Bakı Dövlət Universitetinin (BDU) Astrofizika kafedrası qarşıdakı 5 onillikdə gözlənilən əsas astronomik hadisələri açıqlayıb. 2027-ci il avqustun 2-də əsrin ikinci ən uzun Günəş tutulması baş verəcək və tam qaranlıq təxminən 6 dəqiqə 24 dörd saniyə davam edəcək. Şimali Afrikadan daha yaxşı müşahidə olunacaq bu tutulma 2114-cü ilə qədər ən uzun tutulma olacaq. Daha sonra 2029-cu il aprelin 13-də “99942 Apofis” asteroidi Yerə yaxınlaşaraq, planetimizdən cəmi 31 min kilometr, Aydan on iki dəfə yaxın məsafəyə çatacaq. Bu asteroid Avropanın, Afrikanın və Asiyanın bir hissəsində təxminən iki milyard insan üçün aydın, qaranlıq səmada adi gözlə görünəcək.

 “Leonid” meteor yağışı Yer kürəsi “Tempel-Tuttle” kometinin qoyub getdiyi qalıqlardan keçdikdə baş verir. “Tempel-Tuttle” indiki 33 illik orbitində Yerə yaxınlaşdıqdan sonra planetimiz 2031-ci il noyabrın 17-18-də kometin təzə izindən keçəcək. “Tempel-Tuttle”nin son izlərində qalan çoxlu miqdarda zibil yüksək sürətlə üstümüzə yağacaq, kosmik cismin parçaları atmosferimizdə yanarkən səmada parlayacaq.

2040-cı il sentyabrın 8-də Merkuri, Venera, Mars, Yupiter, Saturn və Ayın nadir düzülüşünü görəcəyik. Bu beş planet 2 günlük Ay ilə Günəş batdıqdan dərhal sonra qərb tərəfdə, 8 dərəcəlik kiçik səma zolağında görünəcək. Bu hadisədən 12 il sonra, yəni 2052-ci il dekabrın 6-da Ay 356 min 424 kilometr məsafəyə qədər yaxınlaşacaq və nəticədə həmişəkindən 14 faiz daha böyük görünəcək. Buna oxşar hadisələr 1948-ci il yanvarın 26-da, 2016-cı il noyabrın 14-də baş verib. Növbəti hadisə 2034-cü il noyabrın 25-də baş verəcək. Lakin 2052-ci il dekabrın 6-dakı hadisə əsrin ən yaxın Super Ayı olacaq.

Günəş ətrafında fırlanan 76 illik qısa orbital periodu ilə “Halley” kometi 2061-ci il iyulun 29-da növbəti uçuşu zamanı planetimizin qaranlıq yerlərindən asanlıqla görünəcək. O, bizim ən məşhur kosmik ziyarətçilərimizdən biridir. Kometin ilk müşahidəsi 2 min il əvvəl aparılıb. 2065-ci il noyabrın 22-də isə Venera Yupiterin diskini keçərkən və ya tıxayarkən Yerdən görünəcək və bu, Günəş sistemi planetinin 1818-ci ildən bəri ilk görünən tranziti olacaq.

 Ülkər XASPOLADOVA,

“Azərbaycan”