"Bu gün elə bir vəziyyət yaranıb ki, beynəlxalq aləmə demokratiyanın və insan hüquqlarının müdafiəçisi kimi təqdim edilən qeyri-hökumət təşkilatlarının əsl mahiyyətini, onların hansı çirkin planların həyata keçirməsində istifadə olunduqlarını artıq Qərb dövlətlərinin özləri ifşa etməkdədirlər. ABŞ Beynəlxalq İnkişaf Agentliyinin (USAID) ləğv edilməsinin gündəmə gəlməsi bunun bariz nümunəsidir. Artıq ABŞ rəhbərliyi özü rəsmi şəkildə USAID-in dünyada hansı çirkin və məkrli planları həyata keçirdiyini etiraf etdi".
Bunu Milli Məclisin deputatı Müşfiq Məmmədli deyib.
Deputatın sözlərinə görə, vəziyyət o həddə çatdı ki, ABŞ-nin yeni prezidenti Donald Tramp USAID-i ləğv etmək qərarına gəldi.
"Tramp komandası özü bildirir ki, USAID dünyanın müxtəlif ölkələrində terrorçuluğu dəstəkləməkdən tutmuş, narkotiklərin təşviqinə qədər ən müxtəlif cinayət əməllərinin təşkilatçısı olmaqla yanaşı, onları maliyyələşdirib. USAID ABŞ-nin dünyada xaos yayan, hakimiyyət çevrilişləri həyata keçirən, vətəndaş qarşıdurması yaradan mexanizmidir. Bu qurum illərlə dünyanın müxtəlif bölgələrində müstəqil xarici siyasət yürüdən dövlətlərin daxili işlərinə qarışaraq, inqilablara sponsorluq edib. Media qruplarına böyük maliyyə dəstəyi verməklə müstəqil siyasət yürüdən dövlətlərə qarşı qarayaxma kampaniyaları təşkil edib. Amerikalı milyarder İlon Mask USAID-i çoxsaylı cinayət əməllərində, həmçinin Çin laboratoriyasını maliyyələşdirməkdə, yəni koronavirusu yaymaqda ittiham edir. Bu səbəbdən də təşkilatdan amerikalı vergiödəyiciləri qarşısında hesabat vermək tələb olunur", - deyə M.Məmmədli qeyd edib.
Deputat bildirib ki, USAID Azərbaycana qarşı da həmişə riyakar mövqedə dayanıb. Məqsədi isə Azərbaycanın inkişafına mane olmaq, ərazi itkisi ilə razılaşmaq planını reallaşdırmaqdan ibarət olub. Lakin onun bütün çirkin planlarının qarşısı zamanında alınıb.
Azərbaycanın öz ərazi bütövlüyünü və suverenliyini bərpa etməsini həzm edə bilməyən USAID 2020-ci ildən sonra açıq şəkildə ermənilərə havadarlıq edərək separatizmi və revanşizmi dəstəkləyib. Bu məqsədlə Ermənistana milyonlarla dollar vəsait ayırıb. Bu yolla Azərbaycana qarşı hibrid təhdilər yaratmaq çalışıb, ölkəmizdə xaosa cəhd edib.
Lakin cənab Prezident İlham Əliyevin qətiyyətli siyasəti nəticəsində ölkəmizə qarşı həyata keçirilən hibrid təhdidlər və beynəlxalq dezinformasiya kampaniyaları iflasa uğradı.
Bir zamanlar ölkələri üçün təhdidlər yaradan USAID-in əsl siması artıq dünya bəllidir. Bu təşkilat cinayətkar və çirkin oyunlarda istifadə edilən struktur kimi ifşa olundu. İnanıram ki, USAID-in bu acı aqibətini dünya ölkələrinə təhdid mənbəyi olan digər təşkilatlar da yaşayacaq".
“Azərbaycan”
