20 oktyabr tariximizin şanlı səhifələrindən biri, Zəngilan şəhərinin işğaldan azad olunduğu gündür. Cənab Prezident İlham Əliyevin 31 iyul 2023-cü il tarixli Sərəncamına əsasən bu tarix rəsmi olaraq Zəngilan Şəhəri Günü kimi qeyd olunur. 20 oktyabrın Zəngilan şəhəri günü kimi müəyyən olunması Zəngilanın tarixi, mədəni və strateji əhəmiyyətinə verilən yüksək dəyərin göstəricisidir.
Bu fikirləri Milli Məclisin deputatı Fatma Yıldırım deyib. Deputat bildirib ki, 2020-ci ilin 20 oktyabrında Müzəffər Ali Baş Komandan cənab İlham Əliyevin rəhbərliyi ilə Rəşadətli Azərbaycan Ordusu Zəngilan rayonunu düşmən işğalından azad etdi. Bu, yalnız hərbi qələbə deyildi. Bu, həm də tarixi ədalətin bərpası, xalqımızın əzminin və birliyinin təntənəsi idi. Zəngilanın azad olunması ilə Azərbaycan-İran sərhədində 132 kilometrlik ərazi üzərində tam nəzarət bərpa olundu və bu strateji uğurla Vətən müharibəsinin gedişində yeni mərhələ başlandı. Zəngilanın azad olunmasında şücaət göstərmiş 6974 hərbi qulluqçunun “Zəngilanın azad olunmasına görə” medalı ilə təltif olunması isə dövlətimizin qəhrəman övladlarına olan yüksək ehtiramının bariz nümunəsidir.
Millət vəkilinin sözlərinə görə, bu gün biz artıq Zəngilanı Böyük Qayıdışın önündə gedən bir rəmz kimi tanıyırıq. Məhz burada Ağalı kəndində ilk “Ağıllı kənd” layihəsi həyata keçirildi. 200 ailəlik bu müasir kənddə ekoloji cəhətdən təmiz enerji sistemləri, yüksək sürətli internet, qabaqcıl sosial xidmətlər və tam dayanıqlı yaşayış infrastrukturu təmin olunub. Burada məskunlaşan ailələr peşə və bacarıqlarına uyğun işlə təmin edilir, dövlət tərəfindən onların rifahı üçün hərtərəfli dəstək göstərilir.
Eyni zamanda, Zəngilan bu gün mühüm nəqliyyat və logistika qovşağı kimi də ölkəmizin gələcəyinə xidmət edir. Zəngilan Beynəlxalq Hava Limanı artıq fəaliyyətə başlayıb, Horadiz-Zəngilan-Ağbənd dəmir yolu, Zəngilan-Horadiz avtomobil yolu isə regionun iqtisadi inkişafını sürətləndirəcək əsas layihələrdəndir. Bu nəqliyyat arteriyaları ölkəmizi Naxçıvanla, oradan isə türk dünyası ilə birləşdirən Zəngəzur dəhlizinin gerçəkləşməsində mühüm rol oynayır.
Fatma Yıldırım qeyd edib ki, Zəngilanda mədəni irsin bərpası da diqqət mərkəzindədir. İşğal zamanı dağıdılmış və təhqir olunmuş Zəngilan şəhər məscidi Heydər Əliyev Fondunun dəstəyi ilə bərpa olunmuş, orijinal memarlıq üslubu qorunaraq yenidən ibadətə açılmışdır.
Bundan əlavə, turizm potensialı da sürətlə inkişaf etdirilir. 2024-cü il mayın 18-də istifadəyə verilmiş “Ağalı” hoteli bölgəyə yeni nəfəs gətirir və Zəngilanın ekoturizm mərkəzinə çevrilməsi istiqamətində atılmış mühüm addımlardandır.
Deputat bildirib ki, Zəngilan bu gün təkcə azad olunmuş bir rayon deyil. O, dirçəlişin, yenidənqurmanın və inkişafın rəmzinə çevrilmişdir. “Bu uğurların təməlində isə möhtərəm Prezident, Ali Baş Komandan cənab İlham Əliyevin qətiyyəti, dövlət siyasətinin ardıcıllığı və xalqımızın sarsılmaz birliyi dayanır.
20 oktyabr Zəngilan Şəhəri Günü münasibətilə bütün həmvətənlərimizi təbrik edir, Zəngilanın dirçələn torpaqlarında əbədi sülh və rifah arzulayıram”- deyə Fatma Yıldırım bildirib.
Rəşad CƏFƏRLİ,
“Azərbaycan”
