Ukrayna Prezidenti Volodimir Zelenski Əbu-Dabidə Birləşmiş Ərəb Əmirliklərinin (BƏƏ) Prezidenti Məhəmməd bin Zayed Əl Nəhyanla görüşdə təhlükəsizlik və müdafiə sahəsində əməkdaşlıq etmək barədə razılığa gəlib.
AZƏRTAC xəbər verir ki, bu barədə Ukrayna Prezident Ofisi Aparatının mətbuat xidməti məlumat yayıb.
Zelenskinin sözlərinə görə, görüş zamanı tərəflər BƏƏ-də və regionda təhlükəsizlik vəziyyətini, xüsusən də İranın zərbələrini və qlobal neft bazarına birbaşa təsir edən Hörmüz boğazının bağlanmasını müzakirə ediblər.
Prezident Zelenski Ukraynanın BƏƏ ilə uzunmüddətli əməkdaşlığa hazır olduğunu vurğulayıb və onun fikrincə, bu, hər iki ölkəni strateji cəhətdən gücləndirəcək, insanların həyatını qorumağa kömək edəcək.
Liderlər, həmçinin müdafiəni gücləndirmək, o cümlədən investisiya, birgə istehsal və kritik və sosial infrastrukturun mühafizə sistemlərinin modernləşdirilməsi imkanlarını müzakirə ediblər.
“Müasir təhdidlər qarşısında bütün normal dövlətlərin sabitliyi təmin etməsi və həyatı qoruması vacibdir. Ukrayna bu sahədə lazımi təcrübəyə malikdir, təəssüf ki, şəhərlərimiz dörd ildir ki, tammiqyaslı müharibədə hər gün hücuma məruz qalır. Ukraynalılar düşmən dronlarının və raketlərinin vurduğu zərəri əhəmiyyətli dərəcədə azaldan müvafiq müdafiə sistemi üzərində işləyirlər. Məhz bu sistemli yanaşma və tərəfdaşlarımıza inteqrativ təcrübə təklif edirik”, - deyə Zelenski vurğulayıb.
Onun sözlərinə görə, Məhəmməd bin Zayed Əl Nəhyan Ukrayna tərəfinə Ukraynanın tərəfdaşları ilə bölüşdüyü ekspert dəstəyi və təcrübəyə görə təşəkkür edib.
Görüşdən sonra Kiyev və Əbu-Dabi təhlükəsizlik və müdafiə sahəsində gələcək əməkdaşlıq barədə razılığa gəlib. İki ölkənin komandaları hazırda müqavilənin təfərrüatlarını yekunlaşdırırlar.
jpg_1774637646.jpg)
