Amerika Birləşmiş Ştatlarının vitse-prezidenti Ceyms Devid Vensin Azərbaycana səfəri və iki ölkənin hökumətləri arasında Strateji Tərəfdaşlıq haqqında Xartiyanın imzalanması tarixi hadisələrdir. Dünyanın ən güclü dövləti olan ABŞ-nin Azərbaycanla siyasi, iqtisadi əlaqələrin qurulmasına böyük maraq göstərməsi ölkəmizin diplomatiyasının böyük uğurudur.
Bakı Dövlət Universitetinin kafedra müdiri, professor Kamilə Əliyeva qəzetimizə açıqlamasında xatırlatdı ki, ötən il avqustun 8-də Vaşinqtonda Azərbaycan Prezidenti İlham Əliyev və ABŞ Prezidenti Donald Tramp arasında imzalanmış, Birgə Bəyannaməyə əsasən, Strateji Tərəfdaşlıq haqqında Xartiyanın hazırlanması üçün İşçi Qrupu yaradılıb və 6 ay ərzində sənəd hazırlanıb. Dörd bölümdən ibarət Strateji Tərəfdaşlıq haqqında Xartiyada iki dövlət arasında bir çox sahələrdə, eləcə də enerji, ticarət və tranzit sahələrində əməkdaşlığın genişləndirilməsi nəzərdə tutulur. "Trans-Xəzər Nəqliyyat Dəhlizini əsas götürərək quru, dəniz və hava nəqliyyatı infrastrukturlarının inkişafı, ticarətin asanlaşdırılması, gömrük nəzarəti və digər sahələrdə əməkdaşlıq əlaqələrinin qurulması barədə tərəflər arasında razılıq əldə olunub. Eyni zamanda Beynəlxalq Sülh və Rifah Naminə Tramp marşrutunun (TRIPP) əhəmiyyəti qeyd edilir. İqtisadi sərmayələr, o cümlədən süni intellekt, təhlükəsizlik və enerji təhlükəsizliyi sahələrində də əməkdaşlığın yeni konturları hazırlanıb və əlaqələrin genişləndirilməsi nəzərdə tutulub", - deyə o bildirib.
Ekspert qeyd edib ki, sənəd imzalandıqdan sonra Prezident İlham Əliyev və vitse-prezident Ceyms Vens mətbuata bəyanatla çıxış edərək bir sıra mesajlar veriblər. Dövlətimizin başçısı çıxışında Azərbaycanla Ermənistan arasında sülhün yaranması prosesində ABŞ Prezidenti Trampın böyük rolu olduğunu vurğulayıb, eyni zamanda bu gün Azərbaycan və Amerika arasında imzalanmış Strateji Tərəfdaşlıq haqqında Xartiyanın iki dövlət arasında əlaqələri yüksək səviyyəyə çatdıracağını bildirib. Azərbaycanın regionda sülhün yaranmasına təşəbbüs göstərən bir dövlət olduğunu Prezident İlham Əliyev xüsusi vurğulayıb.
K.Əliyeva dedi ki, bu, Prezident İlham Əliyevin Azərbaycanla Ermənistan arasında sülhün əbədi bərqərar olunması istiqamətində böyük səy göstərdiyini bir daha sübut edir: "ABŞ Azərbaycanın sülhməramlı addımını dəstəkləyir. Prezident İlham Əliyevin atdığı bütün addımlar dövlətimizin və xalqımızın milli maraqlarına xidmət edir".
Ekspert bildirdi ki, ABŞ-nin vitse-prezidenti Ceyms Devid Vens də Vaşinqtonla Bakı arasında əlaqələrin strateji tərəfdaşlıq səviyyəsinə yüksəlməsinə böyük qiymət verib və Azərbaycanın yaxın Şərqdə dövlətlərarası münasibətlərin normallaşdırılmasında böyük töhfə verə biləcəyini xüsusi vurğulayıb.
Əsmər QABİLQIZI,
"Azərbaycan"
