Sentyabrın 19-da Milli Məclisin Gənclər və idman komitəsinin 2023-cü ilin payız sessiyasında ilk iclası keçirilib.

AZƏRTAC xəbər verir ki, iclasda əvvəlcə Ümummilli Lider Heydər Əliyevin və bu gün erməni diversantlarının törətdikləri növbəti terror aktı nəticəsində həlak olan polis əməkdaşlarının və mülki şəxslərin xatirəsi bir dəqiqəlik sükutla yad edilib.

Milli Məclis sədrinin müavini, parlamentin Gənclər və idman komitəsinin sədri Adil Əliyev “Heydər Əliyev İli” çərçivəsində Azərbaycanda və xarici ölkələrdə keçirilən tədbirlərdən söz açaraq, parlament rəhbərliyinin, o cümlədən komitə üzvlərinin bu tədbirlərdə fəal iştirak etdiyini qeyd edib.

Diqqətə çatdırılıb ki, iclasın gündəliyinə 2023-cü ilin yaz və növbədənkənar sessiyaları dövründə görülən işlər barədə hesabat və komitənin 2023-cü ilin payız sessiyası üçün iş planı daxil edilib.

Komitə sədri əvvəlcə 2023-cü ilin yaz və növbədənkənar sessiyaları dövründə Gənclər və idman komitəsində görülən işlər barədə danışıb. Deyib ki, ötən sessiyada komitəyə vətəndaşlardan, idarə və təşkilatlardan ümumilikdə 1182 məktub, müraciət və sənəd daxil olub. Qeyd edilib ki, onlardan 464-ü yazılı şəkildə poçt vasitəsilə, 718-i isə müxtəlif sosial şəbəkələr vasitəsilə daxil olub.

Bildirilib ki, komitənin sədri və üzvləri hesabat dövründə Vətən müharibəsi qaziləri, şəhid ailələrinin üzvləri ilə görüşlərdə, həmçinin Vətən müharibəsi şəhidlərinin xatirəsinə həsr olunmuş çoxsaylı tədbirlərdə iştirak ediblər.

Diqqətə çatdırılıb ki, 2023-cü ilin yaz və növbədənkənar sessiyaları dövründə komitədə ümumilikdə 437 vətəndaş qəbulu keçirilib.

Sonra iclasda komitənin 2023-cü ilin payız sessiyası üçün iş planına baxılıb. Qeyd edilib ki, qarşıdakı sessiyada büdcə zərfinin və komitəyə daxil olacaq digər qanun layihələrinin müzakirəsi nəzərdə tutulub.

Eyni zamanda, iş planında “Heydər Əliyev İli” çərçivəsində tədbirlərin keçirilməsi, şəhid ailələrinin üzvləri və müharibə iştirakçıları ilə görüşlər, vətəndaşların qəbulu, ərizə və şikayətlərlə işin təşkili və digər məsələlər yer alıb. “Ulu Öndər Heydər Əliyev və Azərbaycan idman siyasəti” və “Qərbi Azərbaycana qayıdışda gənclərin rolu” mövzusunda dinləmələr də iş planında əks olunub.

Komitənin üzvü Etibar Əliyev çıxış edərək iş planı ilə bağlı bir sıra təkliflər səsləndirib.

Sonra deputatların işinin səmərəliliyini artırmaq üçün hazırlanmış mobil tətbiq layihəsinin parlament Aparatının İnformasiya resursları və texnologiyaları şöbəsinin müdiri Şahin Həsənov tərəfindən təqdimatı keçirilib.

Müzakirələrin sonunda Gənclər və idman komitəsinin Milli Məclisin 2023-cü ilin yaz və növbədənkənar sessiyaları dövründə gördüyü işlərlə bağlı hesabatı məqbul sayılıb və komitənin 2023-cü ilin payız sessiyası üçün iş planı təsdiqlənib.