanın ağır patologiyasına gətirib çıxarır. Vətəndaşlar küçədə satılan eynəkləri alırlar. Onların da çoxu keyfiyyətsiz olur. Buna görə məsləhətli yerlərdən eynəklər alınmalıdır. Bu eynəklərin şüşələri etibarlıdır. Onların üzərində sənədi olur".
Diqqət edilməli məqamlar
Keyfiyyətli eynəklə yanaşı, yüksək ixtisaslaşmış, peşəkar optika işçilərinin məsləhətləri də vacibdir. Onlar sizin üz quruluşunuza, refraksiyanıza, şikayətlərinizə uyğun məsləhətlər verəcəklər ki, bu da düzgün eynək seçimində çox böyük əhəmiyyət kəsb edir. Eyni zamanda eynəyin keyfiyyət sənədinə və etiketinə diqqət yetirmək lazımdır. Nəzərə alın ki, gün eynəklərinin etiketində ultrabənövşəyi şüaların hansı qisminin buraxılmaması göstərilməlidir. Eynəyin təlimatında linzanın günəş şüalarını hansı dərəcədə - zəif, orta və ya güclü udduğu da qeyd olunmalıdır. Xəstəlik mənbəyi olan keyfiyyətsiz eynəkləri, - "ucuzdur" deyə almayın. Sonradan həyatınızın ən qiymətli neməti olan gözlərinizdən məhrum ola bilərsiz.
Elşən YƏHYAYEV,
"Azərbaycan"
677jpg_1781134810.jpg)
