Sentyabrın 12-də Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili ölkəmizdə səfərdə olan Kanada Parlamentinin Azərbaycanla dostluq qrupunun üzvü, İcmalar Palatasının deputatı Çandra Aryanın başçılıq etdiyi nümayəndə heyəti ilə görüşüb.
Milli Məclisin Mətbuat və ictimaiyyətlə əlaqələr şöbəsindən AZƏRTAC-a bildirilib ki, görüşdə Kanada ilə parlamentlərarası əlaqələr üzrə işçi qrupun üzvü Tahir Mirkişili həm Kanada, həm də Azərbaycan parlamentlərində fəaliyyət göstərən dostluq qruplarının münasibətlərimizin inkişafındakı rolundan danışıb. O diqqətə çatdırıb ki, Azərbaycan öz torpaqlarını Ermənistanın işğalından azad etdikdən sonra qarşı tərəfə beynəlxalq hüququn 5 əsas prinsipi əsasında sülh müqaviləsinin imzalanmasını və münasibətlərin normallaşdırılmasını təklif edib. Çünki Azərbaycan gələcəyə baxır və sülh tərəfdarıdır. Lakin Ermənistan qeyri-konstruktiv mövqe tutaraq bu prosesə müxtəlif vasitələrlə maneələr törədir.
Bildirilib ki, son zamanlar Kanadada Azərbaycan əleyhinə verilən bəyanatlar təəssüf doğurur. Azərbaycan-Kanada parlamentlərarası əlaqələr üzrə işçi qrupu bir neçə gün bundan əvvəl Kanada parlamentində Azərbaycan əleyhinə verilmiş sonuncu bəyanatla bağlı etirazını bildirib.
Söhbət zamanı Kanada ilə parlamentlərarası əlaqələr üzrə işçi qrupun rəhbəri Tural Gəncəliyev qonaqlara Birinci və İkinci Qarabağ müharibələri, Ermənistanın cinayət əməlləri, Azərbaycanın Cənubi Qafqaz regionundakı rolu barədə ətraflı məlumat verib.
Kanada parlamentinin Azərbaycanla dostluq qrupunun üzvü, İcmalar Palatasının deputatı Çandra Arya Azərbaycana səfərindən məmnunluğunu bildirərək, iki ölkənin parlamentləri arasında, həmçinin iqtisadiyyat və digər sahələrdə əlaqələrin inkişaf etdirilməsi üçün qarşılıqlı səfərlərin artırılmasının vacibliyindən danışıb. O, multikultural ölkə olan Azərbaycanın iqtisadi inkişafı, Kanadada ictimai-siyasi proseslər və qarşılıqlı maraq doğuran digər məsələlər barədə fikirlərini bölüşüb.
_1735479144jpeg_1735508922.jpeg)
