TDT Dövlət Başçıları Şurasının Azərbaycanın Qəbələ şəhərində keçirilən 12-ci Zirvə Görüşü türk birliyinin yeni tarixi mərhələsinin əsasını qoydu.
AZƏRTAC xəbər verir ki, bu fikir Cizak Dövlət Pedaqoji Universitetinin rektoru, professor Maksudcon Yuldaşevin Özbəkistan milli xəbər agentliyinin saytında dərc olunmuş məqaləsində yer alıb.
Professor yazıb: “Türk Dövlətləri Təşkilatının Zirvə Görüşünə ev sahibliyi edən Azərbaycanın Qəbələ şəhəri təkcə coğrafi deyil, həm də mənəvi-ideoloji mərkəz kimi xüsusi əhəmiyyət kəsb edib. Özbəkistan Prezidenti Şavkat Mirziyoyevin bu mötəbər tədbirdəki çıxışı bütün Türk dünyasının strateji hədəflərini və gələcəyinə baxışı müəyyən edib. O, çoxşaxəli tərəfdaşlığın dinamikasını daha da genişləndirmək və sürətləndirmək məqsədilə 2030-cu ilə qədər inkişaf Strategiyasının və ayrıca yol xəritəsinin hazırlanmasını təklif etdi. Onun təhlükəsizlikdən tutmuş iqtisadiyyata, təhsilə, nəqliyyata, ekoloji əməkdaşlığa qədər bütün mühüm sahələri əhatə edəcəyi gözlənilir”.
Rektor qeyd edib ki, bu istiqamətdə atılan mühüm əməli addımlardan biri də Türk Dövlətləri Təşkilatının xarici işlər nazirləri və xüsusi xidmət orqanları rəhbərlərinin ilk birgə iclasının Səmərqənddə keçirilməsi təşəbbüsü olub.
O vurğulayıb: “Türk Dövlətlərinin İqtisadi Tərəfdaşlıq üzrə Daimi Şurasının yaradılması və onun layihə ofisinin Daşkənddə yerləşdirilməsi təklifi xüsusilə diqqətəlayiqdir. Bu təşəbbüs Özbəkistanın regional iqtisadi proseslərdə aparıcı qüvvəyə çevrildiyini nümayiş etdirir. Bu status ölkəmizin regionda siyasi və iqtisadi təsir imkanlarını daha da gücləndirəcək. Eyni zamanda, “Türk yaşıl dəhlizləri” adlı elektron sistemin tətbiqi və yaşıl enerji layihələrinin birgə həyata keçirilməsi üçün “Yaşıl transformasiya” konsorsiumunun yaradılması ideyaları ekoloji dayanıqlığın və texnoloji innovasiyaların təmin edilməsinə yönəlmiş planların tərkib hissəsinə çevrilir”.
Professor əlavə edib ki, türk dövlətləri arasında əməkdaşlığın gücləndirilməsində nəqliyyat layihələri xüsusi rol oynayır. O vurğulayıb: “Prezident Şavkat Mirziyoyevin Orta Dəhlizi tikilməkdə olan Çin-Qırğızıstan-Özbəkistan dəmir yolu və perspektivli Trans-Əfqan Dəhlizi ilə birləşdirmək təşəbbüsü bizim geniş regionumuzda çoxsahəli strateji avtomobil yolları sisteminin yaradılmasına kömək edəcək”.
Təmsil etdiyi təhsil sektorunda TDT ölkələri arasında əməkdaşlığın perspektivlərinə toxunan M.Yuldaşev yazıb: “Təhsil sahəsində əməkdaşlığı gücləndirmək və istedadlı alimlərin tədqiqatlarını stimullaşdırmaq üçün Özbəkistanda Beynəlxalq Türk Dövlətləri Universiteti açılır. Bu təhsil ocağı türk ölkələrindən olan gəncləri elmi əməkdaşlıq və intellektual inkişaf sahələrində bir araya gətirəcək. Bundan başqa, süni intellekt və kreativ iqtisadiyyat sahəsində yol xəritəsi layihəsi də müasir təhsil sisteminə doğru mühüm addımdır. Bu təşəbbüs sayəsində türk universitetləri beynəlxalq arenada lider mövqelərə yüksələ biləcəklər”.
Rektor diqqətə çatdırıb ki, Şavkat Mirziyoyevin “Nizami Gəncəvi və Əlişir Nəvainin əsərləri Türk dünyasının mənəvi həyatında” mövzusunda beynəlxalq elmi konfransın keçirilməsi təklifi türk xalqlarının mənəvi dirçəlişi baxımından böyük əhəmiyyət kəsb edir. Bu təşəbbüs sadəcə keçmişi xatırlamağa çağırış deyil, həm də mənəviyyat, tolerantlıq və ortaq dəyərlərə əsaslanan gələcək qurmaqla bağlıdır”.
Özbəkistanlı professor məqalənin sonunda qeyd edib: “Qəbələdə keçirilən TDT Zirvə Görüşündə səslənən hər bir təklif sadəcə bəyanat deyil, yeni tarixin başlanğıcıdır. Qədim kökləri və ortaq mədəniyyəti olan Türk dünyası XXI əsrdə yeni sivilizasiyanın mərkəzinə çevrilir”.
