Ümumdünya Şəhərsalma Forumunun 13-cü Sessiyası (WUF13) çərçivəsində BMT-nin Məskunlaşma Proqramı (Un-Habitat) tərəfindən “İnsani yardım–inkişaf əlaqəsi çərçivəsində məcburi köçkünlərin idarə olunması və ərazi əsaslı yanaşma” mövzusunda sessiya təşkil olunub.
AZƏRTAC xəbər verir ki, tədbirdə məcburi köçkünlərin problemlərinin həllində humanitar yardım, şəhər inkişafı və sülh quruculuğunu birləşdirən inteqrasiya olunmuş yanaşmalar müzakirəyə çıxarılıb.
Qeyd edilib ki, dünyada 70 milyondan çox məcburi köçkünün mövcudluğu, onların təxminən 58 faizinin şəhər ərazilərində yaşaması şəhərlərdə mənzil təminatı, əsas xidmətlərə çıxış, məşğulluq imkanları və idarəetmə sistemləri üzərində əlavə təzyiq yaradır. Bu səbəbdən problemin həlli yalnız qısamüddətli humanitar müdaxilələrlə məhdudlaşmamalı, uzunmüddətli və dayanıqlı inkişaf yanaşmaları ilə birləşdirilməlidir.
Bildirilib ki, ərazi əsaslı yanaşma çərçivəsində həyata keçirilən planlaşdırma, mənzil təminatı və yaşayış mühitinin yaxşılaşdırılması tədbirləri məcburi köçkünlərin dayanıqlı inteqrasiyası üçün mühüm platforma rolunu oynayır.
Müzakirələr zamanı qeyd olunub ki, Un-Habitat tərəfindən Kolumbiya, Mərkəzi Afrika Respublikası, Əfqanıstan və Sudan kimi ölkələrdə tətbiq edilən təcrübələr bu yanaşmanın effektivliyini göstərir. Həmin ölkələrdə şəhər sistemlərinin gücləndirilməsi, torpaq və mənzil təhlükəsizliyinin təmin edilməsi, eləcə də yerli idarəetmənin təkmilləşdirilməsi istiqamətində həyata keçirilən təşəbbüslər davamlı həllərə mühüm töhfə verib.
Tədbirdə, həmçinin vurğulanıb ki, humanitar yardım, inkişaf və sülh istiqamətlərini birləşdirən yanaşmaların gücləndirilməsi ev sahibi icmalarla məcburi köçkünlərin birgə dayanıqlılığını və sosial inteqrasiyasını təmin edən əsas amillərdən biridir.
