Bakıda keçirilən Azərbaycan-Slovakiya biznes- forumu yeni işgüzar əlaqələr qurmaq, investisiyaları təşviq etmək və birgə layihələr hazırlamaq üçün əla bir imkan yaradır.
AZƏRTAC xəbər verir ki, bu sözləri Slovakiyanın Baş nazirinin müavini - iqtisadiyyat naziri Denisa Sakova Azərbaycan-Slovakiya biznes-forumunda deyib.
Nazir bildirib ki, hökumətlərimizin və biznes dairələrimizin nümayəndələrinin geniş tərkibdə iştirakı iqtisadi əməkdaşlığı genişləndirməyə dair ortaq sadiqliyimizi əks etdirir. 2024-cü ildə imzalanmış strateji tərəfdaşlıq haqqında birgə bəyannamə ikitərəfli münasibətlərimizdə yeni bir səhifə açdı: “Hazırda bu tərəfdaşlıq artıq energetika, müdafiə sənayesi, investisiya, həmçinin azad edilmiş ərazilərin yenidən qurulmasına dəstək layihələri kimi sahələrdə real nəticələr verir. Slovakiyanın energetika, infrastruktur, mühəndislik, müdafiə, su idarəçiliyi, informasiya texnologiyaları, qida sənayesi və qabaqcıl sənaye həlləri daxil olmaqla, əsas sektorları təmsil edən 25 şirkətdən ibarət nümayəndə heyəti ilə təmsil olunması məni xüsusilə məmnun edir. Onların iştirakı həm Slovakiya sənayesinin rəqabət qabiliyyətini, həm də Azərbaycan biznesi ilə uzunmüddətli tərəfdaşlıq qurmaqda maraqlı olduğunu nümayiş etdirir. Azərbaycan Slovakiya üçün mühüm tərəfdaş, həmçinin Avropanı Cənubi Qafqaz və Mərkəzi Asiya ilə birləşdirən mühüm körpüdür. Günümüzün dəyişən geosiyasi mühitində davamlı tədarük zəncirləri, səmərəli nəqliyyat dəhlizləri və təhlükəsiz enerji təchizatı strateji prioritetlərə çevrilib".
Denisa Sakova qeyd edib ki, Azərbaycan nəinki etibarlı enerji tərəfdaşı, həm də regionları və bazarları birləşdirən mühüm logistika qovşağı kimi getdikcə daha vacib rol oynayır: “Energetika iqtisadi əməkdaşlığımızın əsas sütunlarından biri olaraq qalır. Təbii qaz mənbələrinin və nəql marşrutlarının şaxələndirilməsi həm Slovakiya, həm də Avropa üçün olduqca vacibdir və biz Azərbaycanın regionumuzun enerji təhlükəsizliyinin gücləndirilməsinə verdiyi töhfəni yüksək qiymətləndiririk. Eyni zamanda, əməkdaşlığımız təkcə energetika sahəsi ilə məhdudlaşmır. Slovakiya şirkətləri artıq Azərbaycanın müasirləşdirilməsinə öz töhfələrini verir və biz Qarabağın yenidən qurulmasında iştirak etmək imkanını çox yüksək dəyərləndiririk. Baş Qərvənddəki "Ağıllı kənd" layihəsi Slovakiya texnologiyalarının və təcrübəsinin insanların həyatını yaxşılaşdıran praktiki həlləri necə təqdim edə biləcəyinə dair mükəmməl bir nümunədir”.
"Biz, həmçinin infrastruktur, rəqəmsallaşma, sənaye istehsalı, su idarəçiliyi və qabaqcıl texnologiyalar sahələrində də mühüm imkanlar görürük. Slovakiya güclü mühəndislik təcrübəsinə, yüksəkixtisaslı işçi qüvvəsinə və getdikcə artan innovasiya potensialına malik müasir sənaye iqtisadiyyatı olan ölkədir. Bizim şirkətlər yüksək dəyərli həllər təklif edir və Azərbaycanın gələcək inkişafında etibarlı tərəfdaş olmağa hazırdırlar. Əminəm ki, bugünkü forum hər iki ölkənin şirkətlərinə fayda verəcək yeni biznes imkanları, investisiyalar və tərəfdaşlıqlar yaradacaqdır. Hökumətlər əlverişli şərait yarada bilər, lakin bu imkanları davamlı uğura çevirəcək şəxslər məhz sizlər - sahibkarlar, investorlar və novatorlarsınız", - deyə nazir əlavə edib.
