Bir sıra ölkələrdə antisemitizm və islamofobiya güclənib
Dünyanın yeddi ölkəsindəki ən böyük yəhudi diasporları antisemit hadisələrdə əhəmiyyətli artım olduğunu qeydə alıblar. Bu barədə Almaniya, Fransa, Böyük Britaniya, ABŞ, Kanada, Avstraliya və Argentinanın yəhudi icmalarının daxil olduğu J7 beynəlxalq işçi qrupunun təqdim etdiyi hesabatda deyilir.
Hesabata görə, ən çox antisemit hadisələri (1000 yəhudiyə 38 hadisə) Almaniyada aşkar edilib. Müqayisə üçün bildirilir ki, bu göstərici Böyük Britaniyada 13, Avstraliya, Argentina və Fransada hər birində 4, Kanadada 2, ABŞ-də 1-dir.
J7 qrupu narahatedici bir tendensiya barədə də xəbərdarlıq edib. Hesabatda 2021-ci ildən 2023-cü ilə qədər ABŞ-də antisemit hadisələrin ən kəskin - 227 faiz artdığı deyilib. Həmin rəqəm Fransada 185, Almaniyada isə 75 faizdir. Bunun əsas səbəbi kimi HƏMAS-ın 7 oktyabr 2023-cü ildə İsrailə hücumu və onun nəticələri göstərilib.
Almaniyadakı Yəhudilərin Mərkəzi Şurasının prezidenti Yozef Şuster antisemit cəbhənin formalaşdığını elan edib. Qeyd edilir ki, oxşar tendensiyalar J7 ölkələrinin hamısında müşahidə olunur. Xüsusilə zorakı hücumların sayı, internetdə yəhudilərə nifrət səviyyəsi artır. Bir çox yəhudinin özlərini getdikcə daha çox güvənsiz hiss etdiyi və qorxudan kimliklərini göstərən simvolları taxmaqdan imtina etdiyi deyilir. Eyni zamanda hesabatda antisemitizm zorakılığına qarşı kifayət qədər tədbir görmədiyinə görə hakimiyyət tənqid olunur.
Digər tərəfdən, müsəlmanlara hücumların və onlara qarşı ayrı-seçkilik hallarının sayı da artır. Bir müddət əvvəl İslam və Müsəlmanlar Düşmənliyinə Qarşı Alyans (Claim) Almaniyadakı vəziyyətlə bağlı öz təhlilini təqdim edib. Claim-in hesabatına görə, ölkədə müsəlmanlara qarşı hücumlar, təhdidlər və ayrı-seçkilik 2023-cü ildə əvvəlki illə müqayisədə iki dəfədən çox artıb. Bu cür hücumların sayı təqribən 900-dən 1926-ya yüksəlib. Alyansın rəhbəri Rima Hanano deyir ki, müsəlmanlara qarşı irqçilik indi həmişəkindən daha məqbul sayılır və bu, cəmiyyətin nüvəsindən qaynaqlanır.
Xatırladaq ki, BMT-nin baş katibi Antonio Quterreş bütün dünyada müsəlmanlara qarşı nifrət aktlarının artdığını bildirərək onlayn platformaları bununla bağlı nifrət çıxışlarının və təqiblərinin yayılmasına nəzarət etməyə çağırıb.
Rizvan CƏFƏROV,
"Azərbaycan"
jpeg_1747678534.jpeg)
