Heydər Əliyevin siyasəti yalnız Azərbaycana deyil, bütün Türk dünyasının yoluna işıq saçdı. Böyük dövlət xadiminin anadan olmasının 102-ci ildönümündə Azərbaycan xalqının Ümummilli Liderinin xatirəsini dərin hörmətlə yad edirik.
AZƏRTAC xəbər verir ki, bu barədə Ankarada keçirilən panel müzakirələri çərçivəsində Türkiyə-Azərbaycan Dostluq, Əməkdaşlıq və Həmrəylik Fondu (TADİV) tərəfindən təşkil olunmuş tədbirdə Türkiyə Xarici İşlər Nazirliyinin Mərkəzi Asiya və Qafqaz departamentinin rəhbər müavini Ayşe Üzər bildirib.
Onun sözlərinə görə, Heydər Əliyev Azərbaycanın azadlığı və dövlətçiliyi uğrunda mübarizənin memarı olmaqla yanaşı, həm də bütün Türk dünyasının maraqlarını nəzərə alan müdrik strateq olub. “Onun məşhur “Bir millət, iki dövlət” ifadəsi dövlətlərarası münasibətlərin qurulması siyasətinin və tarixi baxışın əsasını təşkil edib. Sevindirici haldır ki, Türkiyə və Azərbaycan arasında sarsılmaz əlaqələr Heydər Əliyevin vəsiyyətləri ilə bu gün inkişaf edir, onun arzuları həyata keçir”, - deyə diplomat vurğulayıb və iki qardaş ölkə arasında münasibətləri müttəfiqlik səviyyəsinə qaldıran Şuşa Bəyannaməsinin əhəmiyyətinə diqqət çəkib.
Türkiyə XİN nümayəndəsi qeyd edib ki, Azərbaycan xalqının Ümummilli Liderinin kursu regionda Bakı-Tbilisi-Ceyhan neft kəməri, Trans-Anadolu qaz kəməri (TANAP) və Bakı-Tbilisi-Qars dəmir yolu da daxil olmaqla böyük layihələrin həyata keçirilməsinə yol açıb.
A.Üzər Ankara və Bakının davam edən uğurlu əməkdaşlığının daha bir nəticəsi kimi cari il martın 5-də İğdır-Naxçıvan qaz kəmərinin açılışını göstərib. “Naxçıvana qaz kəməri sadəcə növbəti enerji layihəsi deyil, strateji tərəfdaşlığın, ortaq iradənin və tarixi həmrəyliyin parlaq təzahürüdür. Uğurla həyata keçirilən hər bir layihə həm də Heydər Əliyevin strateji baxışının bəhrəsidir”, – deyə diplomat bildirib.
O vurğulayıb ki, “44 günlük Vətən müharibəsi dövründə Azərbaycanın qəhrəmanlıq dastanının” yekunlarına dair formalaşmış yeni geosiyasi reallıqlar fonunda Türk dünyası sülhə, birgə inkişafa və əməkdaşlığa dair iradə nümayiş etdirir.
Diplomat sonda Türk Dövlətləri Təşkilatı (TDT) çərçivəsində dialoqun əhəmiyyətinə toxunub. “Müasir mərhələdə TDT artıq uzunmüddətli sazişlərin bağlandığı beynəlxalq təşkilata çevrilib. Şuşada keçirilmiş qeyri-rəsmi TDT sammitində, o cümlədən Şimali Kipr Türk Cümhuriyyəti də daxil olmaqla bütün türk dövlətlərinin liderlərinin iştirakı bizim üçün qürur mənbəyidir”, - deyə A.Üzər bildirib, Macarıstanda və Azərbaycanda keçiriləcək növbəti sammitlərlə bağlı böyük gözləntilərini ifadə edib.
Türkiyəli diplomat Prezident İlham Əliyevin “Türk dünyası bizim ailəmizdir” sözlərini sitat gətirərək, Ankara və Bakının türk ölkələri arasında əlaqələrin möhkəmləndirilməsi naminə koordinasiyalı addımlar atacağına inamını ifadə edib.
jpg_1766048684.jpg)
