Bakıda keçirilən BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində mayın 20-də BMT-nin Dayanıqlı İnkişaf Məqsədlərinin (SDG) yerli səviyyədə təşviqi platforması olan "Local2030" Koalisiyasının və BMT-nin Məskunlaşma Proqramının (UN-Habitat) birgə təşkilatçılığı ilə "Dayanıqlı İnkişaf Məqsədləri (SDG) Lokalizasiyası: Tərəfdaşlıq və innovasiya vasitəsilə sistem dəyişikliyini sürmək" adlı panel sessiya təşkil olunub.
AZƏRTAC xəbər verir ki, "Local2030" Koalisiyasının Katibliyinin rəhbəri Sebastien Vauzellenin moderatorluğu ilə keçirilən paneldə Misir, Finlandiya, Tayland və Kamerundan olan sahə üzrə nümayəndələr, eləcə də akademik dairələrin və şəhər nümayəndələrinin təmsilçiləri iştirak ediblər.
Tədbirdə “Bakıya doğru yol” hesabatı təqdim olunub. Hesabat müxtəlif səviyyələrdə maraqlı tərəfləri səfərbər edərək yerli liderliyə əsaslanan həlləri önə çıxarır, icra mexanizmlərini və ərazi reallıqlarını əks etdirir və bu təcrübələrin “Bakı çağırışına”na inteqrasiyasını təmin edir.
Çıxışlarda vurğulanıb ki, SDG-lərin yerli səviyyədə uğurlu icrası üçün çoxsəviyyəli idarəetmə, güclü tərəfdaşlıq və innovativ yanaşmalar həlledici rol oynayır. Natiqlər həmçinin şəhərlərin və yerli icmaların qlobal gündəmin formalaşmasında artıq icraçı deyil, birbaşa birgə yaradıcısı kimi çıxış etdiyini qeyd ediblər.
Eyni zamanda rəqəmsal həllər, data əsaslı idarəetmə və innovasiya sahəsindəki təcrübələr xüsusi vurğulanıb. Xüsusilə Ərəb regionundan olan nümunələr SDG lokalizasiyası, Könüllü Yerli Hesabatlar, şəhər observatoriyaları və torpaq idarəçiliyi göstəriciləri baxımından regionun mühüm töhfələrini ön plana çıxarıb.
Paneldə, həmçinin şəhər inkişafının 50 illik icmalı, mənzil və qeyri-rəsmi yaşayış məntəqələrinin rolu, şəhər məlumat sistemləri və 2030-cu ildən sonrakı perspektivlər geniş müzakirə olunub.
