Qahirədə Birləşmiş Millətlər Təşkilatının (BMT) Misir üzrə Məskunlaşma Proqramı (UN-Habitat Egypt), onun Ərəb Dövlətləri üzrə Regional Ofisi (ROAS) və Ümumdünya Şəhərsalma Forumunun (WUF) Katibliyi ilə əməkdaşlıq çərçivəsində növbəti virtual seminar keçirilib. Azərbaycanın da təmsil olunduğu tədbirdə BMT-nin və ərəb regionunun müvafiq təşkilatlarının təmsilçiləri, tədqiqat mərkəzlərinin və ictimai təşkilatların nümayəndələri iştirak edib.
AZƏRTAC xəbər verir ki, seminar “Misir Şəhərsalma Həftəsi: Misirdən Azərbaycana” adlı təşəbbüsün bir hissəsidir. Bu təşəbbüs Qahirənin 2024-cü ilin noyabrında ev sahibliyi etdiyi Ümumdünya Şəhərsalma Forumunun (WUF12) 12-ci Sessiyasının nəticələrini inkişaf etdirməyi və mayın 17-dən 22-dək Bakıda keçiriləcək WUF13-ə hazırlıqda effektiv və əlaqələndirilmiş regional iştirakı təmin etməyi hədəfləyib.
Seminarda Məskunlaşma Proqramının icraçı direktoru Anaklaudia Rosbax, Azərbaycanın Misirdəki səfiri Elxan Poluxov, BMT Məskunlaşma Proqramının Ərəb dövlətləri üzrə regional direktoru, xanım Rania Hedaya, BMT Məskunlaşma Proqramının Misir üzrə ölkə təmsilçisi Əhməd Rızk çıxış ediblər.
Səfir Elxan Poluxov Ümumdünya Şəhərsalma Forumunun bu sahədə dialoq və təcrübə mübadiləsi üçün əsas platforma kimi qlobal əhəmiyyətini vurğulayıb. Qeyd olunub ki, hazırda dünyada, həmçinin məskunlaşma ilə bağlı problemlər var. Bu məsələlər altı gün davam edəcək beynəlxalq forumun əsas müzakirə mövzularından olacaq.
Dünya Şəhərsalma Forumu (WUF13) çərçivəsində açılış və bağlanış sessiyaları, müxtəlif toplantılar, dialoqlar, xüsusi sessiyalar, dəyirmi masalar və genişləndirilmiş Şəhər Sərgisi daxil olmaqla yüzlərlə tədbirin təşkili nəzərdə tutulur. Forum iştirakçılar üçün şəbəkələşmə və qeyri-rəsmi fikir mübadiləsi imkanları yaradacaq.
WUF13 dünyanın müxtəlif ölkələrindən praktik həllərin və ən yaxşı təcrübələrin nümayiş etdirilməsi üçün mühüm platforma rolunu oynayacaq. Tədbir çərçivəsində mənzil böhranının aradan qaldırılmasına yönəlmiş innovativ yanaşmalar, uğur hekayələri və genişmiqyaslı tətbiq oluna bilən modellər təqdim ediləcək. Bu təcrübələrin ölkələrin öz milli və yerli kontekstlərinə uyğun şəkildə tətbiqi imkanları müzakirə olunacaq.
Forumdan əvvəl keçiriləcək Yeni Şəhər Gündəliyi üzrə Nazirlər Görüşü son on ildə əldə edilmiş irəliləyişin qiymətləndirilməsi və 2036-cı ilədək sənədin tam icrası üçün prioritet istiqamətlərin müəyyənləşdirilməsi baxımından əhəmiyyət daşıyır. Görüşdə WUF13-ün mövzusuna uyğun olaraq mənzil məsələlərinə xüsusi diqqət yetiriləcək, əsas nailiyyətlər və mövcud çağırışlar müzakirə olunacaq, gələcək fəaliyyət istiqamətləri müəyyənləşdiriləcək.
Nazirlər Görüşünün, həmçinin 2026-cı ildə BMT Baş Assambleyasında keçiriləcək Yeni Şəhər Gündəliyinin ortamüddətli icmalına hazırlıq prosesinə töhfə verəcəyi və WUF13-ün fəaliyyətə yönəlmiş, inklüziv yanaşmasını daha da gücləndirəcəyi gözlənilir.
Qeyd olunub ki, bu seminar Azərbaycanın may ayında WUF13-a ev sahibliyi etməyə hazırlaşdığı bir vaxtda mühüm rol oynayır. Səfir, həmçinin tərəfdaşları Bakıda qlobal şəhər dialoqunda fəal iştiraka dəvət edib.
Diplomat çıxışının sonunda forumun Bakıda keçirilməsinin əhəmiyyətini vurğulayıb. Qeyd olunub ki, Mərkəzi Asiya və Cənubi Qafqaz regionunda ilk dəfə keçiriləcək Ümumdünya Şəhərsalma Forumu (WUF13) regionun dayanıqlı şəhər gələcəyinin formalaşdırılmasında səsinin daha güclü eşidilməsinə imkan yaradır.
Neft paytaxtından “ağıllı” və ekoloji məsuliyyətli şəhərə çevrilən Bakı dayanıqlı mobilliyin inkişafı, UNESCO-nun Dünya İrsi Siyahısına daxil edilmiş tarixi irsin qorunması və insan mərkəzli şəhərsalma yanaşmalarına investisiyaların artırılması istiqamətində mühüm addımlar atır.
Seminarın sonunda iştirakçıların sualları cavablandırılıb.
19 (1)jpg_1771885865.jpg)
