Azərbaycan-Çin hərtərəfli münasibətləri dinamik inkişaf edir
"Çin Xalq Respublikası ilə əlaqələrin inkişaf etdirilməsi Azərbaycanın xarici siyasətinin prioritet istiqamətlərindəndir. Məmnunluqla qeyd etmək istərdim ki, son dövrdə Azərbaycan-Çin münasibətləri yeni mərhələyə qədəm qoymuşdur. Aramızdakı fəal dialoq, səmimiyyət və qarşılıqlı etimad şəraitində keçən görüşlərimiz, təmaslarımızın intensivliyi Azərbaycan-Çin əlaqələrinin səviyyəsindən və yüksək dinamikasından xəbər verir".
Prezident İlham Əliyevin sentyabrın 29-da Çin Xalq Respublikasının (ÇXR) Sədri Si Cinpinə ölkəsinin milli bayramı münasibətilə ünvanladığı təbrik məktubunda xüsusilə qeyd etdiyi kimi, tarixi dostluq münasibətlərinə malik iki ölkənin hazırkı əlaqələri özünün ən yüksək zirvəsinə qalxıb. Pekinlə münasibətlərə xüsusi əhəmiyyət verən və yürütdüyü məqsədyönlü siyasət nəticəsində yerləşdiyi strateji coğrafi bölgəni nəqliyyat, enerji qovşağına çevirən Azərbaycanla hərtərəfli əlaqələr qurmaqda dünyanın nəhəng siyasi və iqtisadi güc mərkəzi Çin də maraqlıdır.
Qarşılıqlı etimad
Tarixi İpək yolunun birləşdirdiyi ölkələrimiz hər zaman bir-birilərinin suverenliyini dəstəkləyirlər. Dövlətimiz rəsmən bəyan edir ki, Azərbaycan daim "Vahid Çin" siyasətini dəstəkləyir. Reallıqdır ki, xüsusilə son dövrlər iki ölkə arasında münasibətlər daha da şaxələnərək sürətli inkişaf yoluna qədəm qoyub. Prezident İlham Əliyevin təkcə bu il ərzində Çinə iki dəfə - aprel və avqust aylarında dövlət və işgüzar səfər etməsi, həmçinin Pekinlə Bakı arasında ötən il Birgə Bəyannamənin qəbul edilməsi, cari ildə Birgə Bəyanatın imzalanması buna bariz nümunədir. Ələlxüsus iki ölkə lideri İlham Əliyev və Si Cinpin arasındakı qarşılıqlı etimada əsaslanan səmimi dostluq münasibətləri əlaqələrin daha da möhkəmlənməsinə əhəmiyyətli töhfələr verir. Bu il avqustun 31-də Çinin Tiencin şəhərində Prezident İlham Əliyevin Çin Sədri Si Cinpin ilə görüşü zamanı dövlətimizin başçısını "mənim əziz dostum" deyərək salamlayan Çin Sədri bu səmimi müraciəti ilə həm də İlham Əliyevə göstərdiyi dərin hörmət və ehtiramı nümayiş etdirdi.
Ölkəmizin bütün əlamətdar günlərində Azərbaycana təbrik məktubları ünvanlayan Si Cinpinin İlham Əliyevi son prezident seçkiləri münasibətilə ilk təbrik edən liderlərdən biri olması da təsadüfi xarakter daşımırdı.
"Mən Çin-Azərbaycan münasibətlərinə böyük əhəmiyyət verirəm, bizim işgüzar münasibətlərimizi və şəxsi dostluğumuzu yüksək qiymətləndirirəm. Sizinlə birlikdə ikitərəfli münasibətlərin inkişafı və bütün sahələrdə əməkdaşlığın yeni səviyyəyə yüksəldilməsində birgə səylər göstərməyə hazıram", - deyə təbrik məktubunda Çin lideri bildirirdi.
Bütün bunlar isə Çin-Azərbaycan əlaqələrinin dostluğa və səmimiyyətə dayanan hərtərəfli inkişafına mühüm təkanlar verir.
Əməkdaşlıq üçün geniş imkanlar
2024-cü il iyulun 3-də Şanxay Əməkdaşlıq Təşkilatının Astanada keçirilən Zirvə toplantısı çərçivəsində "Azərbaycan Respublikası ilə Çin Xalq Respublikası arasında strateji tərəfdaşlığın qurulması haqqında Birgə Bəyannamə" qəbul olunub. Bununla da 1992-ci ildən diplomatik əlaqələrə malik ölkələrimiz gələcək əməkdaşlıqlarına geniş imkanlar açıblar.
Prezident İlham Əliyevin Çinə dövlət səfəri çərçivəsində bu il aprelin 23-də Pekində "Azərbaycan Respublikası ilə Çin Xalq Respublikası arasında hərtərəfli strateji tərəfdaşlıq əlaqələrinin qurulması haqqında Birgə Bəyanat" imzalanıb. Adıçəkilən bəyanatda bildirilir ki, tərəflər xalqlarının seçdiyi və milli şərtlərə uyğun olan inkişaf yolunu seçməkdə bir-birini möhkəm dəstəkləyir, hər iki ölkənin təməl maraqlarının, suverenliyinin, təhlükəsizliyinin və ərazi bütövlüyünün qorunmasında bir-birinə qətiyyətli dəstək verirlər.
Azərbaycan-Çin arasında iqtisadi əlaqələr çoxşaxəliliyi və inkişafı ilə seçilir: ticarət dövriyyəsi artır, energetika, həmçinin bərpaolunan enerji, rəqəmsallaşma sahələrində əməkdaşlıq genişlənir. Həmçinin vizasız gediş-gəlişə dair sənədin qüvvəyə minməsi turizmin və bir çox digər sahənin inkişafına rəvac verəcək.
Prezident İlham Əliyev Çin Sədri Si Cinpinin dəvəti ilə cari ilin avqust ayında bu ölkədə işgüzar səfərdə olduğu zaman Tiencin şəhərində iki ölkə liderinin görüşü keçirildi. Çin Sədri Si Cinpin "Bir kəmər, bir yol" layihəsi çərçivəsində də Azərbaycan-Çin əməkdaşlığının möhkəmləndiyini deyərək, Azərbaycan ərazisindən Çin mallarının daşınmasının əhəmiyyətini qeyd etdi, bu xüsusda Trans-Xəzər marşrutunun önəminə toxundu. ÇXR Sədri bildirdi ki, ölkəsi Azərbaycanın Şanxay Əməkdaşlıq Təşkilatı ilə əlaqələrinin genişlənməsini dəstəkləyir.
Öz növbəsində Prezident İlham Əliyev diqqətə çatdırdı ki, ölkələrimiz arasındakı ticarət münasibətlərində əsaslı artım müşahidə olunur. Dövlətimizin başçısı "Bir kəmər, bir yol" layihəsinə toxunaraq, onun vacib tərkib hissəsi olan və Azərbaycan ərazisindən keçən Orta dəhliz vasitəsilə daşımaların, xüsusilə Çin yüklərinin daşınmasının artmasını bu dəhlizin səmərəliliyinin və cəlbediciliyinin nümunəsi kimi qiymətləndirdi.
Hörmət və dəstək
Göründüyü kimi, Azərbaycan-Çin əlaqələri hərtərəfli şəkildə inkişaf edir və qarşıda da münasibətlərimizin dərinləşməsi üçün geniş perspektivlər görünür.
ÇXR-in milli bayramı münasibətilə sentyabrın 29-da Si Cinpinə göndərdiyi təbrik məktubunda Prezident İlham Əliyev vurğulayıb: "Bu gün Azərbaycan ilə Çin arasında qarşılıqlı etimad, hörmət və dəstəyə əsaslanan münasibətlərin hərtərəfli strateji tərəfdaşlıq müstəvisində inkişafı məmnunluq doğurur".
Dövlətimizin başçısı əlavə edib ki, siyasi, iqtisadi-ticari, sənaye, enerji, nəqliyyat-kommunikasiya, investisiya, kənd təsərrüfatı, humanitar və digər sahələrdə əməkdaşlığımızın gündən-günə genişlənməsi və yeni məzmunla zənginləşməsi bizi sevindirir: "Əminəm ki, bir-birinə böyük rəğbət bəsləyən xalqlarımızın rifahı naminə mövcud imkanlardan yararlanaraq birgə səylərimizlə Azərbaycan-Çin ənənəvi dostluq əlaqələrinin daha da möhkəmlənməsinə, hərtərəfli strateji tərəfdaşlığımızın daha da dərinləşməsinə nail olacağıq".
Dünyanın nəhəng siyasi və iqtisadi gücə malik mərkəzlərindən olan Çinlə bu cür səmimi və yüksəksəviyyəli münasibətlərin qurulması Azərbaycanı dünyada nüfuzlu ölkəyə çevirən Prezident İlham Əliyevin yürütdüyü məqsədyönlü xarici siyasətin nəticəsidir.
Yasəmən MUSAYEVA,
"Azərbaycan"
