Aprelin 8-də Yeni Azərbaycan Partiyasının (YAP) Səbail rayon ərazi təşkilatlarının sədrləri ilə görüş olub.
AZƏRTAC xəbər verir ki, tədbirdə əvvəlcə Ümummilli Lider Heydər Əliyevin və Vətənin müstəqilliyi uğrunda canlarından keçmiş qəhrəman şəhidlərimizin xatirəsi bir dəqiqəlik sükutla yad edilib, Dövlət Himni səsləndirilib.
YAP Səbail rayon təşkilatının sədri Muxtar Nağıyev çıxış edərək Partiyanın zəngin tarixindən və ölkənin ictimai-siyasi həyatındakı mühüm rolundan bəhs edib. O, Ulu Öndər Heydər Əliyevin mürəkkəb və taleyüklü dövrdə təşkilatı yaradaraq dövlətçiliyin möhkəmləndirilməsi istiqamətində gördüyü işləri xatırladıb. Bildirilib ki, bu siyasi kurs Prezident, Yeni Azərbaycan Partiyasının Sədri İlham Əliyev tərəfindən bu gün uğurla davam etdirilir, ölkəmiz mühüm nailiyyətlərə imza atır. M.Nağıyev çıxışında, həmçinin rayon üzrə ərazi təşkilatlarının fəaliyyətinə toxunaraq onların partiyanın ideoloji xəttinin yerli səviyyədə təbliğində və təşkili işlərində mühüm rol oynadığını bildirib.
Partiyanın keçdiyi zəngin inkişaf yolundan, müasir dövrdə əldə olunan uğurlardan danışan YAP Mərkəzi Aparatının Təşkilat şöbəsinin müdir müavini Rafael Gülməmmədov Səbail rayon təşkilatının fəaliyyətini yüksək qiymətləndirərək həyata keçirilən təşəbbüslərin partiyanın məqsəd və prinsiplərinə uyğun şəkildə uğurla reallaşdırıldığını vurğulayıb. Diqqətə çatdırıb ki, ərazi təşkilatları partiya ilə cəmiyyət arasında mühüm körpü rolunu oynayır, vətəndaşların partiyaya cəlb olunmasında, həmçinin partiya əqidəsi ətrafında sıx birləşmənin təmin edilməsində xüsusi əhəmiyyət daşıyır.
Sonra rayon ərazi təşkilatlarının sədrləri və rayon təşkilatının məsul şəxsləri hesabat məruzələri ilə çıxış ediblər. Qeyd edilib ki, son dövrlərdə rayon üzrə ərazi təşkilatları tərəfindən həyata keçirilən tədbirlər daha da genişləndirilib, partiyanın ideoloji xəttinin təbliği istiqamətində məqsədyönlü işlər aparılıb. Vətəndaşlarla iş, onların müraciətlərinin operativ şəkildə araşdırılması, gənclərin partiya sıralarına cəlb olunması istiqamətində ardıcıl fəaliyyət davam etdirilir.
Tədbirin sonunda partiyanın və rayonun ictimai-siyasi həyatında fərqlənən bir qrup şəxsə təşəkkürnamə və hədiyyələr təqdim olunub.
