Bakı Beynəlxalq Multikulturalizm Mərkəzində (BBMM) Ukraynanın Azərbaycandakı səfirliyi və Ukrayna Azərbaycanlıları Birləşmiş Diasporunun birgə təşkilatçılığı ilə “Zərifə və Heydər Əliyevlər. Əbədiyaşar məhəbbət” kitabının Ukrayna dilində ilk təqdimatı keçirilib. Tədbir Azərbaycan və Ukrayna arasında mədəni-humanitar əməkdaşlığın inkişafına töhfə verən əhəmiyyətli layihə kimi dəyərləndirilib.
AZƏRTAC xəbər verir ki, BBMM-in icraçı direktoru Rəvan Həsənov kitabın Ukrayna dilində nəşr olunmasının multikulturalizm və mədəniyyətlərarası dialoq baxımından xüsusi əhəmiyyət daşıdığını qeyd edib. O bildirib ki, nəşr Azərbaycanın görkəmli şəxsiyyətləri – Ümummilli Lider Heydər Əliyev və akademik Zərifə xanım Əliyevanın həyat yolunu Ukrayna ictimaiyyətinə daha yaxından tanıtmaqla xalqlar arasında mənəvi körpü yaradır. Rəvan Həsənov belə layihələrin Azərbaycan həqiqətlərinin müxtəlif dillərdə təqdimatı baxımından BBMM üçün prioritet istiqamət olduğunu diqqətə çatdırıb.
Ukraynanın Azərbaycandakı səfiri Yuri Qusev bildirib ki, nəşr səfirliyin “Ukrayna mədəniyyətinin yeni üfüqləri: Ədəbiyyat günləri” layihəsi çərçivəsində çap olunub və iki dost xalq arasında mədəni-humanitar əlaqələrin möhkəmlənməsinə mühüm töhfə verir. Diplomat vurğulayıb ki, kitab Ukrayna ictimaiyyətinin Azərbaycan tarixini, onun görkəmli şəxsiyyətlərini və zəngin mənəvi dəyərlərini daha yaxından tanımasına imkan yaradır. Səfir belə təşəbbüslərin gələcəkdə də davam etdirilməsinin mədəni dialoqun dərinləşməsinə xidmət edəcəyini qeyd edib.
BBMM-in Analitika şöbəsinin müdiri, fəlsəfə doktoru Rəşad İlyasovun moderatorluğu ilə keçirilən tədbirdə Ukrayna Azərbaycanlıları Birləşmiş Diasporunun sədri Hikmət Cavadov, Azərbaycan Yazıçılar Birliyinin sədrinin birinci katibi, Xalq yazıçısı Çingiz Abdullayev, “Azərbaycan–Ukrayna Konqresi” İctimai Birliyinin sədri Yuriy Osadçenko, Azərbaycan Yazıçılar Birliyinin katibi, Əməkdar incəsənət xadimi Elçin Hüseynbəyli, təşkilatın sədr müavini Oksana Moskalenko çıxış edərək Azərbaycan ilə Ukrayna arasında dostluq və tərəfdaşlıq münasibətlərinin möhkəm tarixi əsaslara söykəndiyini bildiriblər.
Natiqlər Ümummilli Lider Heydər Əliyevin Azərbaycan dövlətçilik tarixində oynadığı misilsiz rolu, akademik Zərifə Əliyevanın zəngin mənəvi və elmi irsini qeyd edərək əsərdə əks olunan ailə dəyərlərinin, sədaqət və ülvi məhəbbət ideyalarının bu gün də aktual olduğunu vurğulayıblar. Nəşrin xalqlar arasında qarşılıqlı anlaşmanın və mədəni yaxınlaşmanın güclənməsində mühüm rol oynadığı diqqətə çatdırılıb.
Kitabın müəllifi, BBMM-nin Himayəçilik Şurasının üzvü, Xalq yazıçısı Elmira Axundova çıxış edərək nəşrin üzərində çalışarkən əsas məqsədinin tarixi faktları təqdim etməklə yanaşı, böyük şəxsiyyətlərin mənəvi aləmini, bir-birinə olan bağlılığını və ailə dəyərlərinə sədaqətini oxucuya çatdırmaq olduğunu bildirib. O qeyd edib ki, Ümummilli Lider Heydər Əliyevin həyat və fəaliyyətini akademik Zərifə Əliyevanın şəxsiyyəti ilə birgə təqdim etmək bütöv mənəvi portret yaratmağa imkan verib. Yazıçı kitabın Ukrayna dilində nəşrinin onun üçün xüsusi mənəvi əhəmiyyət kəsb etdiyini vurğulayıb və layihənin ərsəyə gəlməsində əməyi olan hər kəsə təşəkkürünü bildirib.
Qeyd edək ki, kitab Ukraynanın Azərbaycandakı səfirliyinin “Ukrayna mədəniyyətinin yeni üfüqləri: Ədəbiyyat günləri” layihəsi çərçivəsində nəşr olunub.
jpg_1767211798.jpg)
