Texnoloji əməkdaşlığın sürətli inkişafı fonunda Çin və Azərbaycan elm və təhsil sahəsindəki tərəfdaşlığda yeni mərhələyə qədəm qoyur. Azərbaycanda süni intellekt texnologiyalarının tətbiqi və inkişafı üçün əlverişli şərait yaradılıb.
Bu barədə AZƏRTAC-a eksklüziv müsahibəsində “Bir kəmər, bir yol” Elmi və Texnologiya üzrə Alyansın baş katibinin müavini, Lançjou Universitetinin Mərkəzi Asiya Araşdırmaları İnstitutunun dəvətli professoru Renyin Li söhbət açıb.
Professor Li vurğulayıb ki, Azərbaycan Milli Elmlər Akademiyasının (AMEA) 80 illik yubileyinə həsr olunmuş iclasda iştirak etmək onun üçün böyük şərəf olub. O, Azərbaycanın rəqəmsal və innovativ texnologiyalara yanaşmasının mütərəqqi olduğunu şəxsən müşahidə etdiyini bildirib.
“Prezident İlham Əliyev çıxışında süni intellektin, rəqəmsal texnologiyaların və məlumatların rəqəmsallaşdırılmasının əhəmiyyətini xüsusi qeyd etdi. Bu, çox önəmli bir mesajdır. Çinli dost və alim kimi mən Azərbaycanın bu sahələrdə böyük potensiala malik olduğunu görürəm. Azərbaycan süni intellektin inkişafı üçün əhəmiyyətli imkanlara sahibdir”, — deyə professor bildirib.
Renyin Li əlavə edib ki, Çinin artıq bir neçə şəhərində Azərbaycan Ticarət Evləri fəaliyyət göstərir: “Biz görürük ki, çinlilər “Made in Azerbaijan” markalı Azərbaycan şərablarına, şirələrinə və digər məhsullara maraq göstərirlər. Bu, çox gözəl istehsaldır. Lakin gələcəkdə Prezident İlham Əliyevin təşəbbüsü ilə innovativ və yüksək texnologiyalı istehsalın, o cümlədən süni intellekt texnologiyalarının inkişafını da gözləyirik. Çin bu istiqamətdə kömək etməyə hazırdır”.
Onun sözlərinə görə, Çin bu gün süni intellekt sahəsində dünyanın aparıcı ölkələrindən biridir və bu sahədəki təcrübəsini, texnologiyalarını Azərbaycanla bölüşməyə hazırdır. Professor bu liderliyi təmin edən əsas amilləri də qeyd edib:
• Dövlət dəstəyi və strateji planlaşdırma: Elmin, təhsilin və sənayenin inkişafı üçün siyasi və maliyyə bazasını təmin edən “Yeni nəsil süni intellektin inkişafı üzrə milli plan” hazırlanıb.
Çin dünyanın ən böyük rəqəmsal iqtisadiyyatlarından biri kimi istehlak, tibb və nəqliyyat sahələrində unikal məlumat bazalarına malikdir ki, bu da süni intellektin öyrədilməsi üçün ideal platforma yaradır.
• Geniş tətbiq sahələri: Aktiv rəqəmsallaşma süni intellektin internet xidmətləri, maliyyə, təhlükəsizlik və sənaye sahələrində (üz tanıma, intellektual robotlar, rəqəmsal müştəri xidməti) tətbiqinə gətirib çıxarıb.
• İnnovasiyalar və investisiyalar: “Baidu”, “Alibaba”, “Tencent” və “Huawei” kimi nəhəng şirkətlər süni intellekt texnologiyalarını inkişaf etdirir, “SenseTime” və “Megvii” kimi şirkətlər isə yeni bazarlar formalaşdırır.
• Kadr potensialının artımı: Universitetlər süni intellekt üzrə tədris proqramlarını genişləndirir, xaricdə təhsil almış mütəxəssislər geri qayıdır və Çin bu sahədə mühəndis hazırlığı üzrə dünya liderləri sırasına daxildir.
• İnkişaf etmiş infrastruktur: 5G texnologiyasının, bulud hesablamalarının və super kompüterlərin tətbiqi süni intellektin genişmiqyaslı reallaşdırılması üçün texnoloji baza yaradır.
“Ölkələrimiz elmi əməkdaşlığın yeni erasına daxil olur. Biz, Çin alimləri Azərbaycanı etibarlı strateji tərəfdaş kimi görürük. Süni intellekt və rəqəmsal texnologiyalar gələcəyin mühərrikidir. Çin bilik və təcrübəsini bölüşməyə, birgə elmi və təhsil layihələrini həyata keçirməyə hazırdır”, — deyə professor vurğulayıb.
O qeyd edib ki, elmi və texnoloji tərəfdaşlığın inkişafı təkcə innovativ irəliləyişə deyil, həm də xalqlar arasında mədəni və humanitar əlaqələrin möhkəmlənməsinə xidmət edəcək: “Bu, sadəcə iqtisadi əməkdaşlıq deyil, həm də ölkələrimiz arasında intellektual və mədəni körpüdür. Biz, çinli dostlar hər zaman Azərbaycanı dəstəkləməyə və birgə gələcəyi inkişaf etdirməyə hazırıq”.
Sonda professor Renyin Li qeyd edib: “Azərbaycan Milli Elmlər Akademiyasının 80 illik yubileyi münasibətilə şəxsən öz adımdan və “Bir kəmər, bir yol” Elm və Texnologiya üzrə Alyans adından AMEA-ya gələcəkdə daha böyük uğurlar arzulayıram. Bu gün, 8 noyabrda həm də Zəfər bayramının beşinci ildönümüdür. Mən ürəkdən Azərbaycan xalqına sülh, xoşbəxtlik, rifah və müdrik Prezident İlham Əliyevin rəhbərliyilə firavanlıq arzulayıram”.
