11 Aprel 2023 03:22
2014
SİYASƏT
A- A+

Prezident göstəriş verir...

 

Zamanı qabaqlayan addımların, layihələrin, hadisələrin başlanğıc anı 

 

Prezident göstəriş verdi -  tez-tez eşitdiyimiz ifadədir!
Həm də hamımız yaxşı bilirik ki:
Bu, adi göstəriş deyil, ali göstəriş sayılır!
Bu göstəriş böyük dövlətin mürəkkəb icra mexanizminin hansısa bir qovşağının işə salınması  deməkdir!

Belə ki, ali göstəriş gələn kimi icra sistemi işə düşərək tapşırığı yerinə yetirməyə başlayır.
Adətən, Prezident öz göstərişi ilə hansısa vaxtı çatmış məsələnin həllinə yaşıl işıq yandırır.
Beləliklə,  gecikmələrə yol verilmədən hər iş vədəsində görülərək başa çatır, dalaqalma və ləngimə halları baş vermir.
Ötən dövrdə görülən işlər və icra olunan layihələr göstərir ki, Azərbaycan Prezidenti İlham Əliyevin göstərişləri həm də zamanı və hadisələri qabaqlama xarakteri daşıyır!
Bu göstəriş reallaşma mərhələsinə çatanda fərmana, sərəncama, bəzən hətta əmrə də çevrilə bilir.
Artıq sirr deyil ki, heç kimin bilmədiyi, proqnoz etmədiyi, hətta ağlına belə gətirmədiyi məsələlərdə İlham Əliyev hamını önləməyi bacarır.

Həm də  artıq bu qabaqlamalar onun  dəyişməz iş üslubuna çevrilib!
Bunu cənab İlham Əliyev prezidentliyinin iyirmi ili ərzində dəfələrlə sübuta yetirib!

***
Qeyd olunduğu kimi, adətən, nəhəng layihələrin icrasına Prezidentin göstərişi ilə başlanılır.
Tapşırıq əsasında işçi qrupu yaradılır, məsələ araşdırılır, öyrənilir, zəruri tədqiqatlar aparılır, müəyyən təkliflər söylənilir.
Növbəti mərhələdə ehtiyac duyularsa, layihənin geoloji əsasları, maliyyə mənbəyi, texniki parametrləri müəyyənləşdirilir.
Sonra müvafiq qərar layihəsi hazırlanır.
Göstərişdən başlayaraq fərman və ya sərəncamla başa çatan ideya gerçəkləşmə mərhələsinə qədəm qoyur.
Beləliklə, çox mühüm bir layihənin, xalqımızın və dövlətimizin maraqlarına xidmət edən, gücümüzü artıraraq rifahımızı yüksəldəcək ideyanın real işə çevrilməsinə başlanır.
***
Yalnız uzun müddət keçdikdən, layihələr işə düşdükdən sonra biz onların  (həm də təkcə biz yox) dövlət  başçısının uzaqgörənliyinin,  siyasi fəhminin nəticəsi olduğuna inanır və sevinərək alqışlayırıq.
Bəlkə də bu hal bir dəfə baş versəydi, onu haradasa təsadüf saymaq olardı...
Ancaq Azərbaycanın reallaşdırdığı bütün  meqalayihələr  elə bir zamanda  işə düşür ki, məhz  həmin dövrdə bütün dünyanın  ona ciddi  ehtiyac duyduğunu görürük.
***
Bu tip layihələr üçün daha bir xarakterik məqam var:
Adətən, dünya onları vədəsində və lazımınca qavramadığından, ya da Azərbaycanın etməli olduğunu istəmədiyindən  kömək göstərməkdən, maliyyə  yardımı ayırmaqdan  imtina edir.
Məsələn,  böyük güclər Ulu Öndər Heydər Əliyevin  "Əsrin  müqaviləsi"  əsasında hasil olunan neftin qeyri-ənənəvi marşrutla dünya bazarına çıxarılmasına mane olmaq istəyirdilər.
Heydər Əliyev inadından dönmədi, illərlə  yorulmadan mübarizə apardı!
Nəhayət, istəyinə nail oldu!

Artıq otuz ildir ki, Bakı-Tbilisi-Ceyhan əsas ixrac neft boru kəməri Azərbaycana və bütün  dünyaya xeyir  verir!
***
Bakı-Tbilisi-Qars  transmilli layihəsi də eyni aqibət yaşadı.
Dəmir yolu xətti Ermənistan ərazisindən keçmir deyə ona müqavimət göstərildi, tanınmış dünya  bankları maliyyə  ayırmaqdan boyun qaçırdı.
Prezident İlham Əliyev də dediyinin üstündə möhkəm dayandı!
Bu layihəni Azərbaycanın daxili imkanları hesabına, öz gücü ilə həyata  keçirdi!

Həm də təkcə dəmir yolu xəttini  çəkmədi...
Bakı Dəniz Limanını yaratdı!
"Şimal-Cənub", "Şərq-Qərb" nəqliyyat  dəhlizlərini işə saldı!
İki yüzdən çox yükdaşıma  gəmisi inşa etdirərək Azərbaycanı Xəzər dənizində ən böyük mülki donanma sahibi etdi.
Okeanlara heç bir çıxışı olmayan Azərbaycanı logistika mərkəzinə çevirdi!

***
Prezident İlham Əliyev bütün bu işləri görəndə Rusiya-Ukrayna müharibəsi başlamamışdı.
Kimsə yeni dünya düzəninin formalaşmasına aparacaq hadisələrin proqnozunu  ağlına belə gətirmirdi!
Amma cənab İlham Əliyev vaxtında, hətta deyərdik ki, zamanı qabaqlamaqla bütün bu işləri  inadla, qətiyyətlə gördü!
Uzun illər ərzində müasir daşımalar və logistik  infrastrukturunun yaradılmasına  yatırımlar etdi.
Bu gün isə Mərkəzi Asiyadan daşınan yüklərin Azərbaycan üzərindən  Avropaya yönləndirilməsi az qala  zərurətə  çevrilib.
***
Cənab İlham Əliyev Azərbaycan Prezidenti seçiləndə ölkə bir sıra problemlərlə üz-üzə idi.
Regionlara elektrik enerjisi böyük fasilələrlə verildiyindən məişətdə yaranan çətinliklərdən  əlavə, kənd təsərrüfatında, xüsusən  yay aylarında suvarmada gərginliklər yaşanır, bu hesabla xeyli məhsul itirilirdi.
Qaçqın və məcburi köçkünlər  çadır düşərgələrində çox ağır  şəraitdə yaşayır, işsizlikdən, yayda istidən, qışda soyuqdan əziyyət çəkirdilər.
Ölkəyə  Rusiyadan qaz idxal olunur, bəzən isə siyasi təzyiq kimi mavi yanacağın  qiymətinin artırılması ilə bağlı təhdidlər baş verirdi.
Sahibkarlığın  inkişafı, ölkəyə  investisiya  cəlbi ilə bağlı müəyyən  çətinliklər də vardı.
Bir neçə problemi  eyni vaxtda  həll etmək  tələb olunurdu.
Odur ki, düzgün qərarlar qəbul etmək, perspektivli layihələrə üstünlük vermək,  davamlı və sürətli iqtisadi inkişafa  nail olmaq son dərəcə vacib  idi.

Prezident seçkiləri dövründə cənab İlham Əliyev bir nəfər məcburi köçkünün belə çadır şəhərciyində qalmayacağını, habelə günün bütün saatlarında  Azərbaycanın bütün yaşayış məntəqələrinə elektrik enerjisinin veriləcəyini vəd etmişdi.
Məsələ son dərəcə çətin olsa da, İlham Əliyev qərarlarında israrlı idi.
Prezidentin tapşırığına əsasən, regionların sosial-iqtisadi  inkişafına dair  ilk Dövlət Proqramı hazırlanaraq icrasına başlanıldı (Bütövlükdə bu sahədə dörd dövlət proqramı hazırlanaraq  əlavələrilə birlikdə həyata keçirilmişdir).
İlham Əliyevin daha bir mühüm göstərişi Azərbaycanın  enerji təhlükəsizliyi ilə bağlı oldu.
Sahənin vəziyyəti dərindən araşdırılaraq təhlil olundu,  görüləcək tədbirlər müəyyənləşdirildi, dərhal işə başlanıldı.
Bakı şəhərindən başlanan proses bütün bölgələri əhatə etdi:
* Bir qisim elektrik stansiyalarında  əsaslı təmir və  yenilənmə aparıldı;
* Texnoloji cəhətdən köhnə avadanlıqlarla işləyən stansiyalarda  modernləşdirmə yolu ilə müasir qurğular  quraşdırıldı;
* Köhnə elektrik stansiyalarında  əsaslı yenidənqurma  hesabına  istehsal gücü qat-qat artırıldı;
* Elektrik enerjisi istehsal edən  yeni qurğuların inşasına start verildi.
Növbəti mərhələdə isə  daha gərəkli və uzaqgörən addımlar atıldı.
***
Bir vacib məqamı da xüsusi vurğulamaq istəyirik:
İşğal altındakı torpaqlar azad edildikdən dərhal sonra  Qarabağ və Şərqi Zəngəzur bölgəsindəki  dağ çaylarının yaratdığı imkanlardan səmərəli istifadəyə start verildi.
Yenə də Prezidentin göstərişi ilə ərazidəki çayların qarşısı kəsilərək süni göllər yaradıldı,  düşmənin  dağıdıb getdiyi qurğular işlək vəziyyətə gətirildi.
Beləliklə, həm ərazidə süni göllər hesabına su ehtiyatları toplanaraq kənd təsərrüfatının sürətli inkişafına şərait yaradıldı,  həm də bərpaolunan  enerji istehsalı sürətlə artırıldı.
Bu gün  Avropa təbii qazla yanaşı,  "yaşıl enerji"yə də ciddi ehtiyac duyur.
Prezident İlham Əliyevin müdrik uzaqgörənliyi sayəsində Azərbaycan bu ehtiyacın da ödənilməsində mühüm və səmərəli rol oynayır.

Qeyd edək ki,  Azərbaycan çox böyük "yaşıl enerji" potensialına malikdir.
Bu artıq təsdiq olunmuş faktdır. 
Yalnız Xəzər dənizində külək enerjisinin potensialı 157 qiqavatdır, quruda külək və günəş enerjisinin potensialı 27 qiqavatdır.
Qarabağ və Şərqi Zəngəzurda potensial 10 qiqavata yaxındır. 
Həmçinin Naxçıvan Muxtar Respublikasında böyük bərpaolunan enerji potensialı müəyyən edilib.
2022-ci ilin yanvar ayında Səudiyyə Ərəbistanını təmsil edən "ACWA Power" şirkətinin inşa etdiyi  240 meqavat gücündə Külək-Elektrik Stansiyasının, mart ayında isə Birləşmiş Ərəb Əmirliklərinin "Masdar" şirkəti tərəfindən tikilən 230 MVt gücündə Qaradağ Günəş-Elektrik Stansiyasının təməlləri qoyulub. 
Hazırda 500 meqavatlıq günəş-elektrik stansiyasının tikintisinin mümkünlüyü ilə bağlı danışıqlar aparılır. 
Azərbaycan strateji investorların biri ilə 2027-ci ilə qədər 3 qiqavat külək və 1 qiqavat günəş enerjisini istehsal etməyi planlaşdırır. Onların 80 faizi ixrac olunacaq. Azərbaycan 2037-ci ilə qədər ən azı 6 qiqavatlıq əlavə gücləri yaratmağı planlaşdırır. 
2022-ci ildə Azərbaycan, Gürcüstan, Macarıstan və Rumıniya hökumətləri arasında "yaşıl enerji" sahəsində strateji tərəfdaşlıq haqqında saziş imzalanıb.
Bu sənəd ötən il dekabrın 17-də Prezident İlham Əliyevin Buxarestə səfəri zamanı imzalanıb və bunun sayəsində Qara dənizin dibi ilə elektrik kabeli çəkiləcək.    
Bununla Azərbaycandan Şərqi və Mərkəzi Avropaya "yaşıl enerji" ixrac ediləcək.
Onu da qeyd edək ki,  artıq 4 kiçik su-elektrik stansiyası, 9 yarımstansiya, 1 Rəqəmsal İdarəetmə Mərkəzi istismara verilib.
5 kiçik su-elektrik stansiyası və 2 yarımstansiyada işlər yekunlaşıb. 7 su-elektrik stansiyası və 1 yarımstansiyada isə işlər davam edir.
Müstəqillik dövründə Azərbaycan artıq mavi yanacaq ixracatçısı kimi də  tanındı.
Daha dəqiq desək,  ölkəmiz qaz idxalçısından qaz ixracatçısına çevrildi!
Tezliklə "yaşıl enerji" ixracına da başlanacaqdır.

***
Prezident İlham Əliyev həm də yüksək zövq sahibidir.
Biz Bakının yenidən tikilib qurulması zamanı  bir daha bunun şahidi olduq.

Bakı qədim,  özünəməxsus ənənələri olan şəhərdir.
Həm də dəniz kənarında yerləşir, "amfiteatr"  xüsusiyyətlərinə malikdir.
Şəhərsalmada  bu və digər məsələlər hökmən diqqətdə saxlanılır.
Cənab İlham Əliyevin göstərişləri əsasında şəhərsalmada və Bakının  yeni Baş planının hazırlanmasında  bütün bu cəhətlər  nəzərə alındı.
Bakının milli memarlıq  xüsusiyyətləri qorunmaqla  zamanın əl gəzdirdiyi  tarixi binalar təmir olundu, yeniləndi, ömrü uzadıldı.
Yeni, müasir memarlıq üslublarına əsaslanan layihələr  paytaxta gətirilərək  şəhərimizi məzmun və görünüşcə daha da gözəlləşdirdi, baxımlı etdi.
Prezident İlham Əliyevin  göstərişləri əsasında  müstəqillik dövründə Bakıda inşa olunan yeni binalar  həm də dünya memarlığının ən yeni nümunələri sayılır.
Onların bəzilərini yada salaq:
* Heyrətdoğuracaq  gözəlliyə malik Heydər Əliyev Mərkəzi;
* Milli elementlərlə bəzədilmiş  Heydər Əliyev Fondunun binası;
* Odlar Yurdu Azərbaycanın paytaxtı Bakının rəmzi sayılan, "Alov qüllələri" adlanan  nəhəng  "şüşə"  binaları;
* Xəzər sahilində yerləşən böyük idman və konsert tədbirlərinin keçirilməsi üçün  hər cür şəraiti olan, üstəlik, rekord sayılacaq qədər qısa müddətdə  tikilən "Büllur saray" ("Bakı  Kristal  Zalı");
* Öz  orijinallığı  ilə seçilən  Beynəlxalq Muğam Mərkəzi;
* Heydər Əliyev prospekti boyunca yerləşən, eyni üslubda tikilərək  fərqli görünüşə malik  modern inzibati binalar;

* Dəniz kənarı boyunca,  habelə paytaxtın  müxtəlif ünvanlarında inşa  olunan  müasir  hotel binaları;
* Bir vaxtlar  hisli-paslı ərazi sayılan "Qara şəhər"də  salınan yeni "Ağ şəhər"  yaşayış  kompleksi;
* UNESCO-nun qeyri-maddi  mədəni irs  siyahısına salınan,  ikinci ömrünü yaşayan, əcnəbi  turistlərin ən çox  sevdikləri yerə çevrilən  İçərişəhər Memarlıq Qoruğu;
* Dünyanın heç yerində  tayı-bərabəri olmayan, Xəzərin sahili boyu  on kilometrlərlə uzanan  Dənizkənarı  Milli Park;
* Ən nəhayət, Milli  Olimpiya Komitəsinin  Prezidenti kimi cənab İlham Əliyevin göstərişləri  əsasında  yaradılan nəhəng idman  sarayları və qurğuları.
Ölkəmizə gələn qonaqları valeh edərək heyrətləndirən, Bakını dünyanın ən gözəl  şəhərlərindən birinə çevirən bütün bu memarlıq inciləri,  bina və qurğular əsrlər boyu  insanlara xidmət göstərərək onlara sevinc və rahatlıq gətirəcəkdir!
***
Prezident İlham Əliyevin müdrikliyi və uzaqgörənliyi qəbul etdiyi qərarlarda,  verdiyi göstəriş və tapşırıqlarda daim öz əksini tapır!
Ulu Öndər Heydər Əliyev Bakı-Tbilisi-Ərzurum  qaz boru kəmərinin çəkilməsinə  öz xeyir-duasını vermişdi.
İlham Əliyev çox böyük uzaqgörənlik və siyasi  fəhmlə  uzunluğu 980 kilometr olan bu kəmərin  meqalayihəyə  çevrilməsi üçün zamanında  zəruri göstəriş və tapşırıqlarını verdi.
Sanki Rusiya ilə Ukrayna arasında müharibənin  baş verəcəyini,  üçüncü dünya müharibəsi təhlükəsini,  ABŞ-nin  və Qərbin  Ukraynanın tərəfini tutaraq Rusiyanı güclü sanksiyalara məruz qoyacağını,  Avropada güclü mavi yanacaq böhranı yaşanacağını çox-çox irəlicədən görürdü və bilirdi.
Əvvəlcə  TANAP,  sonra  TAP  hesabına böyüyən bu layihə bütövlükdə uzunluğu  3500 km olan "Cənub qaz dəhlizi"nə çevrildi.
Həm də elə bir vaxtda ki, sanki Avropadakılar layihənin yekunlaşaraq işə salınmasını gözləyirdilər...
Prezidentimizin uzaqgörənliyi sayəsində  Azərbaycan bir neçə mühüm  problemi çox qısa zamanda həll etdi:
*  Avropanın ən etibarlı qaz  təchizatçılarından  birinə çevrildi;
* Yaranmış  ehtiyac və zərurət sayəsində Avropanın qaz bazarına maneəsiz daxil oldu;
* Qısa müddətdə  texniki məsələləri də həll etməklə  Yunanıstan, Bolqarıstan, Albaniya, İtaliya,  Rumıniya və  Macarıstanla qarşılıqlı maraqları təmin edən  müqavilələr bağladı;
* Artıq dövlət başçısı Azərbaycanın yüz il ərzində Avropanın mavi yanacağa olan ehtiyacını  təmin edəcək yeni  yataqların  istismarı və  ixrac kəmərinin imkanlarının artırılması ilə bağlı  müvafiq  göstərişlərini vermiş,  tapşırığın icrasına başlanılmışdır.
Bu gün Azərbaycan dünyada tək neft ölkəsi kimi deyil,  təbii qaz ixracatçısı kimi də  məşhurlaşmışdır.
Getdikcə daha da artan və möhkəmlənən bu əməkdaşlıq ölkəmizin Avropa dövlətləri simasında  yeni dostlar və tərəfdaşlar qazanmasına da imkan yaradır.

***
Müstəqil Azərbaycanda gənclər siyasətinin əsasını Ulu Öndər Heydər Əliyev qoymuşdur.
Bu sahənin inkişafını və mövcud problemlərinin  həllini isə cənab İlham Əliyevə həvalə etmişdi.

Milli Olimpiya Komitəsinin prezidenti kimi cənab İlham Əliyev gənclərlə işi daim diqqət mərkəzində saxlamış, hətta  dövlət başçısı seçildikdən sonra da qayğı və dəstəyini  gənclərdən  heç zaman əsirgəməmişdir.
İlham Əliyev idmana təkcə fiziki kamilləşmə vasitəsi kimi  baxmır.
Dəfələrlə öz çıxışlarında mənən zəngin, vətənpərvər, milli maraqların  qorunmasında və torpaqların işğaldan azad edilməsində fədakarlıq  göstərəcək yeni gənclər nəslinin tərbiyələndirilməsinin  vacibliyini qeyd etmiş, bununla bağlı gərəkli addımlar atmışdır.

Beləliklə, Prezidentin göstərişi ilə yüksək biliklərə, intellektual səviyyəyə malik gənclərin yetişdirilməsi üçün dövlət proqramı  əsasında və dövlət hesabına dünyanın tanınmış ali təhsil ocaqlarında  magistratura təhsili  almaq üçün minlərlə gənc  xarici ölkələrə göndərilmişdir.
Müasir hərbi biliklərə yiyələnmiş yeni gənc nəslin tərbiyəsini də  təmin edən sistem yaradılmışdır.
Dövlət başçısının tapşırığı və şəxsi nəzarəti ilə  indiyədək ölkəmizdə 40-dan çox  Olimpiya İdman Mərkəzi tikilərək gənclərin istifadəsinə verilmişdir.
Qısa bir zamanda Azərbaycan idman dövlətinə çevrilmiş, minlərlə gənc dünya, Avropa birinciliklərində, Olimpiya oyunları və müxtəlif  beynəlxalq  yarışlarda  iştirak edərək saysız-hesabsız medallar qazanmışlar.
Azərbaycan gənci istənilən idman növü üzrə yarışlarda qalib gələrək  dövlət bayrağının  yüksəldilməsini və himnimizin səsləndirilməsini  şərəf borcu hesab edir.
Prezidentin göstərişi ilə daim qaliblərə yüksək məbləğdə mükafatlar verilir, onlar mənzillərlə təmin olunurlar.
Təkbətək idman  növlərində düşmən dövlətin idmançılarını  məğlubiyyətə uğradan Azərbaycan gəncləri  44 günlük Vətən müharibəsində bunu  hərb meydanında da təkrarladılar.
Məhz Birinci Qarabağ müharibəsindən sonra doğularaq böyüyən,  cənab İlham Əliyevin Prezidentliyi dövründə yetişən gənclər Vətən müharibəsində misilsiz hünər və igidliklər göstərdilər, düşmən ordusunu torpaqlarımızdan qovdular, Şuşanı yalın əllə,  əlbəyaxa döyüşərək geri qaytardılar!
***
Müzəffər Ali Baş Komandan İlham Əliyev ixtisasca hərbçi deyil.
Heç zaman orduda peşəkar zabit kimi  xidmət etməyib.

İlham Əliyev  dünyanın ən  prestijli  təhsil ocaqlarından sayılan MDBMİ-ni əla qiymətlərlə bitirərək diplomat ixtisasına yiyələnib.
Həm də adi diplomat deyil,  diplomatlara dərs demiş müəllim-diplomat, yüksəksəviyyəli  diplomatdır.
Bu gün də onun şəkli MDBMİ-nin ən yaxşı müdavimlərindən biri olaraq təhsil ocağının Şərəf lövhəsini bəzəyir.

Ancaq İlham Əliyev Qarabağın azadlığı uğrunda apardığı  mübarizədə yüksək komandan məharəti və peşəkar hərbçilərə məxsus ali keyfiyyətlər nümayiş etdirdi!
İlk dəfə müharibə etməsinə baxmayaraq, XXI əsrin ən yeni müharibəsini apardı!
Ortaya yeni müharibə nümunəsi, hamının öyrənəcəyi örnək qoydu!
Dünyanın ən güclü dövlətlərini belə Azərbaycanın hərbi nümunəsini öyrənməyə, islahatlar apararaq Azərbaycan Ordusu timsalında öz ordularında dəyişiklik və yenilənmə aparmağa vadar  etdi!

Faktiki olaraq hamını kiçik Azərbaycandan nümunə götürməyə sövq etdi!
Bütün bunların əsası İlham Əliyev xarizmasından irəli gəlir!
Hər bir dövlətin rəhbəri həm də həmin dövlətin Ali Baş Komandanı sayılır!
Beləliklə,  son söz  söyləyəni, qəti qərar qəbul edəni olur!

Deməli, həm də:
* Təkliflər içərisində  ən mükəmməlini seçmək;
* Nümunələr əsasında ən yaxşısına  üstünlük vermək;
* Variantlar arasında məhz hansının qəbul ediləcəyini təyin etmək səlahiyyəti də ondadır!
Cənab İlham Əliyev işğal altındakı torpaqları azad edəcək ordu yaradılmasında ən mühüm və məsuliyyətli  göstərişlərini verdi:
* Ordu hansı  texnologiyalara əsaslanan  silahlarla silahlanmalıdır;
* Hansı strategiya və  taktika tətbiq olunmalıdır;
* Müharibə aparılacaq ərazinin relyefinə uyğun hansı yeni qoşun  növləri yaradılmalıdır;
* Uzun illər boyu nə kimi taktiki  təlimlər keçirilərək  ordunun peşəkarlığı yüksəldilməlidir;
* Ölkənin hava hücumundan müdafiəsi  hansı silahlarla və necə təşkil olunmalıdır;
* Hərbi əməliyyatlar zamanı düşmənin  ön cəbhə ilə arxanın əlaqə və təminatı necə kəsilməlidir;
* Hücumlar necə və hansı istiqamətlərdə aparılmalıdır.
Bütün bunlar əvvəldən axıradək Müzəffər Ali Baş Komandanın göstərişləri əsasında baş verib:
* Müharibədə tam qələbəni təmin edən  göstərişlər!
* Düşmən ordusunu məhv edərək diz çökdürən göstərişlər!
* Düşmənin  belini sındıraraq  kapitulyasiya aktına qol çəkməyə məcbur edən göstərişlər!
* İşğal altındakı torpaqları azad edərək xalqın qisasını  erməni faşistlərindən alan göstərişlər!
Ən nəhayət, Azərbaycanı məğlub dövlətdən qalib ölkəyə, vüqarlı, milli mənliyi geri qaytarılan  dövlətə çevirən göstərişlər!
***
Adətən, Prezidentin verdiyi göstərişlərin əsasında dövlətin iqtisadi maraqları da dayanır.
Əslində, bu maraqlar öz növbəsində müstəqil Azərbaycanın daha da qüdrətlənməsinə,  xalqın sosial  rifahının durmadan yüksəlməsinə xidmət edir.
Dünyada elə ölkələr var ki, əsas gəlirləri turizmdən olur.
Turist, əslində, "qonaq"  deməkdir.
Dünyada  yeni, maraqlı nəsə axtaran, görmədiklərini görmək istəyən qonaq!
Turist hər hansı ölkəyə səfərə getməzdən öncə bilmək istəyir ki, orada təhlükəsizlik,  rahatlıq tapacaqmı, görmək istədiklərini, bəlkə də indiyədək görmədiklərini görə biləcəkmi?
Normal istəkdir və ona görə də bu yolda  pul xərcləməyə hazırdır.
Prezident İlham Əliyev Azərbaycanın dünya turizm məkanlarından birinə çevrilməsinə göstəriş verib.
Bu göstəriş real imkanlara əsaslanır.
Əvvəla, Azərbaycan təbiəti xüsusi gözəlliyə malikdir, dünyadakı on iki iqlimin  doqquzundan bizdə var.
İkinci, xalqımız mehriban, gülərüz, multikulturaldır, yəni bütün dinlərə hörmətlə yanaşır.
Üçüncü, ölkənin hüquq-mühafizə orqanları  peşəkardır, məsuliyyətlə çalışır, heç kəsi heç bir təhlükə gözləmir, istəyirsən gecə səhərədək Bakının küçələrini gəz.
Dördüncü, maraqlı tarixi abidələrimiz,  muzeylərimiz,  sərgi salonlarımız var.
Beşinci,  unikal mətbəxə -  zəngin menyu və xörəklərə sahibik.
Dövlət də turistlərin rahatlığı üçün  hər şeyi edib:  rahat yol infrastrukturu,  beynəlxalq hava limanları, hotellər şəbəkəsi, istirahət və əyləncə mərkəzləri mövcuddur.
Azərbaycanın dünyada  tanıdılması sahəsində də səmərəli işlər aparılır: reklam çarxlarının sistemli  nümayişi ilə  yanaşı, il ərzində  çoxsaylı  azarkeşlərin cəlb olunduğu idman, o sıradan telekanallarda  yarım milyard insanın tamaşa etdiyi "Formula-1" yarışları müntəzəm şəkildə keçirilir.
Prezidentimizin göstərişinə əsasən, işğaldan azad edilərək cənnətə çevrilməsi prosesi gedən Qarabağda  və Şərqi Zəngəzurda da turizmin inkişafı üçün indidən zəruri addımlar atılır.
İnanırıq ki, turizmə maneçilik törədən COVID-19-un fəsadları tam aradan qaldırıldıqdan,  dövlət başçısının tapşırığı ilə başlanan  işlər  yekunlaşdıqdan sonra  Azərbaycan başdan-başa dünya turistlərinin  ən çox sevdikləri və səyahət etdikləri  ölkəyə çevriləcəkdir.
***
Gətirilən misalların və faktların sayını  istənilən qədər artırmaq mümkündür!
Amma bütün faktlar və məqamlar eyni fikri və həqiqəti təsdiq edir:
*  Prezident İlham Əliyevin hər göstərişi, hər tapşırığı mükəmməldir, ölçülü-biçilidir,  uzaqgörənlik nümunəsidir!
* Həmin göstərişlər təkcə sabahın uğur və nailiyyətlərini  təmin etmir, həm də sonrakı günlərin qələbələrinin mühüm  əsaslarını yaradır!
Əslində, müstəqil Azərbaycanda baş verən hər bir  dəyişiklik, inkişaf və yenilik başlanğıcını məhz  İlham Əliyevin  ilkin göstərişlərindən alır - nəyi, necə və nə vaxt etməyi dəqiq bilən və qətiyyətlə icra edən Müzəffər Ali Baş Komandan İlham Əliyevin!
Hələ bundan sonra da çoxsaylı göstəriş və tapşırıqların, xalqın arzularının ifadəçisi olan çoxsaylı uğur və nailiyyətlərin şahidinə çevriləcəyik!

 

Bəxtiyar  SADIQOV

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video