2025-ci ilin yanvar-iyul ayları ərzində yük və sərnişin daşımaları əvvəlki ilin eyni dövrü ilə müqayisədə müvafiq olaraq 2,6 və 5 faiz artıb.
Dövlət Statistika Komitəsindən AZƏRTAC-a bildirilib ki, nəqliyyat sektorunda fəaliyyət göstərən təsərrüfat subyektləri tərəfindən 136,9 milyon ton yük daşınıb. Yüklərin 3,9 faizi dəniz, 7,2 faizi dəmir yolu, 0,2 faizi hava, 60,6 faizi avtomobil nəqliyyatı, 28,1 faizi isə boru kəməri ilə daşınıb.
Qeyri-dövlət sektoruna məxsus nəqliyyat vasitələri ilə daşınmış yüklərin həcmi 4,1 faiz artıb, daşınmış yüklərin ümumi həcmində bu sektorun xüsusi çəkisi 79,4 faiz təşkil edib.
2025-ci ilin yanvar-iyul aylarında nəqliyyatçılar 1187,7 milyon sərnişinə xidmət göstəriblər. Sərnişinlərin 88,6 faizi avtomobil nəqliyyatı, 10,7 faizi metro, qalan hissəsi isə digər nəqliyyat növləri ilə daşınıb.
Dəmir yolu nəqliyyatı ilə 2025-ci ilin yanvar-iyul aylarında 9,8 milyon ton yük, 5478,6 min sərnişin daşınıb, 2024-cü ilin eyni dövrü ilə müqayisədə yük daşınmasında 9,5 faiz azalma, sərnişin daşınmasında isə 21,1 faiz artım müşahidə olunub.
Dəniz nəqliyyatı ilə 2025-ci ilin yanvar-iyul aylarında daşınmış yüklərin həcmi 5395 min ton təşkil edib və əvvəlki ilin müvafiq dövrünə nisbətən 10 faiz artıb. Yüklərin 48,2 faizini neft yükləri təşkil edib. Dəniz limanları tərəfindən 7906,7 min ton həcmində yükləmə-boşaltma işləri həyata keçirilib və yüklərin 6399 min tonunu və ya 80,9 faizini tranzit yüklər təşkil edib.
2025-ci il avqust ayının 1-i vəziyyətinə limanlarda qalan yüklərin həcmi 338,6 min ton olub.
Dövr ərzində bu nəqliyyat növü ilə daşınmış sərnişinlərin sayı 2024-cü ilin müvafiq dövrünə nisbətən 5,7 faiz azalaraq 14,8 min nəfər olub.
Nəqliyyat sektorunda daşımaların həcmində xüsusi çəkisi ən böyük olan avtomobil nəqliyyatı ilə 83,1 milyon ton yük, 1052,3 milyon sərnişin daşınıb və 2024-cü ilin yanvar-iyul ayları ilə müqayisədə müvafiq olaraq 7,1 faiz və 5,8 faiz artım qeydə alınıb.
Sərnişinlərin 95,5 faizi avtobus, 4,5 faizi isə minik taksilərinin xidmətlərindən istifadə edib. Yük dövriyyəsi 8,7 faiz, sərnişin dövriyyəsi isə 8 faiz artıb.
Metro nəqliyyatının xidmətlərindən istifadə etmiş sərnişinlərin sayı 1,9 faiz azalaraq 127,6 milyon nəfər olub.
Hava nəqliyyatı ilə 2282 min və ya əvvəlki ilin müvafiq dövrünə nisbətən 2,7 faiz çox sərnişin daşınıb, daşımaların 99,9 faizi dövlət, 0,1 faizi isə özəl müəssisələrə məxsus nəqliyyat vasitələri ilə həyata keçirilib. Bu nəqliyyat növü ilə yükdaşıma 4,2 faiz azalaraq 223,5 min ton olub.
Magistral neft kəmərləri ilə 21553,9 min ton neft nəql edilib. Nəqletmənin 75 faizi Bakı-Tbilisi-Ceyhan neft ixrac kəməri ilə həyata keçirilib və cari ilin yanvar-iyul ayları ərzində bu kəmər vasitəsilə 16156,1 min ton neft ötürülüb. Dövr ərzində BTC kəməri ilə nəql edilmiş neftin 83,6 faizini və ya 13510,2 min tonunu Azərbaycanda hasil edilən neft, 16,4 faizini və ya 2645,9 min tonunu isə Türkmənistan və Qazaxıstandan daxil olan neft təşkil edib.
Magistral qaz kəmərləri ilə 23 milyard 423,8 milyon kubmetr qaz nəql edilib və 2024-cü ilin yanvar-iyul aylarına nisbətən 1,9 faiz azalma müşahidə olunub. Qazın nəqlinin 56,4 faizi Bakı-Tbilisi-Ərzurum Cənubi Qafqaz boru kəməri vasitəsilə həyata keçirilib və 13 milyard 217,2 milyon kubmetr qaz ötürülüb.
2025-ci ilin yanvar-iyun aylarında nəqliyyat dəhlizlərində dəmir yolu nəqliyyatı ilə 7120,1 min ton, dəniz nəqliyyatı ilə 3752,2 min ton və avtomobil nəqliyyatı ilə 5307,7 min ton yük daşınıb.
