Həyata keçirilən irimiqyaslı infrastruktur layihələri, cəlb edilən investisiyaların həcminin artması regionların inkişafını da sürətləndirmiş, xüsusən kənd və qəsəbələrin abadlaşdırılmasına təkan vermişdir.
Bu baxımdan Göygöl rayonu da istisna deyil. Cari ilin göstəricilərinə nəzər salanda da aydın olur ki, rayonda ən çox diqqət yetirilən sahə abadlıq və quruculuq işləri olmuşdur və həmin işlər bu gün də səngimir. RİH başçısının müavini, Sosial-iqtisadi inkişafın təhlili və proqnozlaşdırılması şöbəsinin müdiri Arzu Qocayev deyir ki, 2025-ci il rayon sakinləri üçün yaddaqalan olacaq. Yenidənqurma və abadlıq sahəsində başlanan işlərin çox hissəsi artıq yekunlaşmış, bir çox işə isə start verilmişdir. Öyrəndik ki, şəhərdə görülmüş abadlıq işləri çərçivəsində Heydər Əliyev xiyabanında cari təmir işləri aparılmış, o cümlədən səki daşları yenilənmiş, yeni gül dibçəkləri quraşdırılmış, işıq dirəkləri yenilənmiş və yeni dekorativ ağaclar əkilmişdir. Bundan başqa, şəhərin mərkəzi küçələrindəki evlərin fasadlarında əsaslı təmir işləri görülmüş, su arxları və səkilər təmir edilmişdir. Gəncə-Kəlbəcər-Laçın avtomobil yolunun kənarında yerləşən yaşayış və qeyri-yaşayış obyektlərinin fasad hissələri də təmir olunmuş, yararsız dam örtükləri dəyişdirilmişdir. Şəhidlər xiyabanında da əsaslı təmir işləri aparılmışdır - səki daşları yenilənmiş, bayraq dirəyi ucaldılmış, yaşıllıqlar salınmış və müasir işıqlandırma sistemi quraşdırılmışdır.
Bunlardan başqa, ekoloji tarazlığın qorunub saxlanması üçün şəhərdaxili küçələrə, park və xiyabanlara ağaclar, çiçək və gül kolları əkilmişdir. İl ərzində rayon ərazisində təxminən 6 hektar ərazidə 10 minə yaxın ağac əkilmiş, mövcud yaşıllıqlara vaxtlı-vaxtlı aqrotexniki qulluq göstərilmişdir.
Yollara gəldikdə, Göygöl-Topalhəsənli-Şəhriyar-Zurnabad-Gəncə-Mollacəlilli avtomobil yolunun əsaslı təmiri ilə bağlı tədbirlər haqqında Prezidentin sərəncamına əsasən, 2 min nəfər əhalinin yaşadığı yaşayış məntəqələrini birləşdirən yolun əsaslı təmirinə başlanmışdır. Göygöl şəhərində də bir sıra küçə və yollar əsaslı təmir edilmiş, ümumilikdə 11380 kvadratmetr yol və səkilərə yeni asfalt örtüyü salınmışdır. Bundan əlavə, Göygöl şəhərinin küçə, meydan və dalanlarında 2 min kvadratmetr yararsız asfalt örtüyündə təmir-bərpa işləri aparılmışdır. Heydər Əliyev adına mədəniyyət və istirahət parkında isə "AzerGold" QSC-nin təşkilatçılığı ilə interaktiv kitab köşkü quraşdırılaraq oxucuların istifadəsinə verilmişdir.
Görülən işlər çərçivəsində əhalinin kommunal xidmətlərə olan ehtiyacını təmin etmək üçün kompleks tədbirlər də unudulmamışdır. Ən əsası odur ki, göygöllülər fasiləsiz olaraq elektrik enerjisi, su, təbii qaz və GPON texnologiyası üzərindən yeni, sürətli internetlə təmin edilmişlər. Suvarma sahəsi üzrə isə 8 subartezian quyusu əsaslı təmir olunmuş, "Xanarx" kanalının betonlama işlərinə başlanılmışdır. Quşqara kəndinə gələn qapalı boru su xəttinin 1000 metr hissəsi də yüksəktəzyiqli boru ilə əvəzlənir. Artıq işlərin yarısı yekunlaşmışdır.
Sakinlərin elektrik enerjisi ilə təminatının yaxşılaşdırılması üçün isə yeni tikilmiş elektrik yarımstansiyasına SIP3 kabellə 110 kilovoltluq yeni elektrik xətti çəkiliir. Bundan savayı, Göygöl-Toğanalı avtomobil yolunun kənarındakı 100 beton dayaq metal dayaqla əvəz olunmuş, 35 kilovoltluq Çiçəkli hava elektrik xəttinin 2 kilometr hissəsinin yeraltı kabel xəttinə keçirilməsi işlərinə başlanmışdır.
Toğanalıdan söz düşmüşkən onu da qeyd edək ki, kənd ərazisində "Heaven Resort & Hotel" hoteli istifadəyə verilmişdir. Eyni vaxtda 150 qonaq qəbul etmək imkanı olan 48 nömrədən ibarət bu turizm obyektində hər cür şərait yaradılmışdır. Hotel unikal təbiət mənzərəsi və təmiz atmosferi ilə qonaqların diqqətini cəlb edir. Müəssisənin bir üstünlüyü də Göygöl Milli Parkına yaxın olmasıdır. Turizm mərkəzində 21 nəfər daimi iş yeri ilə təmin olunmuşdur.
Söz ki turizmdən düşdü, avqust ayında rayonun Yeni Zod kəndi ərazisində keçirilən IV Milli Yaylaq Festivalını xatırlatmamaq insafsızlıq olardı. Festivalın davam etdiyi 3 gün ərzində 285 minə yaxın turist "Xan yurdu", "Cıdır meydanı", "Yaylaq bazarı", "Sənətkarlıq guşəsi", "Dədə Qorqud ocağı", "Pəhləvan meydanı", "Aşıq Ələsgər ocağı", "Yaylaq süfrəsi" və digər tematik sahələrlə tanış olmuşdur.
Elə həmin ay Keşkü kəndi ərazisində keçirilən II Moruq Festivalına isə 61 mindən çox qonaq qatılmışdır. Festival çərçivəsində təşkil edilən moruq və digər kənd təsərrüfatı məhsullarından ibarət yarmarka, sənətkarların əl işləri, folklor və idman tədbirləri, rəqs və mahnı proqramları, kamp ərazisi, eləcə də maraqlı müsabiqələr tədbiri daha rəngarəng etmişdir.
Oktyabrda keçirilən "Göygöl Brendi-Konyak Günü" də yaddaqalan olmuşdur. 2500-dən çox qonağın iştirak etdiyi tədbirin açılış hissəsində Almaniya, İsveç, Latviya, Avstriya, İsveçrənin Azərbaycandakı səfirləri və digər rəsmi qonaqlar iştirak etmişlər. Tədbirdə müxtəlif konyak və üzüm məhsullarının təqdimatı, dequstasiyası və satış yarmarkalarının təşkili, içki istehsalı üzrə ustad dərsləri və brend üzrə peşəkar yarışlar keçirilmiş, tədbir iştirakçıları üçün zövqlü musiqi proqramları, klassik musiqi axşamları, milli mətbəx guşələri, əl işləri sərgiləri təşkil olunmuşdur.
Sabir ƏLİYEV,
"Azərbaycan"
jpg_1768293079.jpg)
