Rusiya qoşunları Ukraynaya gecə boyu azı 650 dron və 50-dən çox raketlə hücum edib. Onların bir çoxu vurulub, amma hədəfə dəyənlər də var.
AZƏRTAC xəbər verir ki, bu barədə Ukrayna Prezidenti Volodimir Zelenski “Telegram” kanalındakı paylaşımında bildirib.
“Bir çox bölgəmizdə Rusiyanın gecə hücumundan sonra təcili yardım və xilasetmə əməliyyatları davam edir. Düşmən mürəkkəb, birləşmiş zərbədən istifadə edib: 650-dən çox dron, habelə ballistik və aeroballistik silahlar da daxil olmaqla müxtəlif növ 50-dən çox raket buraxılıb. Onların bir çoxu vurulub, amma təəssüf ki, bəziləri hədəfə dəyib”, - deyə Zelenski qeyd edib.
Onun sözlərinə görə, Zaporojyedə yaşayış binaları hücumlar nəticəsində zərər görüb və bir yataqxana dağılıb. Zərbə nəticəsində onlarla insanın, o cümlədən beş uşağın yaralandığı məlumdur. Təəssüf ki, iki nəfər ölüb. Xilasetmə əməliyyatları davam edir.
Ladıjin şəhərində yeddi yaşlı oğlan ağır yaralanıb. Vinnitsa, Kiyev, Nikolayev, Çerkassı, Poltava, Dnepr, Çerniqov, Sumı, İvano-Frankovsk və Lvov vilayətlərində enerji və yaşayış infrastrukturuna çoxsaylı hücumlar da olub.
Ukrayna Prezidenti bildirib: “Bütün zəruri xidmətlər cəlb edilib; hazırda əlçatmaz olan yerlərdə elektrik enerjisi və su təchizatını mümkün qədər tez bərpa etməyə çalışmalıyıq”.
Dövlət başçısı hər belə hücumdan sonra Rusiyaya yeni sanksiyalar tətbiq etmək və real təzyiq göstərmək ehtiyacını bir daha vurğulayıb.
“Ümidvarıq ki, Amerika, Avropa və G7 ölkələri Moskvanın hər şeyi məhv etmək istəyini görməzdən gəlməyəcək. Rusiyanın neft və qaz sənayesinə və maliyyəsinə yeni təzyiq göstərmək lazımdır, bu müharibəni dəstəkləyənlərə isə ikinci dərəcəli sanksiyalar tətbiq olunmalıdır. Sülh uğrunda çalışan hər birinizə təşəkkür edirəm”, - deyə o əlavə edib.
