Türk Dövlətləri Təşkilatına (TDT) Üzv Dövlətlərin Xarici İşlər Nazirləri Şurası martın 7-də İstanbulda çağırılıb və regional və qlobal inkişaflar, o cümlədən ətraf bölgələrdə insan iztirablarına, ölümlərə və genişmiqyaslı humanitar çağırışlara səbəb olan mövcud silahlı münaqişə və qarşıdurmaların son zamanlar artması barədə ətraflı məsləhətləşmələr həyata keçirib.
Nazirlər Yaxın Şərqdə son zamanlar artan zorakılıq və onun dağıdıcı nəticələri ilə bağlı dərin narahatlıqlarını ifadə ediblər. Onlar günahsız insanların həyatını təhlükəyə atan və bölgədə sabitliyi pozan bütün hərəkətləri pisləyiblər.
AZƏRTAC xəbər verir ki, bu fikirlər Türk Dövlətləri Təşkilatı Xarici İşlər Nazirləri Şurasının Yaxın Şərqdəki son inkişaflarla bağlı birgə bəyanatında əksini tapıb.
Bəyanatda, həmçinin bildirilib: "Nazirlər TDT Üzv Dövlətlərinin təhlükəsizliyinə qarşı hər hansı təhdidin bütün Təşkilat üçün narahatlıq doğurduğunu vurğulayıblar və güc tətbiqinin yolverilməzliyini və suverenlik və ərazi bütövlüyü kimi universal prinsiplərə riayət etməyin vacibliyini qeyd ediblər.
Nazirlər İran İslam Respublikasının ərazisindən Türkiyə Respublikası və mülki obyektlər daxil olmaqla Azərbaycan Respublikasının Naxçıvan Muxtar Respublikasına qarşı həyata keçirilən hücumları qətiyyətlə pisləyiblər.
Nazirlər regional vəziyyəti daha da ağırlaşdıran və gərginlik coğrafiyasını genişləndirmə riskini daşıyan bu kimi məsuliyyətsiz hərəkətlərin təkrarlanmamasına dair çağırış ediblər.
Nazirlər bu çərçivədə Türkiyə və Azərbaycanın suverenliyi, ərazi bütövlüyü və təhlükəsizliyinə güclü dəstəklərini ifadə ediblər və hər iki ölkənin xalqları və hökumətləri ilə tam həmrəy olduqlarını bir daha təsdiqləyiblər.
Onlar Yaxın Şərqdə sabitliyin bütün region və onun xalqlarının tərəqqisi və rifahı üçün zəruri olduğunu vurğulayıblar.
Nazirlər ziddiyyətlərin beynəlxalq hüquqa və BMT Nizamnaməsinin prinsiplərinə uyğun olaraq dialoq vasitəsilə dinc yollarla həllinin vacibliyini vurğulayıblar.
Onlar eskalasiyanın dərhal azaldılması, qarşıdurmaların dayandırılması və dinc həllə doğru aparan yeganə mümkün yol kimi diplomatiyanın və konstruktiv dialoqun həlledici əhəmiyyətini qeyd ediblər.
Nazirlər bütün tərəfləri maksimum təmkin göstərməyə, danışıqlar masasına qayıtmağa və bütün fikir ayrılıqlarının dinc diplomatik vasitələrlə həllinə yönəlmiş xoşməramlı danışıqlarda iştiraka çağırıblar.
Nazirlər qarşıdurmaların davam etməsinin regional sülh və təhlükəsizliyə birbaşa təhdid yaratdığını vurğulayıblar.
Onlar, həmçinin böhranın qlobal ölçülərini diqqətə çatdırıblar. Nazirlər strateji cəhətdən mühüm olan bu bölgədə uzun müddət davam edən qeyri-sabitliyin beynəlxalq sülh və təhlükəsizlik, o cümlədən qlobal enerji bazarları, ticarət marşrutları, ərzaq təhlükəsizliyi və miqrasiya axınlarında potensial pozulmalar baxımından regionun hüdudlarından kənardakı ölkələrə təsir göstərə biləcək ciddi risklər daşıdığını qeyd ediblər.
Onlar bundan əlavə müvafiq BMT qətnamələrinə uyğun olaraq iki dövlət prinsipi əsasında Fələstin münaqişəsinin ədalətli, davamlı və hərtərəfli həllinə və bu kimi ədalətli və davamlı həllin tapılmasına və Fələstin xalqının, xüsusən də Qəzzada üzləşdiyi humanitar iztirablarının aradan qaldırılmasını qarşısına məqsəd qoyan beynəlxalq platformalar çərçivəsində əməkdaşlıq edilməsinə sadiqliklərini yeniləyiblər.
Nazirlər Birləşmiş Millətlər Təşkilatının Nizamnaməsinin məqsəd və prinsiplərinə və beynəlxalq hüquqa sarsılmaz sadiqliklərini bir daha təsdiqləyərək, TDT-nin regionda sülhün və sabitliyin bərpasına yönəlmiş bütün həqiqi beynəlxalq səyləri dəstəkləməyə hazır olduğunu bildiriblər.
Nazirlər məsələni diqqətdə saxlamağa və bu və ortaq narahatlıq doğuran digər əlaqədar məsələlər üzrə TDT çərçivəsində sıx koordinasiyanı davam etdirməyə razılaşıblar.
Nazirlər qətiyyətlə sülh, dialoq və sabitliyə tərəfdar olduqlarını bildiriblər".
jpg_1775472819.jpg)
