Fransada 2025-ci il martın 31-də məhkəmə Milli Mitinq partiyasının parlament fraksiyasının rəhbəri Marin Le Penin Avropa Parlamentindən pul mənimcəniməsi ilə bağlı işi üzrə qərar verəcək. Bu barədə
” Le Figaro” qəzeti xəbər verir.
İşə baxılması noyabrın 27-də başa çatıb. İclasın sonunda Le Penə söz verilsə də, o, məhkəmədə çıxış etməyib.
Dinləmədən sonra o, jurnalistlərə deyib ki, hökmün çıxarılmasının gecikməsi “bu işin bəzi insanların düşündüyündən qat-qat mürəkkəb olduğunu göstərir”. O, həmçinin əlavə edib ki, vəziyyətlə bağlı "narahatlıq keçirmir".
Noyabrda Fransa prokurorları Le Penin Avropa Parlamentinin vəsaitlərini mənimsəmə ittihamı ilə 5 il müddətinə azadlıqdan məhrum edilməsini istəyib. İttiham tərəfi Le Pendən bu cəzanın 3 ilini şərti olaraq, qalan iki il isə həbs cəzasını elektron qolbaq taxmaqla və ya azadlığı məhdudlaşdırmaq üçün digər daha az sərt variantlarla əvəz etmək icazəsi ilə çəkməsini xahiş edir.
Bundan əlavə, prokurorluq Le Pendən 300 min avro cərimə ödəməsini tələb edir. Nəhayət, prokurorlar hesab edirlər ki, Le Penə beş il müddətinə seçkilərdə iştirak qadağan edilməlidir. Əgər bu tələb məhkəmə tərəfindən təmin olunarsa, o, 2027-ci ildə keçiriləcək prezident seçkilərində namizəd kimi iştirak edə bilməyəcək.
Le Pen özü də əvvəllər bəyan etmişdi ki, o, nə Fransa qanunlarını, nə də Avropa Parlamentinin qaydalarını pozub. Onun sözlərinə görə, prokurorluq onun siyasi karyerasını məhv etməyə çalışır.
Sentyabrın sonunda Parisdə Le Penin işçilərin qondarma işə cəlb edilməsi yolu ilə Avropa Parlamentindən pulların mənimsənilməsində ittiham olunduğu iş üzrə dinləmələr başlayıb.
Rizvan CƏFƏROV,
“Azərbaycan”
