“Artıq məlum olduğu kimi, Türk Dövlətləri Parlament Assambleyasının (TÜRKPA) Xarici Əlaqələr komissiyalarının toplantılarının keçirilməsinə dair təşəbbüsünün ideya müəllifi Azərbaycan Prezidenti İlham Əliyevdir. Məhz bu təklifə əsasən, biz ötən il ilk iclasımızı Bakıda, Milli Məclisdə keçirdik və bütün məsələləri müzakirə etdikdən sonra ikinci iclasın Türkiyədə təşkilinə dair qərar aldıq. Bu gün burada TÜRKPA-nın Xarici Əlaqələr komissiyaları bütün spektr məsələləri müzakirə etdilər və ən əsası, beynəlxalq münasibətlərin böhran içində olduğu, beynəlxalq təşkilatların faktiki olaraq öz əhəmiyyətini, təsir gücünü itirdiyi bu mürəkkəb dövrdə Türk dövlətlərinin Xarici Əlaqələr Komitəsi, TÜRKPA, Türk dövlətlərinin təşkilatlanması və nəhayət zirvədə dayanan Türk Dövlətləri Təşkilatının işi ən yüksək səviyyədə özünü göstərir. Xarici Əlaqələr Komitəsinin nümayəndələri olaraq biz də burada məhz bu təşkilatların, xüsusilə parlament təmsilçiləri olaraq TÜRKPA-nın daha yüksək səviyyədə, səmərəli və əlaqəli fəaliyyətinin təşkil olunması ilə bağlı fikir mübadiləsi apardıq. Bütün iştirakçılar Azərbaycanın nailiyyətləri, torpaqlarını azad etməsi və sonra o ərazilərdə gördüyü işlər, ölkəmizin artıq dünyada xüsusi rola və çəkiyə sahib olması ilə bağlı fikirlərini ifadə etdilər. Həm Türkiyə tərəfi, həm də digər türkdilli ölkələrdən olan qardaşlarımız ölkələrimiz arasındakı əlaqələrin genişləndirilməsi ilə bağlı öz mövqelərini nümayiş etdirdilər. Tədbirdə bir çox maraq doğuran məsələ müzakirə olundu”.
AZƏRTAC xəbər verir ki, bu fikirləri İstanbulda Türk Dövlətləri Parlament Assambleyasının (TÜRKPA) Xarici Əlaqələr komissiyalarının toplantısı ilə bağlı Azərbaycan mətbuatına açıqlamasında Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov bildirib.
Dünya nizamının tamamilə dəyişdiyini qeyd edən Səməd Seyidov deyib: “Artıq beynəlxalq hüquq təəssüflər olsun ki, işləmir. Bu baxımdan Türk Dövlətləri Təşkilatı çərçivəsində bizim birgə fəaliyyətimiz və inkişafımız, xüsusilə parlament olaraq TÜRKPA-nın tərkibində fəaliyyətinin genişləndirilməsi dünya üçün xeyirlidir. Ən əsası isə Türk dövlətləri üçün xüsusi əhəmiyyət daşıyan bir məsələdir. Hesab edirəm ki, burada aparılan müzakirələr bizim düz yolda olduğumuzu göstərir. Bu fəaliyyətlər faktiki olaraq türkdilli ölkələr üçün, həm də dünyaya beynəlxalq münasibətlərin yeni prinsiplər əsasında təşkil olunmasını təqdim edir. Bu tövsiyələrin vacib olduğunu hesab edirəm. Çünki biz bunun davamı olaraq Azərbaycanda ən yüksək səviyyədə Türk dövlətlərinin Zirvə toplantısının şahidi olacağıq. Macarıstanda qeyri-rəsmi Sammit keçiriləcək, Mərkəzi Asiyada toplantılar təşkil olunacaq. Bu, onu göstərir ki, beynəlxalq münasibətlərin dürüst, açıq, milli maraqlar çərçivəsində təşkil olunması iştirakçıların inkişafına, onların sabit və təhlükəsiz həyat tərzinin təşkil olunmasına və ümumiyyətlə dünyada nüfuzunun, təsirinin, gücünün artırılmasına xidmət edən olduqca vacib məsələdir. İndiyədək, xüsusilə Avropa ölkələrindən görülmüş ikili standartlar, “ağa qara demək”, ümumbəşəri dəyərlərdən sui-istifadə edərək xalqlara təsir göstərmək kimi məsələlər sonda böyük böhranlara yol açır. Biz bu gün bu böhranları Avropada, Qərb dünyasının daxilində müşahidə edirik. Bu, bizə düz yolda olduğumuz və siyasətimizi bu istiqamətdə davam etdirməyimizlə bağlı ciddi bir mesaj verir”.
