Zaqatala ərazisindən 7 dağ çayı axır. Onlardan gur sululuğu ilə seçilənlərdən biri də Tala çayıdır.
AZƏRTAC-ın bölgə müxbiri xəbər verir ki, mənbəyini Böyük Qafqaz dağlarından götürən Tala çayının uzunluğu 10 kilometrə yaxındır. Çayın keçdiyi ərazilərdə Zaqatala şəhəri ilə yanaşı, ən iri yaşayış məntəqələrindən olan Yuxarı və Aşağı Tala kəndləri də yerləşir.
Ötən ay yağan güclü leysan yağışlarından sonra Tala çayından iki dəfə sel keçib. Bu zaman çayın axarı da dəyişib. Nəticədə sel Zaqatala şəhəri Nizami Gəncəvi küçəsi yaxınlığında beton bəndin alt qatını yuyub aparıb. Beləcə 80-100 metr məsafədə beton bənd xeyli dərəcədə çaya doğru əyilib. Həmçinin beton bəndin arxasında yarğanlar əmələ gəlib.
Ərazidə bir neçə yerdə ağır texnikalar ötən gündən məcratənzimləmə işləri aparır. Azərbaycan Dövlət Su Ehtiyatları Agentliyinin Zaqatala Su Meliorasiya Sistemlərinin İstismarı İdarəsinin bir neçə ağır texnikası çayın müxtəlif istiqamətində işə başlayıb.
Baş mühəndis Ceyhun Mirzəyev son 10 ildə Tala çayından bu qədər güclü sel keçmədiyini bildirir. Davamlı yağışlar və xüsusən də dağlara düşən yağıntılar selin davamlı gəlməsini sürətləndirdiyindən ərazidə iş aparmağın çətin olduğunu qeyd edir. Sözügedən Nizami Gəncəvi küçəsi boyu beton bəndlə bağlı problemə gəldikdə isə bildirib ki, təxminən 1980-ci illərdə mühafizə məqsədilə inşa edilən, istismar müddətini başa vuran daş-beton bəndlərin özülü sel nəticəsində yuyularaq deformasiyaya uğrayıb və şəhər üçün təhlükəli vəziyyət yaranıb. “Hazırda əraziyə ağırtonnajlı texnikalar cəlb olunmaqla, çayda məcratənzimlənmə işləri həyata keçirilir, çayın məcrası dəyişdirilir. Eyni zamanda, sahilbərkitmə işləri aparılmaqla, yaranmış fəsadların aradan qaldırılması istiqamətində işlər görülür. Həmçinin əraziyə aidiyyəti üzrə mütəxəssislər cəlb olunub, yerində baxış keçirilib, qiymətləndirmə aparılıb. Sənədləşmə işləri yekunlaşandan sonra gələcəkdə ərazidə yeni mühafizə bəndinin inşası nəzərdə tutulur”, - deyə o əlavə edib.
Mövcud vəziyyətlə bağlı müvafiq qaydada rəsmi müraciət edilib və 300 paqonometr yeni beton bəndin tikintisi planlaşdırılır. Maliyyə vəsaiti ayrılan kimi dərhal ərazidə yeni bəndin tikintisinə başlanılacaq.
Bununla yanaşı, Tala çayının aşağı axarında, Tala-3 və Yolayrıc kəndlərində mexanizmlər vasitəsilə sahilbərkitmə işləri aparılıb. Rayon ərazisindən axan Muxax, Bəkməz və Qara çaylarında da təhlükəli yerlər müəyyən olunub və həmin ərazilərdə də sahilbərkitmə işləri həyata keçirilib. Ağır texnikalar bir neçə təhlükəli dağ çayında baş verə biləcək fəsadların aradan qaldırılması üçün hazır vəziyyətdə saxlanılır.
