İtkin şəxslər məsələsi beynəlxalq humanitar hüququn, insan hüquqlarının, cinayət və mülki qanunvericiliyin kəsişməsində dayanır. Lakin hər şeydən əvvəl bu, humanitar problemdir. Çünki hər bir itkin şəxsin arxasında illərlə qeyri-müəyyənlik içində qala bilən qohumları dayanır.
AZƏRTAC xəbər verir ki, Tacikistanın Baş Prokurorluğunun baş prokuroru Şohin Talbakzoda Əsir və itkin düşmüş, girov götürülmüş vətəndaşlarla əlaqədar Dövlət Komissiyasının (DK) təşkilatçılığı ilə “İtkin düşmüş şəxslər probleminin həllində etimadın gücləndirilməsi və effektiv mexanizmlərin inkişaf etdirilməsi" mövzusunda Bakı Dialoqu formatında IV beynəlxalq konfransın ikinci günündə keçirilən "Sülh proseslərində itkin şəxslər məsələsinin həlli: humanitar əməkdaşlıq və etimadın yaradılması" adlı panel sessiyada çıxış edərkən deyib. O bildirib ki, Azərbaycanın təşəbbüsü ilə formalaşdırılan İtkin düşmüş şəxslərlə bağlı Bakı Dialoqu beynəlxalq ictimaiyyətin bu humanitar faciəyə diqqətinin cəlb olunmasına xidmət edən mühüm platformaya çevrilib.
“Bizim fikrimizcə, həlak olmuş şəxslərin qalıqlarının aşkar edilməsi, onların ləyaqətlə dəfn olunması, ailələrin baş vermiş hadisələr barədə həqiqəti bilmək hüququnun təmin edilməsi beynəlxalq humanitar hüququn ayrılmaz hissəsidir”, - deyə Ş.Talbakzoda bildirib. Qeyd edib ki, itkin şəxslər probleminin bəzən hüquqi müzakirələrin hüdudlarından kənarda qalan daha bir ölçüsü var. Bu, dünyanın insani ölçüsüdür. İtkin şəxslərin identifikasiyasına müasir yanaşma hüquqi mexanizmləri, axtarış işlərini, məhkəmə-tibbi, kriminalistik, antropoloji, genetik, informasiya texnologiyalarını və beynəlxalq əməkdaşlığı birləşdirməlidir.
“Əsas vəzifə yalnız naməlum insanın kimliyini müəyyən etməkdən ibarət deyil. Bizim ümumi vəzifəmiz elə bir sistem yaratmaqdır ki, aşkar edilmiş hər bir obyekt lazımi qaydada qorunsun və tədqiq edilsin. İşin hər bir mərhələsi sənədləşdirilsin, əldə olunan nəticə elmi cəhətdən əsaslandırılsın, hüquqi baxımdan möhkəmləndirilsin və itkin şəxslərin ailələri üçün mümkün qədər faydalı olsun”, - deyə o qeyd edib.
Ş.Talbakzoda bildirib ki, itkin şəxslər probleminin həlli dövlət qurumlarının qarşılıqlı fəaliyyətinə, müasir elmi metodların tətbiqinə, məlumat mübadiləsinə və beynəlxalq əməkdaşlığa əsaslanan kompleks yanaşma tələb edir. Həmçinin itkin şəxslərlə bağlı vahid, mühafizə olunan informasiya sisteminin yaradılması, axtarış, məhkəmə-tibbi, kriminalistik, genetik və informasiya texnologiyaları sahəsində qabaqcıl təcrübə və imkanlardan istifadə, regional və beynəlxalq əməkdaşlığın genişləndirilməsi və institusional əməkdaşlığın gücləndirilməsi vacibdir.
O, konfransın açıq peşəkar dialoq, praktiki təcrübə mübadiləsi və yeni əməkdaşlıq istiqamətlərinin formalaşdırılması üçün səmərəli platforma olduğunu bildirib.
jpg_1790976482.jpg)
jpeg_1791455959.jpeg)
