Avropa Komissiyası və Avropa Şurasının birgə təşkilatçılığı ilə Brüsseldə müsəlmanlara qarşı nifrət/irqçilik üzrə əlaqələndirmə görüş keçirilir. 15 Mart – İslamofobiya ilə Beynəlxalq Mübarizə Günü ərəfəsində keçirilən tədbirə Avropa Şurasına üzv dövlətlərdən mövzu üzrə ixtisaslaşmış ekspertlər qatılıblar.
Bakı Beynəlxalq Multikulturalizm Mərkəzinin Mətbuat xidmətindən AZƏRTAC-a verilən məlumata görə, görüşdə çıxış edən Mərkəzin icraçı direktoru Rəvan Həsənov bildirib ki, İslam mədəniyyətinin bir parçası olan Azərbaycan daim mədəniyyətlər və dinlərarası dialoqda aparıcı rol oynayır. O vurğulayıb ki, Azərbaycan tarixən müxtəlif sivilizasiyaların qovuşduğu, müxtəlif etnik qruplar, dinlər və mədəniyyətlərin birgə sülh şəraitində yaşadığı məkan olub. Burada İslam dini ilə yanaşı, xristianlıq, yəhudilik və digər dinlərin nümayəndələri bərabərhüquqlu yaşayır, ölkədə dinlərarası tolerantlıq siyasəti yüksək səviyyədə qorunur. Azərbaycan İslam həmrəyliyinin möhkəmləndirilməsi ilə yanaşı, multikulturalizm və qarşılıqlı hörmət prinsipinə əsaslanan siyasət həyata keçirir.
O, islamofobiya ilə mübarizədə Bakı Beynəlxalq Multikulturalizm Mərkəzinin fəaliyyətinə də diqqət çəkib. Bildirib ki, dünyada dinlər və mədəniyyətlər arasında qarşılıqlı anlaşmanı gücləndirmək, müxtəlif icmalar arasında dialoqu təşviq etmək Mərkəzin əsas fəaliyyət istiqamətlərinə daxildir. Bu çərçivədə mərkəz İslamofobiya ilə mübarizə istiqamətində mühüm addımlar atır. Beynəlxalq miqyasda İslamofobiya ilə mübarizəyə yönəlmiş konfranslar və forumlar təşkil edir. Belə tədbirlərin keçirilməsində əsas hədəf islamofobiyadan əziyyət çəkən insanların səsini dünyaya çatdırmaqdır. Həmin tədbirlərə dünyanın müxtəlif ölkələrindən alimlər, din xadimləri, qeyri-hökumət təşkilatlarının nümayəndələri və siyasətçilər qatılır, problemin cəmiyyətə və beynəlxalq münasibətlərə təsirini və həlli yollarını müzakirə edirlər.
Rəvan Həsənov vurğulayıb ki, Azərbaycan hər zaman dini ayrı-seçkiliyin əleyhinə olub, bu siyasətini indi də davam etdirir. Ölkəmiz öz multikulturalizm siyasəti və bu sahədə fəaliyyət göstərən institutları ilə İslamofobiyaya qarşı qlobal mübarizəyə mühüm töhfələr verir.
