Ukrayna, xüsusilə paytaxt Kiyev şəhəri müharibə dövrünün ən ağır qışını yaşayır.
AZƏRTAC-ın bu ölkədəki xüsusi müxbirinin verdiyi məlumata görə, Rusiya ordusunun intensiv hava hücumları nəticəsində enerji və qaz infrastrukturlarının sıradan çıxması, eyni zamanda, sərt şaxta səbəbindən Kiyev şəhəri və vilayətində acınacaqlı vəziyyət yaranıb, enerji sektorunda fövqəladə vəziyyətin tətbiqinə başlanılıb.
Ukrayna Baş nazirinin müavini-energetika naziri Denis Şmıqal bildirib ki, Kiyevdə bütün təhsil müəssisələrində qış tətili fevralın 1-dək uzadılıb. Digər bölgələrdə də distant təhsilin və ya rəsmi tətillərin fevralın 1-dək uzadılması qüvvədədir.
“Yanacaq, dizel və benzin təchizatı nəzarət altındadır. Ehtiyatlar azı 20 gün üçün kifayətdir, idxal davam edir. Qaz ehtiyatları heç bir məhdudiyyət olmadan nəzarətdə saxlanılır. Komendant saatı zamanı insanların xüsusi buraxılış olmadan çıxmasına və yaradılan xüsusi sığınacaqlara, istiləşmə məntəqələrinə çatması üçün ictimai nəqliyyatdan istifadə olunmasına icazə verilir”, - deyə o diqqətə çatdırıb.
Şmıqal deyib ki, Kiyev şəhərindəki və bölgəsindəki enerji obyektlərinin Rusiya tərəfindən atəşə tutulmasının nəticələrinin aradan qaldırılması üçün yaradılmış qərargah fasiləsiz işləyir. O, həmçinin qeyd edib ki, ruslar bütün arsenallarından, ballistik və qanadlı raketlərindən, modernləşdirilmiş dronlarından Ukraynanın enerji infrastrukturu obyektlərinin vurulması üçün istifadə edirlər: “2025-ci il Rusiya Ukraynanın enerji sektoruna 612 hədəflənmiş, birləşdirilmiş hücum həyata keçirib. İndi intensivlik yalnız artır, zərbələr hər gün baş verir. Ukraynada müharibə zamanı düşmən zərbələrinə məruz qalmayan bir dənə də olsun elektrik stansiyası yoxdur ölkədə minlərlə meqavatlıq generasiya gücü sıradan çıxarılıb. Ukrayna Təhlükəsizlik Xidmətinin məlumatına görə, cari istilik mövsümünün əvvəlindən bəri Rusiya Ukraynadakı enerji obyektlərinə və istilik sistemlərinə 256 hava hücumu həyata keçirib. Ən ağır vəziyyət Kiyev şəhərində və vilayətində, eləcə də Odessa, Dnepropetrovsk və Xarkov vilayətlərində, həmçinin bütün cəbhə bölgələrindədir. Ümumiyyətlə, ölkə daxilində ciddi şəkildə enerji və qaz məhdudiyyətləri tətbiq olunduğundan, bu, həm gündəlik həyata, həm də sənaye və biznesə təsir göstərir. Vəziyyət çox çətindir. Bəzi şəhər və bölgələrdə hazırlıqlar uğursuz olub. Son iki gün ərzində çox şeyin açıq şəkildə ləngidiyini gördüm. İndi biz tez bir zamanda nizamı bərpa edəcəyik və prosesləri sürətləndirəcəyik. Bu, hazırda elektrik enerjisi, su və ya istilik çatışmazlığı olan hər kəsin ehtiyac duyduğu yardımı alması üçün lazımdır", - deyə Şmıqal vurğulayıb.
O bildirib ki, polis ictimai asayişi qorumaq və lazım olduqda kömək göstərmək üçün küçə patrullarını artırır. Bundan başqa, isinmə sığınacaqlarının sayı artırılır. "Dəstək nöqtələri müəyyən edilib və istilik, yemək, şarj cihazları və rabitə üçün əlavə avadanlıqlarla təmin edilir. Mövcud resursları nəzərdən keçiririk və onları yenidən bölüşdürürük ki, yardım ən çox ehtiyacı olanlara çatsın. Ukrayna yaranmış böhrandan çıxmaq üçün əlavə dəstək cəlb etmək məqsədilə beynəlxalq tərəfdaşlarla işləməyə davam edir. Xüsusilə güclü generatorlar, enerji saxlama qurğuları, batareyalar, transformatorlar, təmir ləvazimatları, avadanlıqlar və digər texnikaların alınması işləri sürətləndirilib. Ukrayna Avropa Birliyindən elektrik enerjisi idxalını artırır”, - deyə Şmıqal diqqətə çatdırıb.
jpg_1770970690.jpg)
