Ən yaxşı ukraynalı pilotlar Qərb ölkələri F-16 qırıcılarını Kiyevə çatdırmazdan əvvəl həlak olublar. Bu barədə “The Wall Street Journal” qəzeti (WSJ) yazır.
Bildirildiyinə görə, Ukrayna ilk qırıcıları qəbul edənə qədər onun silahlı qüvvələrinin ən yaxşı pilotları artıq həlak olmuşdu. Xüsusilə, onların arasında keçən həftə F-16-nı idarə edərkən həlak olan pilot Aleksey Mes, eləcə də ötən ilin avqustunda təlim uçuşu zamanı həlak olan Andrey Pilşikovun adlarını çəkirlər. Nəşr vurğulayır ki, hər iki hərbçi 2022-ci ilin iyununda ABŞ senatorları ilə görüşdə iştirak edib və Kiyevə F-16-ların tədarükünü fəal şəkildə müdafiə ediblər.
Sentyabrın 3-də Rusiyanın ABŞ-dakı səfiri Anatoli Antonov bildirib ki, amerikalı təlimatçılar ukraynalı pilotlara F-16 qırıcılarını idarə etməyi öyrədə bilməyiblər. Diplomat Kiyevin ona ötürülən ilk belə təyyarəni itirməsini belə şərh edib.
Bundan əvvəl Ukrayna Silahlı Qüvvələrinin Baş Qərargahı F-16 təyyarəsinin itdiyini təsdiqləsə də, insidentin təfərrüatları, o cümlədən qırıcının məhv edildiyi yer barədə məlumat verməyib. Ukrayna Silahlı Qüvvələrinin Hərbi Hava Qüvvələrinin məlumatına görə, təyyarə qəzaya uğrayıb. Ali Radanın deputatı Maryana Bezuqlaya onun səhv nəticəsində “Patriot” hava hücumundan müdafiə sistemi raketi ilə vurulduğunu bəyan edərək, Ukrayna Silahlı Qüvvələri komandanlığını təyyarənin məhv edilməsinin şərtlərini gizlətməkdə ittiham edib. Ukrayna Silahlı Qüvvələrinin Hərbi Hava Qüvvələrinin komandiri Nikolay Oleşçuk bu mesaja görə deputatı hədələyib.

 “Azərbaycan”