Hörmətli redaksiya! 

Biz Bakı şəhəri, 1-ci mikrorayon Alı Mustafayev küçəsi, 1k binasının sakinləri bəlkə də indiyəcən görünməmiş problemlə qarşılaşmışıq. 

17 mərtəbəli 2 bloklu "yeni tikili" olan binamızda təxminən 120 ailə yaşayır. 4 ay öncə binamızın küçəyə (20 Yanvar dairəsindən 3-cü mikrorayon dairəsinə düşən yola) baxan fasadına vurulmuş üzlük daşlarını sökməyə başladılar ki, COP29-a görə təmir edirik. Hələ də sona çatmayan həmin söküntü zamanı pəncərələrinin şüşəsi sınmayan, kondisionerləri yararsız hala düşməyən, sputnik antenaları əzilməyən mənzil qalmadı. 

Bunlar bir yana, müvəqqəti çətinlikdir deyib dözə bilərik, təki qlobal ekoloji tədbir olan COP29 paytaxtımızda yüksək səviyyədə keçsin. Lakin problem ondadır ki, iş getmir. 3-4 gündən bir 2-3 saat işləyib, daha doğrusu, dağıdıb-töküb gedirlər. Özü də bu zaman yüksəklikdə işləmələrinə baxmayaraq, heç bir təhlükəsizlik vasitələrindən istifadə etmirlər. Üstəlik,  hər dəfə başqa-başqa "briqada" gəlir.

Artıq payızdır. Bir azdan yağışlar başlayacaq. Elə COP29 da yaxınlaşır. Bizim bina isə sanki bombardmandan çıxmış kimi uzaqdan gözə girir. Dərdimizi kimə deyirik, deyirlər bizlik deyil. Odur ki, ümidimiz sizədir. Bəlkə rəsmi dövlət qəzetini oxuyub artıq şəhərin probleminə çevrilmiş bu məsələni həll edən tapılar.

Binanın sakinləri adından 

N.Hüseynli, Y.Məmmədov, H.Cəlilov, 

K.Camalov, E.Əfəndiyeva, 

X.Səfərov - ümumilikdə 58 nəfər