Prezident İlham ƏLİYEV: "Enerji siyasətimiz iqtisadi və siyasi uğurumuzun aparıcı qüvvəsidir"
Bu gün Bakı Enerji Həftəsi öz işini başa çatdıracaq. Üç gündür paytaxtımız Azərbaycanın enerji sektorunun dünyaya işıq saçdığına bir daha əmin olur. Bu tədbirlə Azərbaycan enerjisinin çox-çox uzaqlara çatan səsi geniş əks-səda verir.
Bakı 30-cu dəfədir Bakı Beynəlxalq Xəzər Neft və Qaz sərgisinə evsahibliyi edir. Həmin sərgiyə ki Bakı Enerji Həftəsinin bünövrəsini yaradıb. Hər il onunla yanaşı, həm də Bakı Enerji Forumu (əvvəl Beynəlxalq Xəzər Neft və Qaz Konfransı adlanırdı) keçirilir. 13-cü dəfədir bu tədbirlərlə paralel olaraq "Caspian Power" sərgisi də baş tutur. Bu, əvvəlki dövründə elektroenergetikanı, son bir neçə ildə isə həm də "yaşıl enerji"ni əhatə edən bir sərgidir. Bakı Enerji Həftəsi bu üç möhtəşəm tədbiri birləşdirir.
İlk Beynəlxalq Xəzər Neft və Qaz sərgisi 1994-cü ilin mayında keçirildi. Həmin vaxt ölkəmizdəki məlum vəziyyətə görə belə bir sərginin keçirilməsi demək olar ki, mümkünsüz idi. Lakin Ümummilli Lider Heydər Əliyev bunu öz səyi, zəkası və siyasi nüfuzu sayəsində mümkün etdi. Sərgidən bir neçə ay sonra "Əsrin müqaviləsi" imzalandı. Mübaliğəsiz demək olar ki, həmin möhtəşəm sazişin imzalanmasına neft-qaz sərgisi bir növ yol açdı. Çünki orada bir sıra mühüm məsələlər müzakirə olundu.
Elə o zaman da sərgi özünə daimi məkan "seçdi". Hər ilin təxminən eyni vaxtında "Caspian Oil and Gas" dünyanın onlarca ölkəsinin aparıcı şirkətlərini, görkəmli mütəxəssislərini bir araya gətirir. Günün sahəyə aid məsələlərinin müzakirə olunması, yeni tanışlıqların yaranması, təcrübə mübadiləsinin aparılması, növbəti əməkdaşlıqların qurulması baxımından bu, çox dəyərli bir tədbirdir. Sərgi çərçivəsində ötən illər ərzində yeni layihələrin işlənməsinə start verən müqavilələr də imzalanıb.
"Caspian Oil and Gas" qlobal layihələrimizlə birgə addımlayıb, layihələr də bu möhtəşəm tədbirlə çiyin-çiyinə verib. Beləcə, bir-birinin uğurlarına şahidlik ediblər.
Bu gün təkcə neft-qaz sektorunda deyil, bütün sahələrdə ölkəmizin qazandığı nailiyyətlər göz qabağındadır. Prezident İlham Əliyev ötən illərdə olduğu kimi, bu dəfə də Bakı Enerji Həftəsinin rəsmi açılış mərasimində iştirak etdi və öz çıxışında keçilmiş yola nəzər salaraq dedi: "Təsəvvür edirsiniz ki, gələcəklə bağlı nə dərəcədə qaranlıq mənzərə yaranmışdı?! Bu gün isə onu görürük ki, bizim enerji siyasətimiz iqtisadi və siyasi uğurumuzun aparıcı qüvvəsidir. Bu gün Azərbaycan sabit siyasi sistemə və inkişaf etməkdə olan iqtisadiyyata malik ölkədir. Neft və qazın bizim ÜDM-də payı təqribən 30 faizdən artıqdır. Azərbaycan genişmiqyaslı islahatlar həyata keçirir. Bizim iqtisadiyyatımız özünü təmin edir. Bizim xarici borcumuzun səviyyəsi ÜDM-in 7 faizindən azdır və maliyyə ehtiyatlarımız borcumuzu 14 dəfə üstələyir. Biz milli sərvətlərin düzgün bölüşdürülməsi nəticəsində yoxsulluğun azaldılmasına müvəffəq olduq və bu gün yoxsulluq səviyyəsi 5 faizə bərabərdir. Biz insan kapitalına və təhsilə ciddi maliyyə vəsaitləri yatırdıq. Savadlılıq səviyyəsi 100 faizə bərabərdir. Azərbaycan regionda yeni mühit formalaşdırdı".
Bir uzunömürlü sərgi, əməkdaşlıq platforması, uğurların nümayişi olaraq "Caspian Oil and Gas" 30 ildən çoxdur beynəlxalq ictimaiyyətin diqqətini cəlb etməkdədir. Təsadüfi deyil ki, hər il ABŞ, Böyük Britaniya, Türkiyə kimi ölkələrin rəhbərlərindən, dünyanın tanınmış siyasətçi və mütəxəssislərindən tədbirin açılışı münasibətilə Prezidentimizə təbrik məktubları ünvanlanır. ABŞ Prezidenti Donald Tramp budəfəki tədbirlə bağlı dövlətimizin başçısına məktubunda yazır: "Sizi və Azərbaycan xalqını səmimi-qəlbdən 30-cu Bakı Beynəlxalq Neft və Qaz Sərgisinin keçirilməsi münasibətilə təbrik edirəm. Bu, Azərbaycanın, həqiqətən də, regionda enerji sektorunda liderliyini və qlobal enerji təhlükəsizliyini təcəssüm etdirir. 30 il ərzində iki millətimiz, iki xalqımız, həqiqətən də, enerji sərvətləri fonunda karbohidrogen sektorunda liderliyini nümayiş etdirmişdir. Həqiqətən də, qlobal enerji ehtiyatlarının növbəti onillərlə qarşılanması baxımından da bu çox önəmlidir ki, hər bir xalqın resursları öz rifahına xidmət etsin".
ABŞ Dövlət Departamentinin Avropa və Avrasiya məsələləri üzrə baş müşaviri Vayat Tolki "Bakı-Ekspo" Mərkəzində rəsmi açılış mərasimində çıxışı zamanı məktubu səsləndirərkən onu Azərbaycanla ABŞ-nin ortaq maraqlarını əks etdirən və enerji təhlükəsizliyinin təmin olunmasında ölkəsinin bizimlə işbirliyinə sadiqliyini təsdiq edən mühüm bir mesaj kimi dəyərləndirdi.
Bəli, ötən illər ərzində Azərbaycan öz tərəfdaşları ilə birlikdə Xəzər dənizini Qara dəniz və Aralıq dənizi ilə birləşdirən strateji boru kəmərləri inşa edib. Xəzərdən İtaliya sahillərinədək uzanan 3500 kilometrlik qaz dəhlizi çəkib. Cəmi bir il əvvəl - keçəndəfəki enerji həftəsi keçirilən zaman Azərbaycanın qaz ixrac etdiyi ölkələrin sayı 8 idi. Bu gün "Cənub qaz dəhlizi" Azərbaycan qazını artıq 12 ölkəyə çatdırır. Bu, əlbəttə, son hədd deyil.
Prezidentimiz belə deyir və onun hər sözü imzası qədər etibarlı, dəyərli və kəsərlidir!
Azərbaycanın "yaşıl enerji" gündəliyi də artıq hamıya bəllidir. İmzalanmış müqavilələrə və sərmayə öhdəliklərinə əsasən, ölkəmiz 2030-cu ilədək 6,5 giqavat həcmində istehsal edilə biləcək bərpaolunan enerji gücünə malik olacaq. Bu da bərpaolunan enerjinin ümumi enerji istehsalımızda 35 faizindən çox olacağı deməkdir. Həmin potensial sayəsində Azərbaycan elektrik enerjisinə artan təlabatını əsasən bərpaolunan enerji hesabına təmin edəcək. Nəticədə bir neçə milyard kubmetr qaza qənaət ediləcək və bu həcm ixrac oluna biləcək.
"2030-cu ilə qədər istehsal olunan 8 milyard kubmetr qaz 5 mövcud yataqdan və əlavə yeni yataqlardan hasil ediləcəkdir. Yəni bu gün buraya sərmayə qoymuş investorlar hasilatın həcmini artıracaqlar. Həmçinin imzalanmış yeni sazişlər və nəzərdə tutulan müqavilələr həmin potensialı təmin edəcəkdir. Ötən il "Bakı Enerji Həftəsi" çərçivəsində toplam 1000 meqavat "yaşıl enerji" həcmində müqavilələr imzalandı. Bu tədbir çərçivəsində də bir neçə yüz meqavat həcmində yeni sazişlər imzalanacaqdır. Yəni biz bu yol ilə irəliləyirik".
Bunu da Prezidentimiz deyib. Deməli, bu cür də olacaq və növbəti enerji həftələrində yeni nailiyyətlərdən bəhs olunacaq, yeni layihələrə imza atılacaq, yeni əməkdaşlıq yolları açılacaq.
Flora SADIQLI,
"Azərbaycan"
jpg_1749076194.jpg)
