Yerləşdiyi yarımada ilə eyni adı daşıyan Abşeron rayonu respublikanın böyük potensiala malik rayonlarındandır. Burada həyata keçirilən layihələr rayonu ölkənin əsas abadlıq və quruculuq ünvanlarından birinə çevirib. Digər sahələrlə yanaşı, avtomobil yollarına diqqət də xüsusi nəzarətdə saxlanılır. Çünki şimal istiqamətindəki bu ərazidən yollar birbaşa paytaxtla birləşir. 
Dövlət başçısının abadlıq-quruculuq işlərini daha da genişləndirmək məqsədilə imzaladığı sərəncama əsasən, rayonun Saray, Ceyranbatan, Mehdiabad, Qobu qəsəbələrinin və Masazır kəndinin ərazilərində ümumi uzunluğu 29,2 kilometr olan avtomobil yolları artıq təmir edilib. Rayonun M.Ə.Rəsulzadə küçəsində isə təmir işləri sona çatdırılıb. Layihə əsasında piyadaların sərbəst hərəkəti üçün səkilər yenidən qurulub. Ümumilikdə küçəboyu 1400 paqonmetr yeni səki daşının düzülməsi işləri aparılıb. Layihənin sonuncu mərhələsində kanalizasiya quyularının qapaqları yenilənib, yol kənarlarına yeni yağış barmaqlıqları yerləşdirilib. Əvvəlki dövrdə yağış suları küçəyə axaraq maşınların hərəkətinə, piyadaların isə üst-başlarının çirklənməsinə səbəb olurdu. 
M.Ə.Rəsulzadə küçəsində eləcə də hərəkətin normal təşkili üçün yol nişanları və məlumatverici lövhələr quraşdırılıb. Yolcizgi və yolgöstərici xətlərin, həmçinin piyada zolaqlarının çəkilməsi işləri aparılmaqla müasir yol infrastrukturu yaradılıb. Təmir edilən yollarda yeni işıqforlar quraşdırılıb.
Xırdalan şəhərində daha bir küçə - Əvəz Şəfiyev küçəsi əsaslı şəkildə yenidən qurulub. Küçənin köhnə asfalt-beton örtüyünün üst qatı frezlənərək kənara daşınıb. Ərazidə asfaltlanma işləri başa çatıb və avtomobillərin rahat hərəkəti üçün hər bir şərait yaradılıb. Asfaltlanma işləri Xırdalan şəhərinin Əbdüləli Mürsəlov və Şıxəli Qurbanov küçələrində də həyata keçirilib. Layihə çərçivəsində piyada səkiləri yenidən qurulub, kənarlarında olan köhnə səki daşları sökülərək yeniləri ilə əvəzlənib. Küçələrin işıqlandırılması təmir işləri ilə eyni vaxtda həyata keçirilib. Dünənin qaranlıq küçələrində aparılan işıqlandırma işlərindən sonra gecə saatlarında baş verən qəzaların sayı sıfra endirilib. 
Rayonun Masazır kəndində, Qobu, Ceyranbatan, Mehdiabad və Saray qəsəbələrində 23-dən yuxarı küçədə təmir işləri başa çatıb. Məqsəd vətəndaşların xüsusilə payız-qış mövsümündə gediş-gəlişində yaranan problemlərinin aradan qaldırılmasıdır. 
Bundan əlavə, daxili yolların təmiri rayonda xüsusi proqram əsasında aparılır. 
44 günlük Vətən müharibəsində şəhid olan oğullarımızın şərəfinə Abşeronda onlarca bulaq kompleksi quraşdırılıb. Ziyarətçilərin rahat gediş-gəlişini təmin etmək üçün həmin komplekslərin ətrafı səliqə-sahmanlanır. Həmçinin ziyarət yerlərinə aparan yollar da təmir edilib. Saray, Mehdiabad, Ceyranbatan qəsəbələrində yeni  təyinatlı yollar yaradılıb. Ara yollardan əlavə, qəbiristanlıq, ticarət obyektlərinin ətrafı təmir edilib və yeni yaradılan müəssisələrə yolların rahat olması üçün işlər görülüb. 
Çəkilən yolların kənarında yaşıllaşdırma işləri də aparılıb. Bu da çəkilən təzə asfalta yeni bir təbii gözəllik qatır. Əkilən ağaclar vaxtaşırı sulanır, onlara qayğı ilə yanaşılır. Bir qədər sıxlıq yaşanan Abşeronda neçə illərdir ki, yaşıllaşdırmaya diqqət artıb. Bu baxımdan təmir edilən bütün yolların kənarında Abşeronun təbiətinə uyğun ağaclar əkilir. Yaxın gələcəkdə körpə fidanlar yollara kölgə salacaq.
Paytaxta üç istiqamətdən gələn yollar məhz Abşerondan keçir. Odur ki, sürücülər yolun rahatlığına buradan köklənirlər. Bu baxımdan Abşeronda yollar paytaxt standartlarına yaxın olmalıdır. Gördükləri işin Bakının adına layiq olması üçün əlaqədar təşkilatlar daha məsuliyyətlə çalışırlar. Axı yol həm də mədəniyyət göstəricisidir.

Akif ƏLİYEV,
"Azərbaycan"