ABŞ Prezidenti Donald Trampın ölkə hökumətinin işi ilə bağlı ilk fərmanları xaosa səbəb olub və bir sıra nazirlik və idarələrin işini qismən iflic edib. Bu barədə Amerikanın “The Wall Street Journal” (WSJ) qəzeti ABŞ hökumətindəki mənbələrə istinadla məlumat yayıb.
AZƏRTAC xarici mediaya istinadla xəbər verir ki, mənbələr qeyd ediblər ki, yeni Prezidentin vəzifəyə başlamasından sonrakı dövr adətən “müəyyən pozuntuların” olması ilə səciyyələnir, lakin bu dəfə əvvəlki və yeni administrasiyaların gündəmləri ilə bağlı “xaos” çox böyük fərqlər səbəbindən ifrat xarakter alıb. Hökumət işini yenidən qurduqca, hətta adi əməliyyatlar da yavaşlayır.
Nəşr yazır ki, səhiyyə və digər sosial məsələlərlə məşğul olan xidmətlər rəsmi ezamiyyətlərin ləğvi də daxil olmaqla, növbəti xəbərdarlığa qədər bütün xarici əlaqələri dayandırmağa məcbur olub. Müvəqqəti işə qəbulun dondurulması ABŞ Veteranlarla İş Departamentinin, Milli Park Xidmətinin və digər federal agentliklərin işinə əhəmiyyətli dərəcədə maneçilik törədir. Nəqliyyat Nazirliyi yol layihəsinin kompüter sisteminin fəaliyyətini müvəqqəti dayandırmalı olub.
WSJ-nin qeyd etdiyi kimi, digər problem Baydenin prezidentliyi dövründə proseduru təsdiqlənmiş müxtəlif dövlət qurumları arasında vəsaitlərin bölüşdürülməsi ilə bağlı qarışıqlı fəaliyyət idi. Bu səbəbdən ayrı-ayrı qurumlar bəzi funksiyalarının icrasını qismən dayandırır.
Bundan əvvəl “The New York Times” yazıb ki, Trampın imzaladığı fərmanların icrası ABŞ-da 50 minə yaxın federal məmurun işdən çıxarılmasına səbəb ola bilər.
Çərşənbə axşamı Tramp Ağ evin Kadrlar Departamentində Co Baydendən əvvəlki administrasiya dövründə təyin edilmiş 1000-dən çox məmurun işdən çıxarılması prosesinə başladığını elan etdi. O, yanvarın 20-də andiçmə mərasimindən sonra ABŞ-da dövlət qulluğu məsələlərini tənzimləyən bir sıra sərəncamlar imzalayıb. Digər tədbirlər arasında federal dövlət qulluqçularının işdən çıxarılması proseduru sadələşdirilir, onlara verilən zəmanətlərin miqdarı azaldılır, federal məmurlar üçün uzaqdan işləmək imkanları ləğv olunur və federal agentliklərdə inklüzivlik və müxtəliflik üçün bütün proqramlar bağlanılır.
jpg_1773317662.jpg)
