Dünən səhər saatlarından Böyük Britaniya Kraliçası II Elizabetin dəfn mərasiminə dəvət olunmuş dünyanın müxtəlif ölkələrindən  dövlət və hökumət başçıları, digər tanınmış şəxslər Vestminster sarayına gəldilər. Monarxın cənazəsi olan tabut  Britaniya Parlamentinin yerləşdiyi saraydan yolun o biri tayına - 2 mindən çox qonağın toplaşdığı Vestminster kilsəsinə aparıldı. 
Mərasimə ilk gələnlər arasında Fransa prezidenti Emmanuel Makron və həyat yoldaşı Bricit olub. Sonra ABŞ Prezidenti Co Bayden və birinci xanım Cil Bayden, Britaniyanın yeni hökumətinin üzvləri Nadim Zahavi və Ceykob Ris-Moqq, müxalifətdəki Leyboristlər Partiyasının lideri ser Kir Starmer,  dini liderlər - Duvr yepiskopu Rouz Hadson-Uilkin və Vatikandan bir neçə kardinal  Vestminster kilsəsinə gəliblər. 
Böyük əksəriyyəti II Elizabetin qan qohumları olan Avropa kral ailələrinin üzvləri  kraliça ilə vidalaşmağa toplaşmışdılar. Belçika Kralı Filipp və Kraliça Matilda, həmçinin Hollandiya Kralı Villem-Aleksander, həyat yoldaşı Kraliça Maksima və anası, keçmiş Kraliça Beatriks ilə birlikdə Londona dəvət almışdılar. İspaniya kralı Filipp və xanımı Letisiya, Norveç, Danimarka, İsveç və Monakonun kral ailələrinin nümayəndələri də mərasimdə iştirak edirdilər.
Əhaliyə gəldikdə isə, Krissi Hiri 10 kilometrdən çox uzanan növbəylə Vestminster sarayında kraliça ilə vidalaşmağı bacaran ölkənin sonuncu adi sakini olmuşdur. Monarxın cəsədi olan tabutu görmək və II Elizabetə son ehtiramını bildirmək üçün bəziləri 10 saatdan çox növbəyə durmuşdular. 
Londonda tıxacların qarşısını almaq üçün xarici ölkələrin liderlərinin əksəriyyətindən  kommersiya reysləri ilə gəlmələri istənilib və onlar mərkəzləşdirilmiş qaydada avtobuslarla daşınıblar.
Kenterberi arxiyepiskopu xütbə oxuduqdan sonra Böyük Britaniyada ikidəqiqəlik sükut olub. II Elizabetin yaşadığı ömrə müvafiq olaraq Biq Ben saat qülləsi 96 dəfə zəng vurub. Sonra dövlət himni səsləndirilib və 142 dənizçi tabutu  xüsusi lafetə yerləşdirərək kilsədən son mənzilə aparıb. 
Mərasimdə 3000-dən çox hərbçi iştirak edib və bunu yalnız Kraliça II Elizabetin atası VI Corcun 1952-ci ildə keçirilmiş dəfn mərasimi ilə müqayisə etmək olar.
Mərasim iştirakçıları Bukingem Sarayının, kral parklarının, kraliçanın valideynlərinin - VI Corc və Elizabetin abidəsinin yanından keçiblər. Nəhayət, Haydparkdan kortej Vindzor qəsrinə yollanıb və mərasimin son mərhələsi orada başa çatıb. 
BBC Agentliyinin xəbərinə görə, dəfn mərasimində Rusiya, Belarus, Suriya, Venesuela, Əfqanıstan və Myanmadan nümayəndə olmayıb.

Rizvan CƏFƏROV,
"Azərbaycan"