Fevralın 12-də Bakı Kommersiya Məhkəməsi və Azərbaycan Respublikası Vəkillər Kollegiyasının Biznes Hüququ Komitəsinin birgə təşkilatçılığı ilə kommersiya mübahisələrinin xüsusiyyətlərinə və aktual məsələlərinə həsr olunmuş seminar–dəyirmi masa keçirilib.
Tədbirdə Azərbaycan Respublikasının Ali Məhkəməsinin Kommersiya Kollegiyasının, Bakı Apellyasiya Məhkəməsinin hakimləri, Vəkillər Kollegiyasının üzvləri və biznes strukturlarının nümayəndələri iştirak ediblər.
Seminarı giriş sözü ilə açan Bakı Kommersiya Məhkəməsinin sədri İlham Əhmədov kommersiya mübahisələri üzrə praktiki və nəzəri hüquqi məsələlərin müzakirəsinin, eləcə də məhkəmə-hüquq təcrübəsi üzrə fikir mübadiləsinin əhəmiyyətini vurğulayıb.
O, xüsusilə çirkli pulların yuyulmasının qarşısının alınması ilə bağlı maddi hüquq məsələlərinə toxunub. Hüquqi şəxslərin yenidən təşkili zamanı hüquqi varislik, universal və xüsusi hüquq qabiliyyətinin fərqləndirilməsi, sübutetmə vəzifəsinin icrası, korporativ mübahisələrdə məhkəmə baxışının hədləri, sadələşdirilmiş icraat və digər mühüm məsələlər üzrə məhkəmənin formalaşmış praktikası barədə ətraflı məlumat verib.
Daha sonra Ali Məhkəmənin Kommersiya Kollegiyasının sədri Kəmalə Abiyeva Ali Məhkəmənin kommersiya mübahisələri üzrə məhkəmə təcrübəsinin ümumiləşdirilməsi istiqamətində görülən işlərdən bəhs edib. O, eyni zamanda məhkəmə aidiyyəti, müvəqqəti təminat tədbirləri, sübutların qiymətləndirilməsi və digər maddi və prosessual hüquq məsələləri üzrə formalaşmış mövqeyə toxunub.
Vəkillər Kollegiyasının Biznes Hüququ Komitəsinin sədri Nazlı Əhmədova tədbirin təşkilinə görə Bakı Kommersiya Məhkəməsinə, həmçinin Ali Məhkəmənin Kommersiya Kollegiyasına və Bakı Apellyasiya Məhkəməsinə təşəkkürünü bildirib. O, bu cür dialoqun vəkillər tərəfindən yüksək qiymətləndirildiyini, ədalət mühakiməsinin inkişafına və səmərəli təcrübə mübadiləsinə mühüm töhfə verəcəyini qeyd edib.
Tədbirdə Ali Məhkəmənin Kommersiya Kollegiyasının hakimi Bəhman Qəribov və Bakı Apellyasiya Məhkəməsinin hakimi Leyla Əliyeva mövzu ilə bağlı məhkəmə təcrübəsi barədə çıxış ediblər.
Vəkillər Kollegiyasının üzvləri Əkrəm Həsənov, Cavid Alıyev, Dünyamin Novruzov, Sevda Məhərrəmova, Şaiq Mirzəyev, Rüfət Bədirli və Əlibaba Əliyevin qaldırdıqları praktiki məsələlər ətrafında geniş fikir mübadiləsi aparılıb.
Seminarın sonunda xatirə fotosu çəkilib.
"Azərbaycan"
jpg_1770988918.jpg)
jpg_1770980409.jpg)
